Miqueas 3 - DIOSPA QHELQACHISQ

Mana allinta kamachejkuna

¹ Kunan uyariychej, Israelta kamachejkuna, jinataj kurajkuna: Manachu qankuna yachanaykichej kashan imachus justicia kasqanta?

² Chaywanpis qankunaqa allin kajta chejninkichej, mana allin kajtataj munakunkichej. Qankuna runaj qaranta ch'uskinkichej, q'ara tullullatataj saqenkichej.

³ Aylluytaqa kawsashajllata oqoykunkichej. Qaranta ch'uskinkichej, tulluntapis p'akirankichej. Mankaman churanapaj aychata jina qhawankichej.

⁴ Chaywanpis uj p'unchay qankuna Tata Diosta qhaparikunkichej, paytajrí mana uyarisonqachejchu. Chaypacha qankunamanta pay pakakonqa, millayta ruwasqaykichejrayku.

⁵ Israel aylloyqa pantay ñanllatapuni rishan, sut'inchajkunawan q'otiyachikusqanrayku. Pikunachus paykunata mikhuchejkunaman chay sut'inchajkuna ninku: Allillanpi tiyakusunchej, nispa. Pikunachus mana imatapis qonkuchu chaykunatarí, maqaj sayaykunku.

⁶ Chayrayku tutapi Diosmanta sut'inchana tukukonqa, laqhapi Diosmanta sut'inchayta jap'inapis tukukapullanqataj. Inteqa chay sut'inchajkunapaj pakakonqa, p'unchaypis laqhayaykapullanqataj.

⁷ Mosqoypi jina rikojkuna, yachajkunapis ima manchay p'enqaypi rikhurenqanku, imaraykuchus Dios mana imatapis mañakusqankuman kutichenqachu.

⁸ Noqatatajrí, Tata Diospa Espíritun atiywan junt'achiwan, justiciawan, kallpawantaj, Israelta uyanpi nipunaypaj mana kasukoj, juchayojtaj kasqanta.

⁹ Kunan kayta uyariychej, Israelta kamachejkuna, kurajkunapis, pikunachus cheqan kajta chejnejkuna, justiciatapis q'ewejkuna.

¹⁰ Qankuna runata wañuchispa, mana allin kajta ruwaspataj, Sión orqopi Jerusalén llajtata sayarichinkichej.

¹¹ Llajtapi justiciata ruwajkuna, qankuna rantichikunkichej. Sacerdotekuna, qankunapis qolqeraykulla yachachinkichej, sut'inchajkunapis qolqeraykullataj imatapis willankichej. Chantá mayta parlankichej Tata Diospi atinikusqaykichejmanta: Tata Dios noqanchejwan kashan, manataj ni ima mana allin kajpis qhatiriwasunchu, nispa.

¹² Chayrayku juchaykichejrayku, Sión orqopi Jerusalén llajta barbechoman tukonqa, raqayllamantaj. Maypichus Diospa Templon kashan, chay orqotapis ch'umilla p'ampaykonqa.