Números 16 - DIOSPA QHELQACHISQ

Coré Moisespa contranpi oqharikun

¹ Leví jatun ayllumanta, Coatpa mirayninmanta, Isarpata churin Coré, chantá Rubén jatun ayllumanta Eliabpata churinkuna Datanwan, Abiranwan ima, jinataj Peletpata churin Onwan ima

² Moisespa contranta oqharikorqanku. Paykunawan khuska 250 israelitakuna oqharikullarqankutaj. Paykunaqa kurajkuna, yuyaychajkuna, jinataj manchay uyarisqa runakuna karqanku.

³ Tukuyninku tantaykukuspa, Moisesman, Aaronmanwan sayaykuspa, nerqanku: Munasqaykichejta ruwanaqa kaykamalla kachun. Tukuy israelitakuna Diospaj t'aqasqa kanchej, Tata Diospis tukuyninchejwan kashan. Imaraykutaj qankuna Tata Diospa ayllunmanta aswan kasqaykichejta yuyakunkichejri? nispa.

⁴ Chayta uyariytawan, Moisés qonqorikuspa, pampaman wijch'ukorqa.

⁵ Chantá Coreta, jinataj pikunachus paywan kasharqanku, chaykunatawan ima nerqa: Q'aya tutamanta Tata Dios niwasun pikunachus paypata kasqankuta, pikunatajchus Diospaj t'aqasqa kasqankuta. Ajinallataj pikunatachus Tata Dios ajllan, chaykunalla payman qayllaykunankuta nenqa.

⁶ Ajinaqa Coré, qanwan kashanku, chaykuna ima kayta ruwaychej: Apamuychej incienso q'oshñichinaykichejta.

⁷ Q'aya chayman ninata churaspa, inciensota jich'aykunkichej. Chantá Tata Diospa ñawpaqenman churankichej. Pitachus Tata Dios ajllan, chaymin paypaj t'aqasqa kanqa. Qankuna levitakunarí anchataña sayk'uchiwankichej, nispa.

⁸ Chaymantá Moisesqa Coreta nillarqataj: Uyariwaychej, levitakuna.

⁹ Tata Diosqa israelitakuna ukhumanta qankunata ajllakusorqachej paypa qayllanpi kanaykichejpaj, chantá Dioswan Tinkukuna Toldopi ruwanaykichejta ruwaspa israelitakunata yanapanaykichejpaj. Chayqa qankunapaj pisichu?

¹⁰ Tata Diosqa qanta, chantá aylluykimanta levitakunata paypa qayllanpi kanaykichejta munarqa. Jinaqa imajtintaj qankuna sacerdote kaytapis munashankichejri?

¹¹ Qanmin, jinataj qanta qhatisojkuna ima Tata Diospa contranpi oqharikushankichej. Pitaj Aarón kasqa paypa contranta parlanaykichejpajri? nispa.

¹² Chantá Moisesqa Eliabpa churinkuna Datanta, Abiranta ima wajyachimorqa. Paykunatajrí Moisesta nerqanku: Mana jamusqaykuchu.

¹³ Qanpajqa pisichu, lechewan, abeja misk'iwan purishaj jallp'amanta orqhomuspa, kay ch'innejpi wañuchinawaykupaj pusamuwasqaykoqa? Kunantaj, qan kamachejniyku kayta munashanki.

¹⁴ Qanqa, maypichus lechewan, abeja misk'iwan purishan, kunankama chay jallp'aman manaraj chayachiwaykuchu. Nillataj jallp'ata, nitaj uva huertakunatapis qowaykuchu. Qanqa mana yuyayniyojkunata jina q'otiyayta munashawayku. Mana, mana jamusqaykuchu, nispa.

¹⁵ Chantá Moisés maytapuni phiñakorqa, Tata Diosmantaj nerqa: Tata Dios, ama jaywasqankuta jap'ikuychu. Noqaqa paykunamanta mana burrollankutapis qhechunichu, nitaj paykunata ima sajratapis ruwanichu, nispa.

¹⁶ Chantá Moisesqa Coreta nillarqataj: Q'aya tutamanta qan, chantá qanwan kajkuna ima Tata Diospa ñawpaqenman jamunkichej. Aaronpis chayllapitaj kanqa.

¹⁷ Sapa uj incienso q'oshñichinaykichejta apakamuspa, inciensota churankichej. Chantá Diosman jaywankichej. Jinallataj qan, chantá Aaronpis incienso q'oshñichina apamusqaykichejta 250 incienso q'oshñichinatawan khuska, Tata Diospa ñawpaqenman churankichej, nispa.

¹⁸ Chantá sapa ujninku incienso q'oshñichinankuta jap'ispa, ninata churaytawan, inciensota jich'arqanku. Jinaspataj, Dioswan Tinkukuna Toldo punkupi, Moisespa chantá Aaronpa qayllanpi sayarqanku.

¹⁹ Chaymantataj Coré, Dioswan Tinkukuna Toldo punkupi, Moisespa contranpi chantá Aaronpa contranpiwan tukuy israelitakunata tantachejtinkama, ujllata Tata Diospa jatun kayninpa lliphipiynin rikhurimorqa.

²⁰ Chaymantataj Tata Dios Moisesta, Aarontawan ima nerqa:

²¹ Kay runakunaj chawpinkumanta t'aqakuychej, imajtinchus kunanpacha paykunata tukuyninta wañuchisaj, nispa.

²² Chayta uyarispa, Moiseswan, Aaronwan pampakama k'umuykuspa, nerqanku: Diosniyku, tukuy runaman kawsayta qoj, uj runa juchallisqanraykuchu kay tukuy runaj contrankuta phiñakunki? nispa.

²³ Tata Diostaj Moisesta nerqa:

²⁴ Israelitakunata niy: Corejpata, Datanpata, chantá Abiranpata toldonkumanta t'aqakunankuta, nispa.

²⁵ Chantá Moisés sayarispa, israelitakunaj kurajninkukunawan khuska Datanwan, Abiranwan ima parlaj rerqa.

²⁶ Runakunatataj nerqa: Kay mana manchachikuyniyoj runakunaj jarankumanta t'aqakuychej. Amataj imankutapis llankhankichejchu, ama qankunapis paykunaj juchankurayku wañunaykichejpaj, nispa.

²⁷ Chayta Moisés nejtinkama, israelitakunaqa Coréj, chantá Datanpa, Abiranpa jarankumanta ima t'aqakorqanku. Datanwan, Abiranwantaj toldonku punkupi warminkuwan, wawankuwan ima kasharqanku.

²⁸ Chantá Moisés israelitakunata nerqa: Kay jinamanta yachankichej, kay imakunata ruwanaypaj Tata Dios noqata kachamuwasqanta. Noqaqa mana sapallaymantachu imatapis ruwarqani.

²⁹ Sichus kay runakuna, imaynatachus tukuy runapis wañunku, jinallatataj wañonqanku chayqa, chaypi yachankichej Tata Dios noqata mana kachamuwasqanta.

³⁰ Tata Diosrí kunan mana jayk'aj rikusqanchejta ruwanqa. Jallp'a kicharikuspa, kay runakunata tukuy imankutawan khuska oqoykonqa, kawsashajtaj jallp'aj sonqonman chinkaykonqanku. Chay jinamanta yachankichej kay runakuna Tata Diosta pisipaj qhawasqankuta, nispa.

³¹ Chantá Moisés parlayta tukusqantawan, chay runakunaj chakinku urapi ujllata jallp'a kicharikorqa.

³² Ajinata jallp'a kicharikuspa, Corewan sayashajkunata, tukuy aylluntinta, imankuchus karqa, chaytawan khuska, tukuyninkuta oqoykorqa.

³³ Paykunaqa kawsashajlla tukuy imankuwan khuska ukhu pachaman chinkaykorqanku, jallp'ataj wisq'aykukorqa. Ajinata paykunaqa israelitakunaj chawpinkumanta chinkachisqa karqanku.

³⁴ Chay runakunata qhaparejta uyarispataj, tukuy israelitakuna qhaparispa, ayqerqanku: Pajtataj noqanchejtawan jallp'a oqoykuwasunman ari, nispa.

³⁵ Chay jawa Tata Diosqa ninata kachaykamullarqataj. Chay ninataj, inciensota q'oshñichisharqanku, chay 250 runakunata ruphaykuspa, wañurparicherqa.

³⁶ 36 (17.1) Chaymantataj Tata Dios Moisesta nerqa:

³⁷ 37 (17.2) Aaronpata churin Eleazarta kamachiy: Nina chawpimanta incienso q'oshñichinata orqhospa, chaypi kashaj ninata karuman wijch'uy, imajtinchus inciensota q'oshñichinaqa Tata Diospaj t'aqasqa kanku.

³⁸ 38 (17.3) Juchallispa wañojkunaj incienso q'oshñichinankoqa noqapaj t'aqasqa kanku, imajtinchus noqaj ñawpaqeypi inciensota q'oshñichinankupaj oqharerqanku. Chay q'oshñichinakunata takaspataj, sillp'a latata jina ruwanki, chaywantaj altarta mayt'unki. Ajinata ruwanki israelitakuna chay señalta rikuspa, ama juchalliyta munanankupaj, nispa.

³⁹ 39 (17.4) Chantá sacerdote Eleazar oqharerqa, ninawan ruphasqa wañojkunaj broncemanta inciensota q'oshñichinankuta. Jinaspataj, kamacherqa martillowan takaspa, altarta mayt'unapaj sillp'aman tukuchinankuta.

⁴⁰ 40 (17.5) Ajinata ruwarqa tukuy israelitakuna yuyarikunankupaj, mana pillapis Tata Diosman inciensota q'oshñichispa jaywayta atisqankuta, manachayqa Aaronpa ayllunmanta kajkunalla. Wajkuna chay jinallataj ruwankuman chayqa, Coré, chantá payta qhatejkuna imaynatachus wañorqanku, jinallatataj wañonqanku. Ajinata Eleazar Tata Dios Moisesnejta kamachisqanman jina, ruwarqa.

⁴¹ 41 (17.6) Q'ayantinrí tukuy israelitakunaqa Moisespaj, Aaronpaj ima rimarqanku: Qankunaqa Tata Diospa ayllunta wañurachishankichej, nispa.

⁴² 42 (17.7) Chantá tukuy israelitakuna Moisespa, chantá Aaronpa contranpi tantaykukuspa, Dioswan Tinkukuna Toldoman rerqanku. Chantá chay ratopacha phuyu Dioswan Tinkukuna Toldota p'ampaykorqa, Tata Diospa jatun kayninpa lliphipiynintaj rikhurerqapacha.

⁴³ 43 (17.8) Chantá Moiseswan, Aaronwan ima Dioswan Tinkukuna Toldoman qayllaykorqanku.

⁴⁴ 44 (17.9) Tata Diostaj Moisesta nerqa:

⁴⁵ 45 (17.10) T'aqakuychej chay runakunaj chawpinkumanta, noqataj uj ñawi ch'irmiypi paykunata chinkarparichisaj, nispa. Jinapis Moiseswan Aaronwan ima qonqorikuspa, pampakama k'umuykukorqanku.

⁴⁶ 46 (17.11) Chantá Moisés Aaronta nerqa: Incienso q'oshñichinaykita apamuspa, altarmanta ninata churay, patanmantaj inciensota jich'aykuy. Chantá runakuna kashanku, chayman usqhayta rispa, Tata Dios juchallisqankuta pampachananta mañampuy. Tata Dios sinch'ita phiñakusqanrayku millay onqoy runata wañuchiyta qallarinña, nispa.

⁴⁷ 47 (17.12) Chantá Aarón, Moisespa kamachisqanman jina, incienso q'oshñichinanta oqharikuspa, chayman inciensota jich'arqa. Jinaspataj, maypichus runakuna tantasqa kasharqanku, chayman usqhayta rerqa. Chantá paykunarayku Diosmanta mañaporqa juchallisqankuta pampachananta. Chaypajqa Tata Dios millay onqoyta apachimusqanqa runata wañuchisharqaña.

⁴⁸ 48 (17.13) Chantá Aaronqa wañusqakunaj, chantá kawsashajkunaj chawpinkupi sayaykorqa, millay onqoytaj kikinpi sayarqa.

⁴⁹ 49 (17.14) Chay p'unchayqa 14.700 runakuna wañorqankuña. Corewan khuska wañojkunaqa wajlla karqa.

⁵⁰ 50 (17.15) Chantá chay millay onqoy sayajtinkama, Aaronqa Dioswan Tinkukuna Toldo punkuman kutirerqa, maypichus Moisés kasharqa, chayman.