Números 13 - DIOSPA QHELQACHISQ

Canaán suyuta qhawaj rinku

¹ Tata Dios Moiseswan parlaspa, nillarqataj:

² Canaán suyuta qhawamunankupaj wakinta kachay, sapa jatun ayllumanta uj kamachejta, imaraykuchus chay suyuta israelitakunaman qonay kashan, nispa.

³ Chantá Moisesqa Tata Diospa kamachisqanman jina, Parán nisqa ch'inmanta qhawajkunata kacharqa. Tukuy kachasqakunaqa israelitakuna ukhupi kamachejkuna karqanku.

⁴ Kaykuna karqanku: Rubén jatun ayllumanta Zacurpata churin Samúa,

⁵ Simeón jatun ayllumantaqa Joríj churin Safat karqa,

⁶ Judá jatun ayllumanta Yefunej churin Caleb,

⁷ Isacar jatun ayllumantataj Joséj churin Igal,

⁸ Efraín jatun ayllumantataj Nunpata churin Oseas,

⁹ Benjamín jatun ayllumantarí Rafúj churin Palti karqa.

¹⁰ Jinallataj Zabulón jatun ayllumantaqa Sodij churin Gadiel karqa,

¹¹ Joséj ayllunmantataj Susij churin Gadi, Payqa Manasés jatun ayllumanta karqa.

¹² Dan jatun ayllumantataj Gemalij churin Amiel karqa.

¹³ Aser jatun ayllumantaqa Micaelpata churin Setur,

¹⁴ Neftalí jatun ayllumantataj Vapsij churin Najebí,

¹⁵ Gad jatun ayllumantatajrí Maquij churin Geuel karqa.

¹⁶ Paykunata Moisesqa Canaán jallp'ata qhawamunankupaj kacharqa. Moisestaj Nunpa churin Oseastarí “Josué”, nispa suticharqa.

¹⁷ Moisés paykunata Canaán suyuta qhawamunankupaj kachashaspa, nerqa: Kaymanta Neguevman rispa, orqokunanejta rinkichej.

¹⁸ Chantá sumajta qhawankichej imaynachus chay jallp'a kasqanta. Qhawallankichejtaj chaypi tiyakoj runakuna kallpararachus chayrí manachus kanku, chaytawan. Jinallataj ashkhachus chayrí pisillachus kanku, chaytapis qhawallankichejtaj.

¹⁹ Chantá llajtanku perqawan muyurisqachus, manachus chaytapis qhawallankichejtaj. Jallp'apis sumajchus manachus, chayta qhawallankichejtaj.

²⁰ Qhawallankichejtaj sumajta poqoj jallp'achus manachus kasqanta, sach'ayojchus manachus kasqantawan. Ama manchachikuychejchu, chay jallp'api imachus poqon, chaymantapis uj chhikata apamuychej, nispa. Chay karqa mishkha uva poqoykushajtin, chaypacha.

²¹ Jinataj chunka iskayniyoj qhawaj rejkunaqa jallp'ata qhawarqanku, Zin nisqa ch'innejmanta qallarispa, Jamat llajtaman yaykunamanta Rejob llajtakama.

²² Chaymanta Neguevnejta rispa, Hebronkama chayarqanku. Chaypi Ajimán, Sesay, Talmay ima tiyakorqanku. Paykunaqa Anacpa mirayninmanta karqanku. Hebrón llajtaqa Egiptopi Soán llajtamanta qanchis wata ñawpajta sayarichisqa kasqa.

²³ Jinallataj Hebronmanta rispa, Escol vallekama chayarqanku, chaypitaj uva sach'aj uj yuranta chhullchuyojta k'utorqanku. Chaytataj k'aspiman warkhuykuspa, iskay ukhu wantuspa aparqanku. Jinallataj granadata, higotawan pallaspa, apallarqankutaj.

²⁴ Israelitakunaqa chay valleta “Escol”, nispa suticharqanku, chaynejmanta uj uva chhullchuta k'utusqankurayku.

²⁵ Chantá jallp'ata tawa chunka p'unchaypi qhawayta tukuytawan, kachakunaqa

²⁶ Parán nisqa ch'innejpi Cadesman kutimporqanku. Chaypi Moisés, Aarón, chantá tukuy israelitakuna ima suyasharqanku. Chantá kachasqakunaqa imatachus rikusqankuta paykunaman willarqanku. Chay jallp'amanta apasqanku poqoytapis rikuchillarqankutaj.

²⁷ Chaymantataj Moisesta nerqanku: Noqaykoqa maymanchus kachawasqayku jallp'aman chayarqayku. Chay jallp'apeqa cheqapuni lechewan, abeja misk'iwan ima yaku jina purishan. Rikuychej, má. Kay jinata chay jallp'api poqoj kasqa.

²⁸ Chaywanpis chaypi tiyakoj runakunaqa manchay kallpayoj kasqanku. Llajtankukunapis jatuchachaj, sumaj perqawan muyurichisqa kasqa. Chay jawa jatunkaray runa Anacpata churinkunatapis rikullarqaykutaj.

²⁹ Néguev cheqanejpi amalecitakuna tiyashanku. Orqonejpitaj jititakuna, jebuseokuna, amorreokuna ima tiyakushanku. Mama qocha chaynejpi, Jordán mayu kantupitaj, cananeokuna tiyakushanku, nispa.

³⁰ Chantá israelitakuna thutuyta qallarerqanku, Calebtaj Moisespa ñawpaqenpi kashaj runata ch'inyachispa, nerqa: Rispa, chay jallp'ata jap'imunachej. Noqanchejqa paykunata atipasunchej, nispa.

³¹ Calebwan khuska rejkunatajrí kuticherqanku: Mana. Mana chay runakunawan maqanakuyta atisunmanchu. Paykunaqa noqanchejmanta nisqaqa aswan kallpayoj kanku, nispa.

³² Wakinkunataj jallp'ata qhawamusqankumanta mana maychus kajtachu israelitakunaman willarqanku: Qhawamorqayku chay jallp'aqa runa mikhu jallp'a kasqa. Chaypi tiyakojkunataj manchay jatuchaj runakuna kasqanku.

³³ Chaypi jatunkaray runakunata rikullarqaykutaj, paykunaqa Anacpata churinkuna kasqanku. Noqayku paykunaj qayllankupi phinki phinki jina juch'uysitu karqayku. Paykunapis jinallatataj noqaykuta qhawawarqayku, nispa.