San Mateo 3 - DIOSPA QHELQACHISQ

Bautizaj Juan qhespichejmanta willaran

¹ Chaymanta unaynejman Bautizaj Juan rikhurimuspa, Judeaj ch'innejpi qhespichejmanta willarayta qallarerqa.

² Paytaj nerqa: Diosman kutirikuychej, imaraykuchus janaj pachamanta Dios kay pachapi kamachinanpaj wakichisqaña kashan, nispa.

³ Diosmanta ñawpa sut'inchaj Isaías kay Juanmanta ajinata nisqa: Ch'innejpi uj runaj qhaparisqan uyarikun: Tata Diospaj ñanta pichaychej, purinantataj cheqanyachiychej, nispa.

⁴ Juanqa camello millmamanta ruwasqa p'achawan p'achallisqa karqa, qara chumpiwantaj chumpiykusqa. Paytaj phinki phinkikunata, lachiwana misk'itawan ima mikhoj.

⁵ Qhespichejmanta Juan willarajtin, ashkha runakuna payta uyarej jamoj kanku Jerusalenmanta, Judeamanta, tukuy Jordán mayoj muyuyninmanta ima.

⁶ Chay runakunataj juchankuta rimarejtinku, Juanqa Jordán mayupi paykunata bautizaj.

⁷ Ashkha fariseokuna, saduceokunawan ima Juan bautizasqanta rikoj jamullarqankutaj. Juantajrí paykunata rikuspa, nerqa: Katarikunaj miraynin, pitaj nisorqachej Diospa jamoj, k'araj phiñakuyninmanta ayqenaykichejtari?

⁸ Allinta puriychej ari. Ajinata juchallisqaykichejmanta Diosman kutirikusqaykichejta sut'ita rikuchinkichej.

⁹ Amataj niychejchu: Noqaykoqa qhespichisqa kasqayku Abrahampa miraynin kasqaykurayku, nispa. Noqa sut'ita niykichej: Diosqa kay rumikunamantapis Abrahampaj wawakunata rikhurichiyta atinman.

¹⁰ Jachaqa ñapis wakichisqaña kashan sach'akunata saphinmanta k'utunanpaj. Chayrayku mana allinta poqoj tukuy sach'akunaqa k'utusqa kanqanku, ninamantaj enqhaykusqa.

¹¹ Noqaqa yakuwan bautizaykichej, Diosman kutirikusqaykichejmanta yachayta qospa. Qhepayta jamojrí noqamanta aswan atiyniyoj, noqataj mana paypa wata runan kanaypaj jinallapischu kani. Payqa Santo Espirituwan, ninawan ima bautizasonqachej.

¹² Jorcapis makinpiña kashan, erapi trigota wayrachinanpaj. Chantá pirwaman trigota jallch'anqa, pajatatajrí mana thasnukoj ninaman enqhaykonqa. Ajinata nispa, Juanqa runakunaman willararqa.

Jesús bautizachikun

¹³ Chantá Jesús Galileamanta Jordán mayuman rerqa, Juanwan bautizachikoj.

¹⁴ Juantajrí ni imarayku Jesusta bautizayta munaspa, nerqa: Noqachá qanwan bautizachikunay kanman. Imaraykutaj qan noqawan bautizachikoj jamunkiri? nispa.

¹⁵ Jesustajrí kuticherqa: Saqeway kunan bautizachikojta, imaraykuchus ajinata Diospa tukuy kamachisqanta junt'asunchej, nispa. Chantá Juanqa Jesusta bautizarqa.

¹⁶ Jesús bautizachikuytawan yakumanta llojsishajtin, janajqa kicharikorqa. Jesustaj Diospa Espiritunta urpi jina paypa patanman urayk'amushajta rikorqa.

¹⁷ Jinallapitaj janaj pachamanta Dios nimorqa: Qanmin munasqa Churiy kanki, qanwantaj sonqo junt'asqa kani, nispa.