Números 2 - DIOSPA QHELQACHISQ

Israelitakuna imaynatachus jarakorqanku

¹ Tata Dios Moiseswan chantá Aaronwan ima parlaspa, nillarqataj:

² Israelitakunaqa Dioswan Tinkukuna Toldoj muyuyninpi karitunejpi jina jarakonqanku. Sapa jatun ayllu wiphalankuwan, jinallataj sapa wasi ayllupis wiphalankuwan ima jarakonqanku.

³ Judá jatun ayllumanta kajkunaqa Dioswan Tinkukuna Toldomanta inti llojsimuynejpi jarakonqanku. Soldadokuna jina t'aqa t'aqapi wiphalankuwan jarakonqanku. Paykunataqa Aminadabpa churin Nasón kamachenqa.

⁴ Yupasqa kasqankuman jina paykunaqa 74.000 qharikuna kanku.

⁵ Paykunaj qayllankupitaj Isacar jatun ayllumanta kajkuna jarakonqanku. Paykunatataj Suarpa churin Natanael kamachenqa.

⁶ Yupasqa kasqankuman jina paykunaqa 54.400 qharikuna kanku.

⁷ Paykunaj qayllankupitaj Zabulón jatun ayllumanta kajkuna jarakonqanku. Paykunatataj Helonpa churin Eliab kamachenqa.

⁸ Yupasqa kasqankuman jina paykunaqa 57.400 qharikuna kanku.

⁹ Chay jinamanta Judá jatun aylloj jaranpi kajkunaqa tukuyninpi 186.400 qharikuna karqanku. Paykuna israelitakunaj ñawpaqenkuta renqanku.

¹⁰ Dioswan Tinkukuna Toldomanta uranejman Rubén jatun ayllumanta kajkunaqa wiphalankuwan jarakonqanku. Paykunataqa Sedeurpa churin Elisur kamachenqa.

¹¹ Paykuna yupasqa kasqankuman jina 46.500 qharikuna kanku.

¹² Paykunaj qayllankupitaj Simeón jatun ayllumanta kajkuna jarakonqanku. Paykunatataj Surisadaypa churin Selumiel kamachenqa.

¹³ Paykuna yupasqaman jina 59.000 qharikuna kanku.

¹⁴ Paykunaj qayllankupitaj Gad jatun ayllumanta kajkuna jarakullanqankutaj. Paykunatataj Reuelpa churin Eliasaf kamachenqa.

¹⁵ Paykunaqa yupasqa kasqankuman jina 45.650 qharikuna kanku.

¹⁶ Ajinaqa Rubenpa jaranpi kajkuna tukuyninpi 151.450 qharikuna kanku. Paykunaqa ñawpaj kaj t'aqaj qhepanta renqanku.

¹⁷ Chantá paykunaj qhepankutataj levitakuna Dioswan Tinkukuna Toldota oqharispa, purirenqanku. Sapa jatun ayllu qhepan qhepanta purirenqanku, wiphalankuta oqharispa, imaynatachus jarakusqankuman jina.

¹⁸ Dioswan Tinkukuna Toldoj inti yaykuynejman Efraín jatun ayllumanta kajkuna wiphalankuwan jarakullanqankutaj. Paykunatataj Amiudpa churin Elisama kamachenqa.

¹⁹ Paykunaqa yupasqa kasqankuman jina 40.500 qharikuna kanku.

²⁰ Paykunaj qayllankupitaj Manasés jatun ayllumanta kajkunañataj jarakonqanku. Paykunatataj Pedasurpa churin Gamaliel kamachenqa.

²¹ Paykunaqa yupasqa kasqankuman jina 32.200 qharikuna kanku.

²² Paykunaj qayllankupitaj Benjamín jatun ayllumanta kajkuna jarakonqanku. Paykunatataj Gedeonij churin Abidán kamachenqa.

²³ Paykuna yupasqa kasqankuman jina 35.400 qharikuna kanku.

²⁴ Ajinaqa Efrainpa jaranpi kajkuna tukuyninkupi 108.100 qharikuna kanku. Paykunataj iskay kaj t'aqaj qhepanta renqanku.

²⁵ Dioswan Tinkukuna Toldomanta patanejpitaj Dan jatun ayllumanta kajkuna wiphalankuwan jarakonqanku. Paykunatataj Amisadaypa churin Ajiezer kamachenqa.

²⁶ Paykunaqa yupasqa kasqankuman jina 62.700 qharikuna kanku.

²⁷ Paykunaj qayllankupitaj Aser jatun ayllumanta kajkuna jarakonqanku. Paykunatataj Ocranpa churin Pagiel kamachenqa.

²⁸ Paykuna yupasqa kasqankuman jina 41.500 qharikuna kanku.

²⁹ Paykunaj qayllankupitaj Neftalí jatun ayllumanta kajkuna jarakullanqankutaj. Paykunatataj Enanpa churin Ajirá kamachenqa.

³⁰ Paykuna yupasqa kasqankuman jina 53.400 qharikuna kanku.

³¹ Ajinaqa Danpa jaranpi kajkuna tukuyninkupi 157.600 qharikuna kanku. Paykuna wiphalankuta oqharispa, kinsa kaj t'aqaj qhepanta renqanku, nispa.

³² Ajinata yupasqankurayku, israelitakunamanta maqanakoj rinankupaj jina yupasqa kajkunaqa tukuyninpi 603.550 qharikuna kasqanku yachakorqa.

³³ Tata Dios Moisesman kamachisqanman jina levitakunaqa mana yupasqachu karqanku.

³⁴ Israelitakunaqa chay tukuyta imaynatachus Moisesman Tata Dios kamachisqanman jina ruwarqanku. Sapa jatun ayllu, maypichus wiphalanku kasharqa, chaypi jarakorqanku. Purirerqankutaj sapa uj wasi ayllunkuman jina, ñawpa tatankoj sutinman jinataj.