Números 28 - DIOSPA QHELQACHISQ

Tata Diosman sapa p'unchay jaywanamanta

¹ Tata Dios Moisesta nillarqataj:

² Israelitakunata kamachiy, maychus tiemponpi t'antayta, jinallataj q'olachispa jaywanata jaywanawankuta. Chaykunaqa noqapaj ima munayta q'apashaj jaywanamin kanku.

³ Kamachillaytaj q'olachispa Tata Diosman jaywanata jaywanawankoqa kaykuna kananta: Sapa p'unchay q'olachispa uj watayoj iskay corderota, mana iman imanasqata jaywawanqanku.

⁴ Ujnin kajta tutamanta jaywawankichej, ujnin kajtataj ch'isiyaykuyta.

⁵ Ch'aki mikhuymanta jaywanaqa sumaj jak'umanta iskay kilo uj litro olivo aceitewan puñasqa kanqa.

⁶ Chaytaqa sapa kuti q'olachispa Diosman jaywanqanku, Sinaí orqopi kamachisqaman jina. Chaytaj Tata Diospaj ima munayta q'apashaj jaywana kanqa.

⁷ Sapa uj corderota, uj litro sumaj vinotawan jaywanqanku. Chay vinota Dioswan Tinkukuna Toldopi Tata Diospa sutinpi ch'ajchonqanku.

⁸ Ujnin kaj corderotataj ch'isiyaykuyta q'olachispa jaywanqanku, chaymantaj ch'aki mikhuymanta jaywanata, vinotawan ima yapanqanku, imaynatachus tutamanta jaywarqanku, ajinallatataj. Chaykunaqa Tata Diospaj ima munayta q'apashaj jaywanamin kanqa.

Samarina p'unchaypi jaywana

⁹ Samarina p'unchaypi uj watayoj, mana iman imanasqa iskay corderota Tata Diosman jaywankichej. Chaymantaj aceitewan puñasqa, sumaj jak'umanta tawa kilota, chantá vinotawan ima jaywankichej.

¹⁰ Chay q'olachisqa jaywanata samarina p'unchaypi vino jaywanatawan, chantá sapa p'unchay q'olachispa jaywanatawan khuska jaywankichej.

Sapa killa jaywana

¹¹ Killa qallariyta mana iman imanasqa iskay torillota, uj carnerota, uj watayoj qanchis corderotawan ima q'olachispa, Tata Diosman jaywankichej.

¹² Sapa torillota aceitewan puñasqa sojta kilo sumaj jak'utawan ima jaywankichej. Sapa carnerotataj aceitewan puñasqa tawa kilo sumaj jak'utawan jaywallankichejtaj.

¹³ Corderotapis sapa ujta aceitewan puñasqa, iskay kilo sumaj jak'utawan q'olachinkichej. Chayqa ima munayta q'apashaj Tata Diosman jaywanamin kanqa.

¹⁴ Sapa torillota jaywaspa, iskay litro vinotawan jaywankichej, uj litro khuskanniyojtataj sapa carnerotawan jaywallankichejtaj. Sapa corderowantaj uj litrotakama jaywankichej. Chaykunamin sapa killa qallariyta q'olachispa Tata Diosman jaywanaykichej kashan.

¹⁵ Chay jawa, q'olachispa Tata Diosman sapa p'unchay jaywanata vinotawan khuska jaywasqaykichejmanta, jucha pampachasqa kananpaj, uj chivota jaywallankichejtaj.

Pascua raymipi jaywana

¹⁶ Wata qallariy killapi, chunka tawayoj p'unchay kashajtin, Pascua raymita Tata Diospa sutinpi ruwankichej.

¹⁷ Q'ayantintaj chunka phishqayoj p'unchay kashajtin, jatun raymi kanqa. Qanchis p'unchayta mana levadurayoj t'antata mikhunkichej.

¹⁸ Semana qallariyta Diospa sutinpi tantakunkichej. Chay p'unchaypi ruwanaykichejmanta amapuni ni imata ruwankichejchu.

¹⁹ Chay jawaqa, Tata Diosman q'olachispa jaywankichej mana iman imanasqa iskay torillokunata, uj carnerota, uj watayoj qanchis corderotawan ima.

²⁰ Chay jaywanatawan khuska jaywanaykichejpaj aceitewan puñasqa sumaj jak'uta apamullankichejtaj. Sapa torillopaj sojta kilo jak'u kanqa, tawa kilotaj uj carneropaj.

²¹ Chay qanchis corderopajtaj sapa ujpaj iskay kilokama kanqa.

²² Chaymantataj juchaykichej pampachasqa kananpaj, Tata Diosman jaywanaykichejpaj, uj chivota apamullankichejtaj.

²³ Chay tukuy jaywanata Tata Diosman jaywankichej, chantapis tutamanta sapa paqarin q'olachispa Diosman jaywanatapis jaywallankichejtaj.

²⁴ Ajinata qanchisnintin p'unchaypi ruwankichej. Chay jaywana Tata Diospaj ima munay q'apashajta jaywana kanqa. Chay jawa, sapa p'unchay q'olachispa Tata Diosman jaywanata, vinotawan ima jaywankichej.

²⁵ Qanchis kaj p'unchaypitaj, Diosta yupaychanaykichejpaj ujtawan tantakunkichej. Chay p'unchaypi ruwanaykichejmanta amapuni ni imata ruwankichejchu.

Ñawpaj kaj poqoymanta jaywana

²⁶ Semana nisqa raymipi, maypachachus ñawpaj kaj poqoyta Tata Diosman jaywankichej chaypacha, Diosta yupaychanaykichejpaj tantakunkichej. Chay p'unchayqa imachus ruwanaykichejmanta mana ni imata ruwankichejchu.

²⁷ Jinallataj chay p'unchay, ima munayta q'apashaj jaywanata q'olachispa Tata Diosman jaywankichej, iskay torillota, uj carnerota, uj watayoj qanchis corderotawan ima.

²⁸ Chaywan khuskataj sapa uj torillopaj, aceitewan puñasqata sojta kilota sumaj jak'umanta jaywankichej. Sapa carneropajtaj tawa kilota jaywankichej,

²⁹ uj watayoj qanchis corderotataj, sapa ujpaj iskay kilotakama jaywankichej.

³⁰ Jinallataj juchaykichej pampachasqa kananpaj uj chivota jaywallankichejtaj.

³¹ Q'olachispa sapa p'unchay jaywanata, jinallataj ch'aki mikhuy jaywanata jich'anapaj vinotawan jaywankichej. Jaywanapaj uywakunaqa mana iman imanasqa kananku tiyan, nispa.