Nehemías 12 - DIOSPA QHELQACHISQ

Sacerdotekunawan levitakunawan

¹ Kaykuna kanku sacerdotekunawan levitakunawan kutimpojkuna, pikunachus Salatielpa churin Zorobabelwan, Josuewan ima kutimpojkuna: Seraías, Jeremías, Esdras,

² Amarías, Maluc, Jatús,

³ Secanías, Rejún, Meremot,

⁴ Iddo, Gineto, Abías,

⁵ Mijamín, Madías, Bilgá,

⁶ Semaías, Joyarib, Jedaías,

⁷ Salú, Amoc, Hilcías, Jedaías ima. Chaykuna karqanku sacerdotekunajpa kurajninkukuna, jinataj ayllunku ima Josuéj p'unchayninpi.

⁸ Levitakunaqa kaykuna karqanku: Josué, Binúi, Cadmiel, Serebías, Judá, Matanías ima. Paykunaqa Diospa Templonpi yupaychaspa takichinankupaj churasqa karqanku.

⁹ Bacbuquiaswan, Uniwan chantá masinkunawan ima, chimpankumanta takishaspa kutichejkuna karqanku.

¹⁰ Josueqa Joyacinpa tatan karqa, Joyacintaj Eliasibpata, Eliasibtaj Joyadajpata,

¹¹ Joyadaqa Jonatanpata tatan, Jonatantaj Jadúaj tatan.

¹² Joyacín kuraj kaj sacerdote kashajtin, ayllukunapi kamachejkuna kaykuna karqanku: Seraiaspa ayllunmantaqa Meraías karqa, Jeremiaspamanta Jananías karqa,

¹³ Esdraspamanta Mesulán, Amariaspamanta Johanán,

¹⁴ Melicujpamanta Jonatán, Sebaniaspamanta José,

¹⁵ Jarinpamanta Adna, Merayotpamanta Jelcay,

¹⁶ Iddojmanta Zacarías, Ginetonpamanta Mesulán,

¹⁷ Abiaspamanta Zicri, Miniaminpamanta Moadiaspamantawan Piltay,

¹⁸ Bilgajpamanta Samúa, Semaiaspamanta Jonatán,

¹⁹ Joyaribpamanta Matenay, Jedaiaspamanta Uzi,

²⁰ Salaypamanta Calay, Amocpamanta Eber,

²¹ Hilciaspamanta Jasabías, jinataj Jedaiaspamanta Natanael ima.

²² Eliasib, Joyadá, Johanán, jinataj Jadúa ujmanta uj kuraj kaj sacerdote kashajtinku, chaymantapacha Persiapi kuraj kamachej Daríoj kamachinankama levitakunaqa, jinallataj sacerdotekunapis sapa aylloj kurajninkuna jina qhelqasqa karqanku.

²³ Leví jatun ayllumanta kajkuna sapa wasi ayllumanta kamachejkunaj sutinku qhelqasqa karqanku, Eliasibpa churin Johananpa p'unchayninkamalla.

²⁴ Levitakunajpa kurajninkukuna kaykuna karqanku: Jasabías, Serebías, Josué, Binúi, Cadmiel ima. Paykunaqa chimpantinpura takerqanku Diosta yupaychaspa, jinataj pachis nispa, ujtaj ujtaj takerqanku, Diospa kamachin David kamachisqanman jina.

²⁵ Punkuta qhawajkuna kaykuna karqanku: Matanías, Bacbuquías, Abdías, Mesulán, Talmón, Acub ima.

²⁶ Chaykunaqa kawsarqanku Josadacpa allchhin Josuejpa churin Joyacinpa p'unchayninpi, jinataj kamachej Nehemiaspa, chantá sacerdote yachachej Esdraspa p'unchayninpi ima.

Perqa oqharisqankuta Diosman jaywapunku

²⁷ Jerusalén perqata Diosman jaywapuna p'unchay chayamojtinkama, tukuynejmanta levitakunata wajyacherqanku. Chantá paykunata Jerusalenman pusarqanku llajtaj muyuynin jatun perqata Diosman jaywanankupaj, kusiywan yupaychana takiykunata takispa, platillokunata, arpakunata, lirakunata ima tocarispa.

²⁸ Takejkuna levitakunataj Jerusalén muyuynejmanta Netofa llajtamanta,

²⁹ Gilgal llajtamanta, Gebamanta, jinataj Azmavetmanta Jerusalén llajtaman rerqanku. Chay takejkunaqa Jerusalén llajta qayllapi wasita ruwarakusqanku.

³⁰ Chaypacha levitakunaqa, jinataj sacerdotekunapis llimphuchakorqanku Diospa ñawpaqenpi llimphupaj qhawasqa kanankupaj. Chaymantataj tukuy runatapis llimphuchachillarqankutaj, llajtaj punkunkunata, perqantinta ima.

³¹ Chantá noqa Nehemiasqa Judá ayllumanta kamachejkunata perqa pataman wicharicherqani. Chay takejkunata iskay t'aqaman t'aqarqani. Chay ujnin kaj t'aqaqa perqa patanta pañanejman rerqa, Q'opa Wijch'una punku nisqakama.

³² Chay takejkunaj qhepankutataj Osaiaswan, Judamanta khuskan kamachejkunawan ima risharqanku.

³³ Paykunawan rillarqankutaj: Azarías, Esdras, Mesulán,

³⁴ Judá, Benjamín, Semaías, Jeremías ima.

³⁵ Sacerdotekunamanta kajkunaqa cornetata tocaspa qhaterqanku. Chaykunamanta ujnin karqa Jonatanpa churin Zacarías, paypa ñawpa tatankunataj karqanku: Semaías, Matanías, Micaías, Zacur, jinataj Asaf.

³⁶ Chay jawa ayllunkumanta karqanku: Semaías, Azarael, Milalay, Guilalay, May, Natanael, Judá, Jananí ima. Chaykunaqa Diospa kamachin Davidpa ruwachisqan tocanakunata tocaspa risharqanku. Paykunaj ñawpaqenkutataj yachachej Esdras risharqa.

³⁷ Pujyu punku nisqa chaynejman chayaspa, Davidpa Llajtan nisqa chaynejtataj perqaj patillanta wicharerqanku. Chantá Davidpa kamachinan wasi chaynejta pasaspa inti llojsimuynejpi Yaku punku nisqa, chaykama chayarqanku.

³⁸ Takejkunamanta iskay kaj t'aqataj lloq'enejman rerqanku. Noqatajrí chay takejkunaj qhepanta perqa patanta rerqani. Tukuy runamanta khuskanninwan Hornos torre nisqamantapacha chay Ancho nisqa perqakama rerqayku.

³⁹ Jinallataj Efrainpa punkunta, chantá Jesanaj punkunnejta, chaymantataj Challwa punku nisqanejta, Jananel torrenejta, jinataj Pachaj torren nisqanejta, Oveja punku nisqakama chayarqayku. Sayarqaykutaj Qhawaj Soldadokunaj punkun nisqapi.

⁴⁰ Chaymantataj iskaynin takejkunamanta t'aqa Diospa Templonman chayaspa, maypichus sayanankupi chaypi sayarqani. Noqapis chantá kamachejkunamanta khuskanninkuwan jinallatataj ruwarqayku.

⁴¹ Cornetakunata waqachej sacerdotekuna kaykuna karqanku: Eliaquín, Maseías, Miniamín, Micaías, Elioguenay, Zacarías, Jananías,

⁴² Maseías, Semaías, Eleazar, Uzi, Johanán, Malquías, Elam, Ezer ima. Takejkunataj tukuyninku ujllapi takerqanku, Israiastaj paykunata takichisharqa.

⁴³ Chay p'unchaypi ashkha uywata ñak'aspa Diosman jaywarqanku, runakunataj mayta kusikorqanku Dios paykunata mayta kusichisqanrayku. Warmikunapis, wawakunapis sinch'ita kusikullarqankutaj. Chaypacha Jerusalenpi kusiywan ch'ajwasqankoqa karumantapacha uyarikorqa.

Sacerdotekunaman levitakunamanwan mikhunankupaj qonku

⁴⁴ Chantá chaypi kajkunamanta waqaychajkunata churarqayku. Paykunaqa qolqeta, ñawpaj kaj poqoykunata, sapa chunkamanta ujnin t'aqasqata ima Diospa kamachisqanman jina jallch'ananku karqa. Chay tukuyta sapa llajtamanta chayachimorqanku sacerdotekunapaj, levitakunapajwan ima, imaraykuchus Judamanta kajkunaqa kusisqa karqanku sacerdotekuna, levitakuna ima ruwanankuta junt'asqankumanta.

⁴⁵ Sacerdotekunawan levitakunawan chantá takejkunawan, punku qhawajkunawan ima Diospa kamachinpi ruwanankuta junt'arqanku, jinataj chay llimphuchakuna nisqatawan ruwarqanku. Chaytaqa ruwarqanku ñawpa kuraj kamachejkuna Davidwan, churin Salomonwan ima kamachisqankuman jina.

⁴⁶ Unaymantapacha Davidpa, chantá Asafpa p'unchayninmantapacha churasqa karqanku Diosta yupaychaspa takichejkuna, chantá Diosman pachis nispa takichejkuna ima.

⁴⁷ Ajinaqa Zorobabel kamachishajtin, jinataj Nehemías kamachishajtinpis, tukuynin israelitakuna sapa p'unchay mikhunata apamoj kanku takejkunapaj, punku qhawajkunapaj, levitakunapajwan. Levitakunapis jap'isqankumanta wakinta t'aqaspa, qollajtaj kanku Aaronpa mirayninmanta kaj sacerdotekunamanpis.