Números 3 - DIOSPA QHELQACHISQ

Levitakunaj imachus ruwananku

¹ Sinaí orqopi Tata Dios Moisesman parlarqa chaypacha, Aaronpata, Moisespatawan mirayninku kaykuna karqanku.

² Aaronpa churinkuna karqanku: Kuraj kaj Nadab, sullk'ankunataj Abiú, Eleazar, chantá Itamar ima.

³ Paykunaqa tawantinku Aaronpa ayllunmanta sacerdote kanankupaj ajllasqa karqanku, chantá aceitewan jawisqa ima.

⁴ Nadabwan, Abiuwan imarí Tata Diospa ñawpaqenpi wañorqanku, Sinaí orqopi Tata Diosman inciensota mana kamachisqanman jina jaywasqankumanta. Chantapis paykunajta mana wawanku karqachu. Chayrayku Eleazarwan, Itamarwan ima tatanku Aarón kawsashajtin, sacerdote jina imachus ruwanankuta ruwarqanku.

⁵ Chantá Tata Diosqa Moisesta nerqa:

⁶ Leví jatun ayllumanta kajkunata wajyay, sacerdote Aarón kamachisqanman jina imachus ruwanankuta ruwaspa, yanapanankupaj.

⁷ Eleazarwan chantá Itamarwan ima Aaronta, jinallataj tukuy israelitakunata Dioswan Tinkukuna Toldopi yanapanankupaj kanqanku. Jinallataj Dioswan Tinkukuna Toldopi imachus ruwanankuta ruwanqanku.

⁸ Jinallataj Dioswan Tinkukuna Toldopi imachus kajta qhawanqanku. Chantá Dioswan Tinkukuna Toldopi imachus ruwanapi israelitakunata yanapanqanku.

⁹ Tukuynin israelitakunamanta levitakunata t'aqay, paykuna Aaronta, miraynintawan yapanankupaj.

¹⁰ Aaronta, miraynintawan ima sacerdote ruwanata ruwanankupaj churanki. Sichus waj runa, mana sacerdote kaspalla sacerdote jina ruwanman chayqa, wañuchisqa kanqa, nispa.

Levitakuna Diospata kanku

¹¹ Chantá Tata Dios Moisesta nillarqataj:

¹² Tukuy israelitakunamanta levitakunata ajllakorqani. Paykunata sapa ayllupi kuraj kaj churikunaj cuentanmanta ajllakuni. Chayrayku paykunaqa noqajta kanku.

¹³ Tukuy kuraj kaj qhari wawakunaqa noqajtamin kanku. Maypachachus Egipto llajtayojkunaj kuraj kaj churinkukunata wañuracherqani chaypacha, israelitakunaj kuraj kaj churinkukunata, jinallataj uywakunaj phiwi uñankutapis noqapaj ajllakorqani. Chayrayku chaykunaqa noqajta kanku. Noqamin Tata Diosqa kani, nispa.

Levitakunata yupanku

¹⁴ Tata Dios Sinaí ch'innejpi Moisesman nillarqataj:

¹⁵ Tukuy Leví jatun ayllumanta kajkunata tatankoj sutinkuman jina yupay. Chantá sapa wasi ayllupi tukuynin qharikunata uj killayojmanta pataman listanki, nispa.

¹⁶ Moisestaj Tata Diospa kamachisqanman jina levitakunata yuparqa.

¹⁷ Levíj churinkunaqa karqanku: Gersón, Coat, chantá Merari ima.

¹⁸ Gersonpa churinkunataj mirasqankuman jina karqanku: Libni, chantá Simey ima.

¹⁹ Coatpata churinkunaqa mirasqankuman jina karqanku: Amirán, Isar, Hebrón, chantá Uziel ima.

²⁰ Merarij churinkunataj mirasqankuman jina karqanku: Mali, chantá Musi ima. Chaykuna Levíj churinkuna mirasqankuman jina karqanku, sapa ayllupi tatankoj sutinkuman jina yupasqa.

²¹ Libnij ayllun, jinataj Simeypa ayllun ima Gersonpa mirayninmanta karqanku.

²² Gersonpa ayllunmanta qharikuna uj killayojmanta pataman yupasqa, tukuyninpi 7.500 karqanku.

²³ Gersonpa ayllonqa Dioswan Tinkukuna Toldo wasapi, inti yaykuynejpi jarakorqanku.

²⁴ Gersonpa ayllunta kamachejqa Laelpa churin Eliasaf karqa.

²⁵ Paykunaqa Dioswan Tinkukuna Toldota qhawananku karqa. Jinallataj qaramanta toldo qhatanata, chantá toldoman yaykuna cortinanta ima qhawanallankutaj karqa.

²⁶ Chantá patiopi cortinakunata, Dioswan Tinkukuna Toldoj muyuyninpi patioman yaykunaj cortinanta, altarta, chantá waskhakunatawan ima qhawanallankutaj karqa.

²⁷ Coatpa miraymanta kajkuna karqanku: Amiranpa ayllun, Izharpa ayllun, Hebronpa ayllun, chantá Uzielpa ayllun ima.

²⁸ Paykuna uj killayojmanta pataman yupasqa 8.600 qharikuna karqanku. Paykunaqa Dioswan Tinkukuna Toldoj imankunata qhawanankupaj churasqa karqanku.

²⁹ Coatpa ayllunmanta kajkunaqa Dioswan Tinkukuna Toldoj urannejpi jarakorqanku.

³⁰ Paykunaj kamachejninkutaj Uzielpa churin Elisafán karqa.

³¹ Paykuna qhawananku karqa: Arcata, mesata, candelerota, chantá altarkunata ima. Jinallataj Diosta yupaychanapaj imakunachus karqa chaykunata, velota jinataj tukuy imachus karqa chaykunatawan qhawanallankutaj karqa.

³² Levitakunaj kuraj kaj kamachejninkoqa sacerdote Aaronpa churin Eleazar karqa. Payqa Dioswan Tinkukuna Toldota qhawajkunata qhawananpaj churasqa karqa.

³³ Merarij mirayninmanta karqanku: Malij ayllun, chantá Musij ayllun ima.

³⁴ Paykuna tukuyninpi uj killayojmanta pataman 6.200 qharikuna karqanku.

³⁵ Paykunata kamachejqa Abijailpa churin Suriel karqa. Jinataj paykunaqa Dioswan Tinkukuna Toldomanta patanejpi jarakorqanku.

³⁶ Merarij ayllunmanta kajkunaqa qhawananku karqa: Dioswan Tinkukuna Toldoj tablankunata, wajtera k'aspikunata, sayantakunata, chukukunata, chantá imachá tiyarqa, chaytawan ima.

³⁷ Jinallataj qhawananku karqa patiota muyuykushan chay k'aspikunata, chukukunata, estacakunata, chantá watana waskhakunata ima.

³⁸ Dioswan Tinkukuna Toldoj ñawpaqenpi, inti llojsimuynejpi jarakorqanku Moiseswan, Aaronwan, chantá paypa churinkuna ima. Paykunaqa israelitakunaj sutinkupi Diospa tiyakunan cheqata qhawarqanku. Sichus pipis mana sacerdote kaspalla, sacerdotej ruwananta ruwanman karqa chayqa, wañuchisqa kanan karqa.

³⁹ Ajinata Moiseswan, chantá Aaronwan ima Tata Diospa kamachisqanman jina ruwarqanku. Paykunaqa levitakunaj ayllunkuta mashkhachus kasqankuman jina yuparqanku. Tukuyninpi uj killayojmanta pataman, 22.000 qharikuna karqanku.

Kuraj kaj churikunamanta pagana

⁴⁰ Chantá Tata Dios Moisesta nillarqataj: Israelitakunaj tukuy kuraj kaj churinkukunata uj killayojmanta pataman listaspa, yupay.

⁴¹ Chantá israelitakunaj kuraj kaj churinkukunaj cuentanmanta levitakunata ajllapuway. Noqamin Tata Diosqa kani. Kikillantataj israelitakunaj uywankukunamanta phiwi uñaj cuentanmanta levitakunaj uywankuta ajllapuway, nispa.

⁴² Ajinata Moisés Tata Diospa kamachisqanman jina israelitakunaj kuraj kaj churinkukunata yuparqa.

⁴³ Tukuyninpi kuraj kaj qhari wawakunaqa uj killayojmanta pataman 22.273 karqanku.

⁴⁴ Chantá Tata Diosqa Moisesta nillarqataj:

⁴⁵ Israelitakunaj kuraj kaj churinkukunaj cuentanmanta Leví aylluta ajllay. Jinallataj israelitakunaj uywankoj phiwi uñankunaj cuentanmanta levitakunaj uywankuta ajllallaytaj, imajtinchus levitakunaqa noqajta kanku. Noqamin Tata Dios kani.

⁴⁶ Chaywanpis israelitakunaj kuraj kaj churinkukunaqa levitakunaj churinkukunamanta nisqaqa aswan ashkha kanku. Ajinaqa 273 qhari wawakunata orqhokapunankupaj,

⁴⁷ mañay sapa ujmanta phishqa qolqeta paganankuta, Dioswan Tinkukuna Toldopi mashkhachus tupu churasqa kasqanman jina. Chay qolqeqa chunka ujniyoj gramo kanqa.

⁴⁸ Chay kuraj kaj churikunaj cuentanmanta tantasqa qolqetataj Aaronman, churinkunamanwan ima jaywanki, nispa.

⁴⁹ Moisesqa israelitakunaj kuraj kaj churinkukunaj cuentanmanta, mayqenkunachus levitakunamanta puchorqanku, chaykunamanta qolqeta jap'erqa.

⁵⁰ Israelitakunaj kuraj kaj churinkukunaj cuentanmanta tukuyninpi 1.365 qolqeta jap'erqa, Dioswan Tinkukuna Toldopi tupu churasqa kasqanman jina.

⁵¹ Chaymantataj Tata Dios kamachisqanman jina Moisés chay qolqeta Aaronman, churinkunamanwan ima jaywarqa.