Números 35 - DIOSPA QHELQACHISQ

Levitakunaj chayaqenku

¹ Moab suyoj pampanpi, Jordán mayu kantupi, Jericó llajtaj chimpanpi Tata Dios Moisesta nillarqataj:

² Israelitakunata kamachiy: Jallp'ata jap'isqaykichejmanta levitakuna tiyakunankupaj llajtakunata qonkichej. Jinallataj chay llajtakunaj muyuyninpi uywa michinantinta qollankichejtaj.

³ Levitakunaqa chay llajtakunapi tiyakonqanku. Chay llajtakunaj uywa michinanpitaj tukuy imaymana uywata uywanqanku.

⁴ Levitakunapaj uywa michinaqa llajtaj perqamanta jawaman 450 metrokama kanqa.

⁵ Llajtamanta jawaman, inti llojsimuynejman 900 metrota medinkichej. Inti yaykuynejman, wichaynejman, uraynejman jinallatataj medinkichej. Llajtaqa chawpipi rikhurenqa, muyuyninpitaj uywa michinan kanqa.

⁶ Levitakunaman qosqaykichej llajtakunamantaqa sojta llajtakuna pakakunapaj kanqanku. Pichus runa masinta mana yuyasqallamanta wañuchejqa chay llajtaman ayqekuspa, pakakonqa. Chay sojta llajtamanta jawaqa waj tawa chunka iskayniyoj llajtakunatawan levitakunaman qonkichej.

⁷ Tukuyninpi tawa chunka pusajniyoj llajtata levitakunaman qonkichej. Sapa llajta uywa michinantinkama kanqa.

⁸ Israelitakuna jap'isqaykichej suyupi, levitakunaman qosqaykichej llajtakunaqa sapa jatun ayllu mashkhan jallp'atachus jap'isqaykichejman jina kanqa. Jatun jallp'ata jap'ejqa ashkha llajtata qonqa, pisi jallp'ata jap'ejtaj pisillatataj qonqa, nispa.

Pakakunapaj llajta

⁹ Tata Dios Moisesta nillarqataj:

¹⁰ Israelitakunata niy: Maypachachus Canaán suyuman yaykunaykichejpaj Jordán mayuta chimpankichej chaypachaqa,

¹¹ wakin llajtakunata pakakuna llajta kananpaj ajllankichej. Chaypi pipis runa masinta mana yuyasqallamanta wañuchej pakakonqa.

¹² Chay runa chaypi pakakonqa, wañojpa ayllun ama wañuchinanpaj. Ajinamanta payqa tukuy runaj ñawpaqenpi juzgasqa kanankama, mana wañonqachu.

¹³ Levitakunaman qosqaykichej llajtakunamantaqa sojta llajtakuna pakakunapaj kanqa:

¹⁴ Kinsa llajtaqa Jordán mayoj inti llojsimuyninnejpi kanqa, kinsataj Canaán suyupi.

¹⁵ Chay sojta llajta pakakunapaj kanqanku. Chayman pakakonqanku israelitakuna, jinallataj qankunawan tiyakoj karu llajtayojkunapis, chayrí llajtaykichejnejta pasashajkunapis. Pikunachus runa masinkuta mana yuyasqallamanta wañuchinku, chaykunalla chayman pakakoj ayqekonqanku.

¹⁶ Sichus pipis runa masinta fierrowan wajtanman, chay runataj wañunman chayqa, fierrowan wajtajqa runa wañuchipaj qhawasqa kanqa. Chayrayku payqa wañunanpaj juchachasqa kanqa.

¹⁷ Sichus pipis runa masinta rumiwan ch'anqanman, chay runataj wañunman chayqa, chay ch'anqaj runaqa runa wañuchipaj qhawasqa kanqa. Chayrayku payqa wañunanpaj juchachasqa kanqa.

¹⁸ Sichus pipis uj runata k'aspiwan wajtanman, chay runataj wañunman chayqa, chay wajtaj runaqa runa wañuchipaj qhawasqa kanqa. Chayrayku payqa wañunanpaj juchachasqallataj kanqa.

¹⁹ Wañojpa aswan qaylla ayllun chay runa wañuchita tarispa, wañuchinan tiyan.

²⁰ Ichapis pipis runa masinta chejnikuspa maymanpis tanqaykunman, chayrí wañuchiyta munaspa imawanpis ch'anqaykunman,

²¹ chayrí chejnikuspa maqaykunman, chay runataj wañun chayqa, chay maqaj runaqa wañuchisqallataj kanqa. Wañojpa aswan qaylla ayllun chay runa wañuchita tarispa, wañuchenqa.

²² Chaywanpis kay jina kajtin, wañuchisqa kananpaj mana juchachankichu: Pipis mana yuyasqallamanta pampaman choqaspa runa masinta wañuchejta, mana yuyasqallamanta runa masinman imatapis choqaykuspa wañuchejta ima.

²³ Manallataj juchachankichu mana yuyasqallamanta runa masinta rumiwan kachaykuspa wañuchejta, mana awqan kaspachu, nitaj imata ruwayta munaspachu runa masinta wañuchejta ima.

²⁴ Jinachus kanman chayqa, chay llajtayojkuna tantakuspa, kay kamachisqaman jina juzganqanku, pichus runata wañuchejtawan, wañojpa ayllun vengakuyta munajtawan.

²⁵ Ajinata wañojpa ayllun vengakuspa wañuchinanmanta jark'anqanku. Runata wañuchejtataj, may llajtamanchus pakakunanpaj ayqekorqa, chay llajtaman kutichenqanku. Pichus wañuchejqa, aceitewan jawisqa kuraj kaj sacerdote wañupunankama chaypi tiyakonqa.

²⁶ Sitajchus runa masinta wañuchej pakakuna llajtamanta llojsinman,

²⁷ wañojpa aylluntaj pakakuna llajtamanta jawapi payta taripaspa wañuchinman chayqa, pichus wañuchej mana juchachasqachu kanqa.

²⁸ Chayrayku wañuchej runaqa kuraj kaj sacerdote wañupunankama, pakakuna llajtamanta mana llojsinanchu tiyan. Kuraj kaj sacerdote wañusqanmantaraj wañuchej runaqa llajtanman ripuyta atenqa.

²⁹ Kay kamachisqakunaqa qankunapaj, jinataj tukuy mirayniykichejpajwan kanqa, mayllapipis tiyakunkichej chaypi.

Testigokunapaj kamachisqakuna

³⁰ Sichus pipis uj runata wañuchin chayqa, wañunanpaj juchachasqa kananpajqa rikojkuna iskayllapis kanan tiyan. Rikoj ujlla kajtinrí, mana pitapis wañuchisqa kananpaj juchachayta atiwajchejchu.

³¹ Runa wañuchi wañuchisqa kananpaj juchachasqa kajtin, ama wañuchisqa kananpaj qolqeta pagana mana atikunchu. Chay runaqa wañunanpuni tiyan.

³² Runa wañuchi pakakuna llajtaman ayqejmantapis wasinman ripunanpaj, manallataj qolqeta jap'iyta atenqachu. Chay runaqa kikinpi qhepakunan tiyan, kuraj kaj sacerdote wañupunankama.

³³ Maypichus tiyakunkichej, chay jallp'ata ama manakajman tukuchinkichejchu, imajtinchus runata wañucheyqa jallp'ata ch'ichichan. Chay jallp'aqa llimphuchasqa kanqa, runata wañuchej wañuchisqa kajtillan.

³⁴ Ama, maypichus tiyakunkichej, chay jallp'ata ch'ichichankichejchu, imaraykuchus noqa Tata Dios chayllapitaj qankunawan khuska tiyakuni. Noqa Tata Diosmin israelitakunawan khuska tiyakuni, nispa.