San Mateo 26 - DIOSPA QHELQACHISQ

Jesusta wañuchinankupaj yachachinakunku

¹ Jesús chay tukuy imata yachachiyta tukuytawan, yachachisqankunata nerqa:

² Qankunaqa yachankichej iskay p'unchaymantawan Pascua raymi kananta. Chaypacha Runaj Churinta jap'enqanku cruzman chakataykunankupaj, nispa.

³ Chaypachallataj Caifás sutiyoj kuraj kaj sacerdotej pationpi kuraj sacerdotekuna, judiokunaj kurajninkukuna ima tantakorqanku.

⁴ Chaypitaj yachachinakorqanku imaynamantapis Jesusta q'otiyaspa jap'inankupaj, chantá wañuchinankupaj ima.

⁵ Jinapis ninakorqanku: Ama Pascua raymi p'unchaypeqa jap'ichinachu, imaraykuchus runa oqharikuspa, ch'ajwankuman, nispa.

Uj warmi sumaj q'apashaj jawinawan Jesuspa chakinta jawin

⁶ Chaykama Jesús Betania llajtapi kasharqa, Simonpa wasinpi, pichus ñawpajta llejti onqoyniyoj karqa, chaypapi.

⁷ Jesús mikhushajtintaj, uj warmi chayman yaykumorqa. Payqa sumaj q'apashaj nardo jawinata alabastro rumimanta juch'uy botellapi apamusharqa. Chay jawinataj manchay valorniyoj karqa. Chantá chay warmeqa jawinawan Jesuspa umanta jawiykorqa.

⁸ Jesuspa yachachisqankunatajrí chayta rikuytawan, phiñakuspa nerqanku: Imapajtaj kay warmi jinata chay sumaj q'apashaj jawinata usuchinri?

⁹ Chaytaqa pay ashkha qolqepi vendenman karqa, chay qolqewantaj wajchakunata yanapanman karqa, nispa.

¹⁰ Jesustajrí chayta uyarispa, paykunata nerqa: Imaraykutaj kay warmipaj rimashankichejri? Chayta noqawan ruwaspaqa, allinta ruwan.

¹¹ Wajchakunaqa qankuna ukhupi kallanqankupuni. Noqarí manaña qankunawan unaytachu kasaj.

¹² Payqa kay sumaj q'apashaj jawinawan ukhuyta jawiwaspa, p'ampakunay p'unchaypaj wakichishawan.

¹³ Kayta sut'ita niykichej: Mayllapipis noqamanta kay sumaj willay willakojtin, kay warmej ruwasqantapis willallanqankutaj, paymanta runa yuyarikunankupaj, nispa.

Judasqa Jesusta jap'ichinanta nin

¹⁴ Chaypacha Jesuspa chunka iskayniyoj yachachisqankunamanta ujnin, Judas Iscariote sutiyoj kuraj sacerdotekunaman rerqa.

¹⁵ Nerqataj: Jesustachus jap'ichiykichejman chayqa, mashkhatataj pagawankichejmanri? nispa. Paykunataj nerqanku: Kinsa chunka qolqeta qosqayku, nispa.

¹⁶ Chaymantapachataj Judas mask'ayta qallarerqa imaynamantachus Jesusta jap'ichinanpaj.

Jesús Pascua mikhuyta mikhun

¹⁷ Mana Levadurayoj T'anta Mikhuna Raymi qallariy p'unchayta Jesuspa yachachisqankuna payman qayllaykuspa, taporqanku: Maypitaj Pascua mikhuyta wakichinaykuta munankiri? nispa.

¹⁸ Paytaj kuticherqa: Llajtaman yaykuychej, chay rejsisqanchej runaj wasinman rispataj, niychej: Yachachej Wiraqochiyku nisunki: Willarqayki, chay p'unchay chayamunña. Kunantaj wasiykipi Pascua mikhuyta yachachisqaykunawan khuska mikhusaj, nispa.

¹⁹ Yachachisqankunataj Jesuspa kamachisqanman jina, Pascua mikhuyta wakichimorqanku.

²⁰ Ch'isiyaykuytaña Jesusqa chay chunka iskayniyoj yachachisqankunawan mikhoj tiyaykorqa.

²¹ Mikhushajtinkutaj, Jesús nerqa: Kayta sut'ita niykichej: Qankunamanta ujniykichej wasanchawaspa jap'ichiwanqa, nispa.

²² Paykunataj ancha llakisqa, ujmanta uj tapuyta qallarerqanku: Wiraqochíy, chay wasanchasojqa mana noqachu kani, icharí? nispa.

²³ Jesustaj paykunaman kuticherqa: Pichus noqawan khuska kay chuwamanta mikhushan, chaymin jap'ichiwanqa.

²⁴ Kayta sut'ita niykichej: Runaj Churenqa wañunanpuni tiyan. Chaywanpis, ay, chay runamanta pichus payta wasanchaspa jap'ichin, chaymanta. Allin kanman karqa chay runapaj mana paqarinan, nispa.

²⁵ Chantá jap'ichinan karqa, chay Judasqa Jesusta taporqa: Yachachej Wiraqochi, noqachu kani? nispa. Jesustaj kuticherqa: Arí, qan kanki, nispa.

²⁶ Paykuna mikhushajtinku, Jesús t'antata oqharispa, Diosman pachis nerqa. Chantá chay t'antata partiytawan, yachachisqankunaman jaywaspa, nerqa: Jap'iychej, mikhuychejtaj. Kaymin ukhoyqa, nispa.

²⁷ Chantá copata oqharispa, Jesús ujtawan Diosman pachis nerqa. Paykunaman jaywaspataj, nerqa: Kaymanta tukuyniykichej ujyaychej.

²⁸ Kaymin yawarneyqa, chaywantaj Diosqa qankunawan mosoj tratota ruwan, chaytaj jich'asqa kanqa ashkha runaj juchanku pampachasqa kananpaj.

²⁹ Kayta sut'itapuni niykichej: Manaña ujtawan vinota ujyasajchu, Diospa kamachiyninpi kaspa, mosoj vinota qankunawan khuska ujyanaykama, nispa.

Jesusqa Pedro qhesachananta sut'inchan

³⁰ Chantá uj salmota takiytawan, Olivos orqoman rerqanku.

³¹ Chaypacha Jesús paykunata nerqa: Kunan ch'isi tukuyniykichej noqata saqerpariwankichej. Diospa Qhelqachisqanpi nin: Michejta wañuchisaj, ovejakunataj ch'eqeranqanku, nispa.

³² Chaywanpis wañusqamanta kawsarimpuspa, noqa ñawpaqeykichejta Galileaman risaj, nispa.

³³ Chantá Pedroqa Jesusta nerqa: Tukuyninku saqesojtinkupis, noqaqa manapuni jayk'ajpis saqerparisqaykichu, nispa.

³⁴ Jesustaj payta nerqa: Kayta sut'ita niyki: Kunan ch'isipacha, manaraj gallo waqashajtin, kinsa kutita ninki noqata mana rejsiwasqaykita, nispa.

³⁵ Pedrotajrí nillarqapuni: Qanwan wañunay kashajtinpis, manapuni nisajchu: Paytaqa mana rejsinichu, nispa. Chay ujkuna yachachisqakunapis kikillantataj nerqanku.

Jesús Getsemanipi Dioswan parlarikun

³⁶ Jesuswan, yachachisqankunawan Getsemaní sutiyoj cheqaman chayajtinku, pay nerqa: Kaypi tiyarikuychej, noqataj jaqayman rispa, Tata Diosniywan parlarikamusaj, nispa.

³⁷ Chantá Pedrota, Zebedeoj iskay churinkuna Santiagota, Juantawan ima aswan jaqaynejman pusarispa, Jesús sinch'i llakiywan ñak'ariyta qallarerqa.

³⁸ Chaypacha paykunata nerqa: Sonqoyqa llakiymanta manchay phutisqa kashan wañunaypaj jina. Qankuna kayllapi qhepakuychej, qhawaychejtaj ama puñuspalla, nispa.

³⁹ Aswan ñawpajman rispataj, Jesús pampakama k'umuykuytawan, Diosmanta mañakorqa: Tatáy, atikojtenqa, imatachus ñak'arinaymanta kacharichiway ari. Chaywanpis, ama noqaj munaynillay kachunchu, manachayqa qanpa munayniyki ruwasqa kachun, nispa.

⁴⁰ Chaymanta Jesús kutimuspa, chay kinsa yachachisqankunata puñurashajta tariparqa. Pedrotataj nerqa: Manachu uj phanillatapis mana puñuspalla noqawan kayta aterqankichej?

⁴¹ Rijch'arisqa kaychej, ama puñuspa Dioswan parlarikuychej, juchaman tanqasqa kaspa ama kasunaykichejpaj. Sut'ita niykichej: Qankunaqa sonqoykichejpi kasuyta munankichej. Chaywanpis ukhuykichejqa pisi kallpayoj, nispa.

⁴² Chantá Jesús ujtawan rispa, mañakullarqataj: Tatáy, ñak'arinaypuni kajtenqa, qanpa munayniyki ruwasqa kachun, nispa.

⁴³ Maypichus chay kinsa yachachisqankuna kasharqanku, chayman kutimuspataj, Jesús watejmanta paykunata puñushajta tariparqa, imaraykuchus paykuna puñuywan atichikuspa k'aywisharqanku.

⁴⁴ Jinapi paykunata saqespa, Diosmanta mañakoj kutillarqataj. Kinsa kaj mañakuyninpipis kikillantataj mañakorqa.

⁴⁵ Chaymanta kutimuspa, Jesús yachachisqankunata nerqa: Puñushallankichejrajchu? Samarikushankichejrajchu? Ñapis imachus kanan kashan, chay junt'akushanña. Runaj Churenqa juchasapakunaj makinpiña kashan.

⁴⁶ Jatariychej, jaku. Jap'ichiwajqa qayllapiña, nispa.

Jesusta presochanku

⁴⁷ Jesús parlashajtillanraj, Judas chayaykamorqa. Payqa Jesuspa chunka iskayniyoj yachachisqankunamanta ujnin kaj karqa. Jinallataj paywan khuska ashkha runakuna jamorqanku espadayoj, k'aspiyoj ima. Chay runakunata kuraj sacerdotekuna, llajtamanta kurajkuna ima kachamusqanku.

⁴⁸ Jesusta jap'ichej Judastaj chay presochajkunawan yachachinakusqaña imaynatachus Jesusta jap'ichinanta: Pitachari noqa much'aykusaj, chay kanqa. Payta jap'ispa, presota apankichej, nispa.

⁴⁹ Ajinataj Judasqa Jesusman qayllaykuspa, nerqa: Imaynalla Yachachej Wiraqochíy, nispa. Jinaspataj, uyanpi much'aykorqa.

⁵⁰ Chantá Jesús payta nerqa: Kawsaqe, ruwanaykitaqa ruwallayña, nispa. Jinapitaj Judaswan jamojkuna chimpaykuspa, Jesusta presocharqanku.

⁵¹ Chayllapi Jesuswan kajkunamanta ujnenqa espadanta sik'iytawan, wajtaspa kuraj kaj sacerdotej kamachinpa ninrinta qholurparerqa.

⁵² Jesustajrí nerqa: Espadaykita waqaychakapuy. Espadawan maqanakojkunaqa espadallawantaj wañuchisqa kanqanku.

⁵³ Manachu yachanki: Tataymantachus yanapanawanta mañakuyman chayqa, kunanpacha angelninkunamanta chunka iskayniyoj tropamanta astawan kachamuwanman?

⁵⁴ Ajinachus kanman chayqa, imaynamantataj Diospa Qhelqachisqan junt'akunmanri? nispa.

⁵⁵ Chantá Jesús chay runakunata taporqa: Suwata jinachu jap'iwaj jamunkichej, espadayoj, k'aspiyoj ima? Sapa p'unchay Temploj pationpi yachachishajtiy, imaraykutaj mana jap'iwarqankichejchuri?

⁵⁶ Chaywanpis kay jinata ruwashankichej, imaraykuchus Diosmanta sut'inchajkunaj nisqankoqa junt'akunan tiyan, nispa. Chantá tukuynin yachachisqankuna Jesusta sapallanta saqerparispa, ayqerikaporqanku.

Jesús Jatun Juntaj ñawpaqenpi

⁵⁷ Chantá Jesusta jap'ispa, presochajkunaqa payta pusarqanku kuraj kaj sacerdote Caifaspa wasinman, maypichus kuraj sacerdote, Diospa kamachisqanmanta yachachejkuna, kurajkuna ima tantasqa kasharqanku, chayman.

⁵⁸ Pedrotajrí karu qhepallanta Jesusta qhaterqa kuraj kaj sacerdotej wasinpa pationkama. Chayman yaykuspataj, Templota qhawaj soldadokunawan khuska tiyaykukorqa. Chaypi pay suyarqa imapichus chay tukuy ima tukukunanta yachananpaj.

⁵⁹ Chaykama kuraj sacerdotekuna, Jatun Juntamanta kajkunapiwan ima, llulla testigokunata mask'arqanku Jesusta ch'ataykunankupaj, jinamanta wañuchisqa kananpaj.

⁶⁰ Chaywanpis ni imatapis tarerqankuchu. Ashkha llulla testigokuna jamorqanku chaypis, mana Jesuspi ima juchatapis tarerqankuchu payta ch'ataykunankupaj jina. Qhepamantajrí iskay llulla testigokunawan rikhurimullarqankutaj.

⁶¹ Paykunataj nerqanku: Kay runata nejta uyarerqayku: Diospa Templonta urmachiyta atiyman, kinsa p'unchaypitaj ujtawan sayarichiyman, nispa.

⁶² Chaypacha kuraj kaj sacerdote sayarispa, Jesusta taporqa: Manachu imatapis kutichikunki? Imamantataj kaykuna ch'ataykusunkuri? nispa.

⁶³ Jesustajrí ch'inlla kakorqa. Chantá kuraj kaj sacerdoteqa Jesusta nerqa: Kawsashaj Diospa sutinpi niwayku: Qanchu Diospa kachamusqan Cristo kanki, Diospa Churin? nispa.

⁶⁴ Jesustaj kuticherqa: Arí, qan ninki. Astawanqa niykichej: Kunanmanta ñawpajman Runaj Churinta rikunkichej Tukuy Atiyniyoj Diospa pañanpi tiyashajta, jinallataj phuyu patapi janaj pachamanta jamushajta ima, nispa.

⁶⁵ Chayta uyariytawankama, kuraj kaj sacerdote patanchana p'achanta llik'irakuspa, nerqa: Kay runaqa Diospa contranpi millayta riman. Imapajñataj testigokunata munanchejri? Qankuna uyarinkichejña Diospa contranpi imaynatachus millayta rimasqanta.

⁶⁶ Kunanqa ima ninkichejtaj? nispa. Paykunataj kuticherqanku: Payqa juchayoj. Chayrayku wañuchisqa kanan tiyan, nispa.

⁶⁷ Chayta niytawantaj, paykuna Jesuspa uyanman thoqaykorqanku, laq'arqankutaj. Wajkunataj uyanpi sajmaspa,

⁶⁸ nerqanku: Yu Cristo, sut'inchawayku pichus sajmasusqanta, nispa.

Pedroqa Jesusta mana rejsejman tukun

⁶⁹ Pedro jawa patiopi tiyasqa kashajtin, uj sipas kamachi qayllaykuspa, nerqa: Qanpis Galilea llajtayoj Jesuswan purej kanki, nispa.

⁷⁰ Pedrorí tukuypa ñawpaqenpi nerqa: Mana jinachu, nitaj yachanichu imamantachus parlasqaykita, nispa.

⁷¹ Pedro punkuman qayllashajtintaj, waj sipas kamachiñataj payta rikuspa, chaypi kajkunata nerqa: Kaypis Nazaret llajtayoj Jesuswan kasharqa, nispa.

⁷² Pedrotajrí tiluspa, watejmanta nerqa: Mana chay runata rejsinichu, nispa.

⁷³ Uj chhikanmantawan, chaypi kashajkunañataj Pedroman qayllaykuspa, nerqanku: Qanqa paykunamantapuni kanki, imaraykuchus parlasqaykipi sut'i yachakun, nispa.

⁷⁴ Jinapi Pedroqa tiluspa, nerqa: Dios jasut'iwachun llullakushanichus chayqa. Manapuni chay runata rejsinichu, pichus kanpis, nispa. Chayta Pedro nisqantawankamataj, gallo waqarqa.

⁷⁵ Chantá Pedro yuyarikorqa Jesús kayta nisqanmanta: Manaraj gallo waqayta qallarishajtin, kinsa kutita ninki mana rejsiwasqaykita, nispa. Jawaman llojsispataj, Pedroqa sonqo nanayta waqarikorqa.