Números 23 - DIOSPA QHELQACHISQ

¹ Chantá Balaamqa Balacta nerqa: Kaypi qanchis altarta ruwapuway, chantá qanchis torillota, qanchis carnerotawan ñak'ay, nispa.

² Balactaj Balaam imatachus nisqanta ruwarqa. Chantá iskayninku sapa uj altarpi uj torillota, uj carnerotawan ima jaywarqanku.

³ Chaymantataj Balaamqa Balacta nerqa: Qanqa jaywanaykipaj ñak'asqaykej qayllanpi kashay. Noqataj Tata Dioswan tinkumoj risaj. Ichapis rikhuriwaspa, imata niwanman. Kutimuspataj, imatachus niwasqanta willasqayki, nispa. Chantá Balaamqa uj ch'in orqoman wicharerqa.

⁴ Chantá Tata Dios Balaamman rikhurerqa, Balaamtaj nerqa: Qanchis altarta ruwachini, sapa altarmantaj uj torillota, uj carnerotawan ñak'aspa, qanman jaywanaypaj churachini, nispa.

⁵ Chantá Tata Dios Balaam imatachus parlananta yachacherqa. Nerqataj: Kutispa, Balacta nimuy imatachus qanman nisqayki, chayta, nispa.

⁶ Balaamtaj kutispa, Balacta, Moabmanta tukuy kurajkunatawan khuska tariparqa, uywa ñak'asqaj qayllanpi sayashajta.

⁷ Chaymantataj Balaamqa ajinata sut'inchayta qallarerqa: Arammanta Balac pusachimuwan, Moabpata kamachejnin inti llojsimuy orqomanta wajyachiwan: Jamuy, Israelta maldiciy. Jacobpata ayllunta mana allin rinanta niy, nispa.

⁸ Ima nispataj maldicisaj, pitachus Tata Dios mana maldicinchu, chaytari? Imaynatataj kay runakunata mana allin rinanta niymanri, sichus Dios mana munanchu chayri?

⁹ Kay chhanka patamanta paykunata rikuni, kay orqo patamantataj paykunata qhawashani. Kay runakunaqa mana imatapis manchachikuspa, tiyakushanku. Tukuymanta nisqa waj jina runakuna kanku.

¹⁰ Jacobpa miraynenqa t'iyu jina may chhika kanku. Pitaj paykunata yupayta atinmanri? Pitaj yachanman mashkhachus kasqankutari? Allin kanman noqapis kay cheqan runakuna jina wañunay. Noqaj tukukuyneyqa paykunajta jina kachun, nispa.

¹¹ Chantá Balacqa Balaamta nerqa: Imatataj ruwashankiri? Noqaqa awqayta maldicinaykipaj qanta pusachimorqayki, mana paykunata saminchanaykipajchu, nispa.

¹² Balaamtajrí kuticherqa: Noqa nerqayki: Imatachus Tata Dios parlanayta kamachiwanqa, chayllata parlasaj, nispa.

¹³ Chaymanta Balac nerqa: Jaku, wajnejmanñataj rina. Chaymanta israelitakunaj jarankoj kantullanta rikunki, mana tukuynintachu. Chaynejmantapacha chay runakunata maldicinki, nispa.

¹⁴ Chantá Balacqa Balaamta Sofinman pusarqa. Chayqa Pisga orqo patapi kashan. Chaypipis Balac qanchis altarta ruwachillarqataj. Chantá sapa altarpi uj torillotawan, uj carnerotawan ñak'aspa, jaywarqa.

¹⁵ Balaamtajrí Balacta nerqa: Jaywanaykiwan khuska kayllapi qhepakuy, noqataj Tata Dioswan parlaj risaj, nispa.

¹⁶ Chantá Tata Diosqa Balaamman rikhurispa, imatachus parlananta yachacherqa. Chantá nerqa: Balacman kutispa, willamuy imatachus nisusqayta, nispa.

¹⁷ Balaamtaj kutispa, Balacta, tukuy Moabmanta kurajkunatawan khuska uywa ñak'asqa q'olachinapaj qayllapi sayashajta tariparqa. Balactaj payta taporqa: Tata Dios, ima nisunkitajri? nispa.

¹⁸ Chantá Balaam sut'inchayta qallarispa, nerqa: Siporpa churin Balac, sumajta uyariway.

¹⁹ Diosqa mana wañoj runa jinachu llullakunanpaj, nitaj nisqanmanta kutirinanpaj. Nin chayqa, manachu ruwanqa? Parlan chayrí, imatachus nisqanta manachu junt'anqa?

²⁰ Dios kamachiwan israelitakunata saminchanayta. Sichus Dios saminchan chayqa, noqa mana jark'ayta atiymanchu.

²¹ Payqa Jacobpa mirayninpi mana ni ima millay ch'ichita tarinchu, nillataj Israelpi ch'ichi kajta ruwanata rikunchu. Tata Diosninkoqa paykunawan kashan, paykunataj Diosta kuraj kamachejninkuta jina jatunchanku.

²² Diosqa paykunata Egiptomanta orqhomorqa kallparara k'ita toro jina kallpawan.

²³ Jacobpa contranpi ima layqeriyopis mana kanchu, nillataj layqapis Israelpa contranta atinchu. Kunanqa Israelmanta nenqanku: Qhawaychej, Diosqa paykunapaj tukuy imaymana t'ukunata ruwasqanta, nispa.

²⁴ Kay runakunaqa león jina sayaykonqanku, phiña león jinataj sayarenqanku. Jap'isqanta mikhunankama mana samarenqachu, jap'isqanpa yawarninwan sajsakunankama, nispa.

²⁵ Chaymantá Balacqa Balaamta nerqa: Sichus kay runakunata mana maldicinkichu chayqa, amaña niychu allin rinanta, nispa.

²⁶ Balaamtajrí kuticherqa: Manachu nerqayki: Noqaqa imatachus Tata Dios kamachillawasqanta ruwasaj, nispa?

²⁷ Chantá Balac nerqa: Jina kajtenqa, jaku, wajnejmanñataj risunchej. Ichapis Diosqa chaymanta israelitakunata maldicinaykita munanman, nispa.

²⁸ Chantá Balacqa Balaamta pusarqa Peor orqo pataman. Chaynejmantataj tukuynin ch'innej rikukorqa.

²⁹ Chaypitaj Balaamqa Balacta nerqa: Kaypi qanchis altarta ruwapuway, chantá qanchis torillota, qanchis carnerotawan ima ñak'ay, nispa.

³⁰ Balactaj, Balaampa nisqanman jina, kikinta ruwarqa. Sapa altarpi uj torillota, uj carnerotawan ñak'aspa, jaywarqa.