San Mateo 28 - DIOSPA QHELQACHISQ

Jesús kawsarimpun

¹ Samarina p'unchay pasayta, semana qallariy sut'iyamuyta María Magdalena, chay uj Mariawan ima aya p'ampanata watukoj rerqanku.

² Kaymanta jinataj jallp'aqa ikhakorqa, imaraykuchus Tukuyta Kamachej Diospa uj angelnin janaj pachamanta urayk'amorqa. Aya p'ampanata wisq'aj rumita tijraspataj, chay patapi tiyaykukorqa.

³ Chay angelpa rijch'aynenqa lliuj lliujpa k'anchaynin jina karqa, p'achantaj rit'i jina yuraj.

⁴ Qhawaj soldadokunataj chayta rikuspa, manchariywan kharkatiterqanku, wañusqa jinataj wijch'ukorqanku.

⁵ Jinapi angelqa chay warmikunata nerqa: Ama manchachikuychejchu. Noqa yachani Jesusta mask'ashasqaykichejta, pichus cruzman chakatasqa karqa, chayta, icharí?

⁶ Payqa mana kaypiñachu, manachayqa nisqanman jina kawsarimpunña. Jamuspa, qhawaykuychej maypichus ayan churasqa karqa, chayta.

⁷ Chantá usqhayta rispa, Jesuspa yachachisqankunaman willamuychej: Jesusqa wañusqakuna ukhumanta kawsarimpun, ñawpaqeykichejtataj Galileaman rishan. Chaypi nisqanman jina payta rikunkichej, nispa. Chaytaqa noqa ninasuykichej karqa.

⁸ Jinapi chay warmikuna chay aya p'ampanamanta llojsiytawan, mancha manchalla, chaywanpis manchay kusisqa, usqhayta rerqanku Jesuspa yachachisqankunaman willamoj.

⁹ Jinata rishajtinku, Jesús ujllata paykunaman rikhurerqa, paykunatataj napaykorqa. Paykunataj Jesusman qayllaykuytawan, qonqoriykukuspa chakinta ojllaykorqanku, paytataj yupaycharqanku.

¹⁰ Chantá Jesús paykunata nerqa: Ama manchachikuychejchu, manachayqa rispa, wawqeykunaman willamuychej Galileaman rinankupaj. Chaypi rikuwanqanku, nispa.

Soldadokunaman lluk'iykunku

¹¹ Warmikuna rinankukama, qhawaj soldadokunamanta wakinkuna llajtaman kutirispa, chay tukuy imamanta kuraj sacerdotekunaman willamorqanku.

¹² Kuraj sacerdotekunataj, kurajkunawan tantaykukuspa, yachachinakorqanku, soldadokunaman ashkha qolqeta lluk'iykunankupaj.

¹³ Chantá paykunata nerqanku: Qankuna niychej: Noqayku puñunaykukama yachachisqankuna tuta jamuspa, Jesuspa ayanta suwasqanku, nispa.

¹⁴ Kamachej chayta yachajtinrí, noqayku paywan parlasqayku, ama imanasunaykichejpaj, nispa.

¹⁵ Chantá soldadokuna qolqeta jap'iytawan, kikinta ruwarqanku, yachachisqa kasqankuman jina. Ajinaqa chay llullakusqanku kunan p'unchaykama judiokuna ukhupi willakun.

Jesusqa yachachisqankunata kamachin imatachus ruwanankuta

¹⁶ Chantá Jesuspa chunka ujniyoj yachachisqankuna Galileaman rerqanku, maymanchus Jesús kamachisqa rinankuta, chay orqoman.

¹⁷ Paykunataj Jesusta rikuspa, payta yupaycharqanku. Wakinkunarí iskayrayasharqanku.

¹⁸ Chantá Jesús qayllaykuspa, paykunata nerqa: Tata Diosneyqa kamachinapaj tukuy atiyta qowan janaj pachapi, kay pachapipis.

¹⁹ Chayrayku qankuna rispa, tukuy suyupi runakunata yachachisqayman tukuchimuychej. Paykunatataj Tata Diospa, Churej, chantá Santo Espíritoj sutinpi bautizaychej.

²⁰ Chantá paykunaman yachachimuychej, imatachus noqa kamacherqaykichej, chayta, paykunapis kasunankupaj. Jinallataj yachaychej noqa qankunawan tuta p'unchay kanayta kay pacha tukukunankama, nispa.