Miqueas 5 - DIOSPA QHELQACHISQ

Belenmanta uj kamachej rikhurenqa

¹ 1 (4.14) Jerusalén, wakichikuy maqanakunaykipaj, imaraykuchus awqaykikuna muyuykusunkuña, Israelta kamachejtataj uj varawan uyanpi q'ajchanqanku.

² 2 (1) Qantajrí Efratamanta Belén llajta, Judá jap'iypi kaj llajtakunamanta aswan juch'uy kanki. Chaywanpis qanmantamin Israelta kamachej llojsenqa. Paypa miraynenqa wiñay wiñaymantaña.

³ 3 (2) Tata Diosqa ayllunta saqenqa awqanpa makinpi kajta, chay onqoj warmi wawanta paqarichikunankama. Chaypacha waj suyukunaman mana munashajta apasqa kajkuna Israel suyuman kutimponqanku.

⁴ 4 (3) Chay kamachejtaj Israel ayllunta michinanpaj jatarenqa Tata Diospa atiyninwan, jatun kayninwantaj. Jinapi paykuna allinpi kawsanqanku, imaraykuchus Tata Dios jatunchasqapuni kanqa kay pachaj k'uchunkunakama.

⁵ 5 (4) Paymin allinpi kawsanata Israelman apamonqa. Maypachachus asiriokuna suyunchejman junt'aykamonqanku, kamachina wasinchejmanpis yaykuykamonqanku chaypacha, noqanchej paykunaj contrankupi maqanakunankupaj qanchis kamachejkunata, pusaj kurajkunatawan kachasunchej.

⁶ 6 (5) Paykunataj Nimrodpa suyun Asiriata espadawan kamachenqanku. Chay kamachejkunaqa, pikunachus suyunchejpa mojonninta pasaykamuspa jallp'anchejman junt'aykamorqanku, chaykunamanta kacharichiwasunchej.

⁷ 7 (6) Chaypacha Jacobpa ayllunmanta puchojkuna waj suyukunaj chawpinkupi kanqanku, Tata Diospa apachimusqan chhulla jina, chayrí imaynatachus qhora pataman paran, ajina. Parawan, chhullawan chayamun mana runaj munasqanman jinachu.

⁸ 8 (7) Chaypacha Jacobpa ayllunmanta puchojkunaqa ashkha suyukunaj chawpinkupi kanqanku, imaynatachus león k'ita animalkuna ukhupi purin, ajinata. Imaynatachus uña león ovejakunaj chawpinkuta pasaj jinalla t'ajllaspa wañurachin, manataj ujtapis saqenchu, ajina Jacobpa ayllunmanta puchojkuna kanqanku waj suyukuna ukhupi.

⁹ 9 (8) Ajinata qan, Tata Dios, awqaykikunaman phinkiykunki, jinaspataj, wañurachinki contraykipi tukuy kajkunata.

¹⁰ 10 (9) Tata Dios awqankunata nillantaj: Chay p'unchaypi caballoykikunata wañurachisaj, maqanakupaj carretaykikunatapis phiriykusaj.

¹¹ 11 (10) Llajtaykikunata raqayllamanña tukuchisaj, tukuy sumaj jark'achasqa wasiykikunatapis urmarachisaj.

¹² 12 (11) Jinallataj layqaykikunata chinkachisaj, manañataj watuyta yachajpis kanqañachu.

¹³ 13 (12) Noqaqa lantiykikunata phirillasajtaj, ch'eqosqa yupaychana rumiykitapis. Ajinamanta manaña jayk'ajpis makiykej ruwasqan dioskunaman k'umuykuspa yupaychankichu.

¹⁴ 14 (13) T'irallasajtaj yupaychana sach'aykikunata, llajtaykikunatataj tukuyninta phirisaj.

¹⁵ 15 (14) Ajinamanta sinch'ita phiñakuspa, mana kasuwaj suyukunamanta vengakusaj.