Números 19 - DIOSPA QHELQACHISQ

Ch'ichipaj qhawasqa kajkunata llimphuchana

¹ Tata Dios Moiseswan, chantá Aaronwan ima parlaspa, nerqa:

² Noqa Tata Dios kayta kamachini: Israelitakunata niy pukaraw uj wakata, mana iman imanasqata, manaraj kunkanman yugo chayajta apamunankuta.

³ Chantá sacerdote Eleazarman qonkichej. Paytaj jaramanta jawaman chay wakata aysaytawan, qhawashaspalla ñak'achenqa.

⁴ Jinataj sacerdote Eleazarqa ruk'ananta chay wakaj yawarninman chhapuspa, Dioswan Tinkukuna Toldoj ñawpaqenta qanchis kutita yawarta ch'ajchonqa.

⁵ Chantá sacerdote Eleazar qhawashajtin, chay wakaj aychanta, qaranta, yawarninta, wanunta ima ninapi ruphachenqanku.

⁶ Chaymantataj Eleazarqa cedro k'aspita, hisopo qhorata, chantá puka q'aytutawan jap'ispa, maypichus waka ruphashan, chayman choqaykonqa.

⁷ Chantá sacerdoteqa p'achanta yakuwan t'ajsanqa, tukuy ukhuntapis mayllakonqa. Chaymantataj jaraman yaykuyta atenqa. Chaywanpis ch'isiyaykuykamaraj mana llimphupaj qhawasqa kanqa.

⁸ Wakata ruphachej runapis kikillantataj p'achanta yakuwan t'ajsanqa, jinallataj tukuy ukhuntapis mayllakonqa. Paypis kikillantataj ch'isiyaykuykama mana llimphupaj qhawasqa kanqa.

⁹ Chantá llimphupaj qhawasqa uj runa ruphasqa wakaj ushphanta oqharispa, jaramanta jawapi llimphupaj qhawasqa cheqaman apanqa. Chantá chaypi chay ushphata churanqa, israelitakuna chaywan llimphuchakunapaj yakuta wakichinankupaj. Chayqa juchata pampachanapaj jaywanamin.

¹⁰ Waka ruphasqaj ushphanta oqharej runarí p'achanta yakuwan t'ajsakonqa. Chaywanpis ch'isiyaykuykamaraj mana llimphupaj qhawasqa kanqa. Kay kamachisqayqa qankunapaj, jinallataj qankunawan tiyakoj karu llajtayojkunapajpis wiñaypaj churasqa kanqa.

¹¹ Pillapis ima ayatapis llankhajqa qanchis p'unchayta mana llimphupaj qhawasqa kanqa.

¹² Kinsa kaj p'unchaypi, qanchis kaj p'unchaypiwan, llimphuchakunapaj yakuwan mayllakonqa, chantá llimphupaj qhawasqa kanqa. Sichus mana kinsa kaj p'unchaypi, nitaj qanchis kaj p'unchaypipis llimphuchakonqachu chayqa, mana llimphupaj qhawasqa kanqa.

¹³ Sichus pipis ima ayata llankhaspa, mana llimphuchakonqachu chayqa, Tata Dioswan Tinkukuna Toldota ch'ichichan. Chayrayku chay runaqa israelitakuna ukhumanta wijch'usqa kanqa, paypa patanman llimphuchakuna yaku mana ch'ajchusqa kasqanrayku. Payqa mana llimphupaj qhawasqa kanqa, ch'ichi kasqantaj patanpi kanqa.

¹⁴ Uj runa toldo ukhupi wañojmantaqa kayta kamachini. Tukuy pichus toldo ukhuman yaykojkuna, jinallataj tukuy pichus toldo ukhupi kajkunaqa qanchis p'unchayta mana llimphupaj qhawasqa kanqanku.

¹⁵ Jinallataj chay toldo ukhupi mana kirpasqa mankakuna, mana allin kirpasqa mankakunapis ch'ichipaj qhawasqallataj kanqanku.

¹⁶ Pillapis campopi runaj wañuchisqan ayata, chayrí wañunanpi wañojpa ayanta llankhaj, chayrí runa tulluta, chayrí aya p'ampanatapis llankhajqa, qanchis p'unchayta mana llimphupaj qhawasqa kanqa.

¹⁷ Mana llimphupajchu qhawasqa runata llimphuchanapaj, juchata pampachanapaj ruphachisqa wakaj ushphanta uj chhikata uj p'ukuman churanqa. Chaymantaj pujyumanta yakuta orqhospa jich'anqa.

¹⁸ Chantá llimphupaj qhawasqa uj runa chay yakuman hisopo qhorawan chhapuspa, toldota ch'ajchumuchun, chay ukhupi imachus kajta, chaypi kaj runakunatawan ima. Jinallataj ch'ajchonqa pichus runa tulluta, chayrí runa wañuchisqata, chayrí runa wañusqata, jinallataj aya p'ampanata llankhajta.

¹⁹ Pichus llimphu kaj runaqa kinsa kaj p'unchaypi, chantá qanchis kaj p'unchaypi, mana llimphupaj qhawasqa runata ch'ajchonqa. Qanchis kaj p'unchaypi mana llimphupaj qhawasqa runata llimphuchanqa. Chantá mana llimphupaj qhawasqa runa p'achanta t'ajsanqa, jinallataj ukhuntapis pay kikin mayllakonqa. Jinapis ch'isiyaykuykamaraj mana llimphupaj qhawasqa kanqa.

²⁰ Sichus mana llimphupaj qhawasqa runa mana llimphuchakonqachu chayqa, llajtanmanta chinkachisqa kanqa, Tata Dioswan Tinkukuna Toldota ch'ichichasqanrayku. Chay runaqa llimphuchakuna yakuwan mana ch'ajchusqa kasqanrayku, mana llimphupaj qhawasqa kanqa.

²¹ Kay kamachisqayqa wiñaypaj qankunapaj kanqa. Pichus llimphuchakuna yakuwan wajta ch'ajchojqa p'achanta t'ajsakunan tiyan. Jinallataj chay yakuta llankhajpis ch'isiyanankama mana llimphupaj qhawasqa kanqa.

²² Mana llimphupajchu qhawasqa runaj tukuy imata llankhasqanqa ch'ichipaj qhawasqallataj kanqa. Pichus mana llimphupaj qhawasqa runata llankhajpis, ch'isiyaykuykama mana llimphupaj qhawasqallataj kanqa.