Números 17 - DIOSPA QHELQACHISQ

Aaronpa varan t'ikarin

¹ 1 (16) Tata Dios Moisesta nillarqataj:

² 2 (17) Israelitakunata niy, sapa jatun aylluta kamachejkuna uj varata apamunankuta. Tukuypi chunka iskayniyoj vara kanan tiyan. Chantá sapa varapi, sapa aylloj sutinkuta qhelqay.

³ 3 (18) Leví jatun ayllumanta kaj varamanqa Aaronpata sutinta qhelqanki. Sapa jatun aylloj kamachejninpaj uj vara kanqa.

⁴ 4 (19) Chaymantataj chay varakunata Dioswan Tinkukuna Toldoman churanki. Diospa arcan kashan, chay chimpaman maypichus qankunawan tinkukuni, chayman churanki.

⁵ 5 (20) Chaypitaj ajllakusqay runaj varanta t'ikarichisaj. Ajinamanta israelitakuna noqaj ñawpaqeypi manaña qankunaj contraykichejta rimanqankuchu, nispa.

⁶ 6 (21) Chantá Moisesqa chayta israelitakunaman willarqa. Jinataj sapa jatun ayllumanta kurajkuna uj varatakama apamorqanku. Chay varakunawan khuska Aaronpatapis chayllapitaj kasharqa. Tukuyninpi chunka iskayniyoj varakuna karqa.

⁷ 7 (22) Chaymanta Moisesqa tukuy varakunata Dioswan Tinkukuna Toldopi Tata Diospa ñawpaqenman churarqa.

⁸ 8 (23) Q'ayantintaj Moisés Dioswan Tinkukuna Toldoman yaykuspa rikorqa, Leví jatun ayllumanta varata, Aaronpata kajta, ijispa t'ikasqanta chantá almendrata poqosqanta ima.

⁹ 9 (24) Chaymantá Moisesqa Tata Diospa ñawpaqenmanta chay varakunata orqhospa, israelitakunaman rikucherqa. Chantá kamachejkunamanta sapa ujninku varankuta oqharikaporqanku.

¹⁰ 10 (25) Chantá Tata Dios Moisesta nerqa: Aaronpata varanta Diospa arcanpa ñawpaqenman ujtawan churaykamullaytaj. Chantá chaypi saqey, contraypi oqharikojkunapaj señal jina kananpaj. Ajinata ruwaspa, noqamanta israelitakuna mana allinta parlasqankuta ch'inyachinki, mana wañuchisqa kanankupaj, nispa.

¹¹ 11 (26) Chantá Moisesqa Tata Diospa kamachisqanman jina, tukuyninta ruwarqa.

¹² 12 (27) Chaymantataj israelitakuna Moisesta nerqanku: Noqaykupajqa manaña imapis suyanaykupaj jina kanñachu, tukuyniyku wañusqayku.

¹³ 13 (28) Tata Dioswan Tinkukuna Toldoman tukuy qayllajkunaqa wañunku. Ajinaqa tukuyniykuchu wañusqayku? nispa.