Números 22 - DIOSPA QHELQACHISQ

Kuraj kamachej Balacqa Balaamta wajyachin

¹ Israelitakuna chaymanta puririspa, Moab suyoj vallenpi jarakorqanku. Chayqa Jericó chimpapi, Jordán mayoj inti llojsimuynejpi kashan.

² Jinapis Siporpata churin Balac yacharqa israelitakuna amorreokunata imatachus ruwasqankuta.

³ Jinallataj moabitakunaqa israelitakunata maytapuni manchachikorqanku, imajtinchus paykunaqa may chhikapuni karqanku.

⁴ Chantá Moabmanta kuraj kurajkunaqa Madianmanta kurajkunata nerqanku: Kay chhika runakunaqa jallp'anchejta tukuchenqanku, imaynatachus waka q'achuta mikhuspa tukuchin, ajinata, nispa. Chaypacha Moab suyupi Siporpata churin Balac kuraj kamachej karqa.

⁵ Chayrayku payqa Beorpata churin Balaamta wajyachimorqa. Chaypacha Balaamqa Éufrates mayu chimpapi, Petor llajtapi kasharqa. Kamachej Balactaj runankunata Balaamman kacharqa, ajinata nichispa: Ashkha runakuna Egiptomanta ayqemuspa, jallp'aykoj chimpanpi kashanku.

⁶ Ama jina kaspa, usqhayta jamuy ari, kay runakunata maldicinaykipaj, imaraykuchus noqamanta aswan atiyniyoj kanku. Ichapis qan maldicisqaykirayku, paykunata atipayman, qharqoymantaj kaymanta. Noqa yachani qanpa maldicisqayki, chayrí saminchasqaykeqa junt'akusqantapuni, nispa.

⁷ Ajinaqa Moabmanta, chantá Madianmantawan kurajkuna Balaamman rerqanku, maldicisqanmanta paganankupaj qolqe aparisqa. Balaampa wasinman chayaspataj, kachakunaqa Balacpa nichisqanta willarqanku.

⁸ Balaamtajrí paykunata nerqa: Kunan ch'isi kaypi puñukuychej, q'ayataj Tata Dios imatachus niwasqanta willasqaykichej, nispa. Moabmanta kachakunataj chay tuta Balaampa wasinpi puñorqanku.

⁹ Chantá chay ch'isi Dios Balaamman rikhurispa, taporqa: Pikunataj wasiykipi kashanku, chaykunari? nispa.

¹⁰ Balaamtaj kuticherqa: Moabmanta, Siporpata churin kuraj kamachej Balac, israelitakunata maldicinaypaj chay runakunata kachamuwasqa kay jinata nispa:

¹¹ Egiptomanta ashkha runakuna llojsimuspa, tukuynejmanta junt'aykamuwanku. Jamuspa, sutiypi kay runakunata maldiciykapuway. Ichapis maldicejtiyki, noqa paykunata atipaspa, jallp'aymanta wijch'uyman, nispa.

¹² Tata Diostajrí Balaamta nerqa: Ama paykunawan riychu, nitaj israelitakunata maldiciychu, imaraykuchus paykunata noqa saminchani, nispa.

¹³ Q'ayantintaj Balaamqa tutamanta jatarispa, Balacpa kachankunata nerqa: Llajtaykichejman kutipuychej. Tata Dios qankunawan khuska rinayta mana munanchu, nispa.

¹⁴ Moabmanta kurajkunataj kutipuspa, Balacman willarqanku: Balaamqa noqaykuwan khuska jamuyta mana munanchu, nispa.

¹⁵ Chantá Balac ñawpaj kachasqakunamanta nisqaqa astawan ashkha kurajkunata kacharqa, jinallataj astawan respetasqa kajkunata kachallarqataj.

¹⁶ Paykunataj rispa, Balaamta nerqanku: Siporpata churin Balac nisunki: Ama jina kaspa, jamuriwaypuni ari. Ama niwaychu mana, nispaqa.

¹⁷ Noqaqa mashkhatachá niwasqaykita pagasqayki, imatachá niwasqaykitataj ruwasaj. Chayrayku jamurillaway ari, kay runakunata maldicipunawaykipaj, nispa.

¹⁸ Balaamtajrí kachankunaman kuticherqa: Kamachej Balac wasin junt'ata qorita, qolqetapis qowachun, noqaqa Tata Diospa kamachiwasqanpa contranta mana ni imata ruwasajchu.

¹⁹ Chaywanpis kunan ch'isi kaypi puñukuychej. Ujtawan Tata Diosta tapurillasajtaj, ichapis imatawan niwanman, nispa.

²⁰ Chay ch'isi Diosqa Balaamman rikhurispa, nerqa: Sichus chay runakuna qanta pusaj jamusunku chayqa, paykunawan rillay. Chaywanpis noqaj nisqallayta ruwanki, nispa.

Balaampata burron parlan

²¹ Balaamqa q'ayantin tutamanta jatarispa, uj china burronman caronaykukuytawan, Moabmanta kurajkunawan rerqa.

²² Balaamqa burronpi rerqa, iskay kamachinkunatawan pusarikuspa. Tata Diosrí Balaam risqanmanta phiñakuspa, ñanpi jark'ananpaj angelninta kachamorqa.

²³ Balaampa burrontaj Tata Diospa angelninta rikorqa espadan oqharisqa ñanpi sayashajta. Chayrayku ñanmanta laduyaspa, wajnejta rerqa. Balaamtajrí ñanman kutichiyta munaspa, burronta q'ajcharqa.

²⁴ Chantá Tata Diospa angelnin uva huertakunaj chawpinta rej ñanpiñataj suyaykorqa. Chay ñanqa puraj k'uchunman rumimanta perqayoj karqa.

²⁵ Burrotaj Tata Diospa angelninta ujtawan rikuspa, uj lado perqaman Balaampa chakinta ñit'iykorqa. Chaynejta Balaamqa astawan burronta q'ajcharqa.

²⁶ Tata Diospa angelnintaj aswan ñawpajman rispa, aswan k'ullkunejpi sayarqa. Chaymantaqa ni lloq'eman nitaj pañaman llojsinapaj mana karqachu.

²⁷ Burroqa Tata Diospa angelninta rikuspa, chay kikinpi pampaman laq'arparikorqa. Chantá Balaam phiñarikuspa, burrota uj k'aspiwan wajtarqa.

²⁸ Chantá Tata Dios burrota parlaricherqa. Burrotaj Balaamta nerqa: Imanayki noqa qantari? Kaytawanqa kinsa kutitaña maqawanki, nispa.

²⁹ Balaamtaj burronta nerqa: Kaypi alqorakushawanki. Sichus makiypi espada kanman karqa chayqa, kunitan wañuchiykiman karqa, nispa.

³⁰ Burrotaj kuticherqa: Noqaqa qanpa burroyki kani, unaymantapacha kunankama sapa kuti apaykachayki. Jayk'ajpis kay jinata ruwajchu kayki? nispa. Balaamtaj kuticherqa: Mana, nispa.

³¹ Chantá Tata Diosqa angelninta chawpi ñanpi espadan oqharisqa sayashajta Balaamman rikucherqa. Rikuspataj, payqa pampakama k'umuykukorqa.

³² Tata Diospa angelnintaj Balaamta nerqa: Ima nispataj burroykita kinsa kutita maqarqankiri? Noqa jark'asoj jamuni, imajtinchus Moabman rishasqayki mana allinchu rijch'awan.

³³ Burroyki noqata rikuwaspa, kinsa kutita ñawpaqeymanta laduyarqa. Sichus pay mana laduyanmanchu karqa chayqa, noqa qanta wañuchiykiman karqa. Burroykitatajrí mana wañuchiymanchu karqa, nispa.

³⁴ Chantá Balaamqa Tata Diospa angelninta nerqa: Noqa juchallikuni. Ñanpi sayaspa jark'ashawasqaykita mana yacharqanichu. Sichus Moabman rishasqay qanpaj mana allinchu chayqa, kaymanta kutipullasaj ari, nispa.

³⁵ Tata Diospa angelnintaj kuticherqa: Chay runakunawan rillay. Chaywanpis noqaj nisqallayta parlanki, nispa. Chantá Balaamqa Balacpa kachamusqan runakunawan rerqa.

Balaam Moabman chayan

³⁶ Balacqa Balaam jamushasqanta yachaytawan, Moabmanta uj llajtaman taripaj rerqa. Chay llajtaqa Arnón mayu chimpapi, Moab suyoj mojonnin tukukuypi karqa.

³⁷ Balaamta taripaspataj, nerqa: Chay jinatapuni qanta wajyachiyki. Imaraykutaj mana kasumuwarqankichuri? Manachu paganayta, jatunpajtaj qhawasunayta yuyarqanki? nispa.

³⁸ Balaamtajrí kuticherqa: Kunanqa kaypiña kashani. Chaywanpis mana imatapis parlayta atisajchu, manachayqa Tata Dios imatachus niwanqa, chayllata, nispa.

³⁹ Chaymantá Balaamqa Balacwan Quiriat Jusot llajtaman rerqanku.

⁴⁰ Chaypitaj Balacqa runankunata kamacherqa wakakunata, ovejakunata ima ñak'aspa, Balaamman, jinataj paywan jamoj kurajkunaman ima apanankuta.

Balaam israelitakunata saminchan

⁴¹ Q'ayantin paqarin tutamanta Balacqa Balaamta pusarqa Bamot Baalman. Chaymanta qhawaspataj, Balaamqa israelitakunaj jarankumanta wakinta rikorqa.