San Mateo 25 - DIOSPA QHELQACHISQ

Chunka sipaskunamanta rijch'anachina

¹ Jesús nillarqataj: Diospa janaj pacha kamachiynenqa casarakupi kaj chunka sipaskunaman rijch'akun. Paykunaqa lamparankuta oqharikuspa, casarakoj runata taripaj risqanku.

² Phishqa sipaskuna mana yuyayniyoj kasqanku, phishqataj yuyayniyoj.

³ Chay mana yuyayniyoj sipaskunaqa lamparankuta aceiteyojta apaspapis, mana astawan aceiteta apakusqankuchu.

⁴ Yuyayniyoj sipaskunarí, lamparankupi, yuritunkupi ima aceiteta apakusqanku.

⁵ Jinapi casarakoj mana usqhayta chayamojtin, tukuyninku puñuywan atipachikuspa, puñurparisqanku.

⁶ Chawpi tutata jina uj qhapariy uyarikusqa: Casarakoj chayamushanña, taripamuychej ari, nispa.

⁷ Tukuynin sipaskunataj jatariytawan, lamparankuta wakichisqanku.

⁸ Jinapi mana yuyayniyoj sipaskunaqa yuyayniyojkunata nisqanku: Uj chhika aceiteta qoriwayku ari, imaraykuchus lamparayku wañupushanña, nispa.

⁹ Yuyayniyojkunatajrí kutichisqanku: Mana qoriykumanchu, imaraykuchus noqaykupaj, qankunapajpis pisiyanman. Aswanpis qhatojkunamanta aceiteta rantikamuychej ari, nispa.

¹⁰ Chaywanpis chay phishqa sipaskuna aceiteta rantej rinankukama, casarakoj chayamusqa, jinataj yuyayniyoj sipaskuna paywan khuska casamiento wasiman yaykusqanku. Chantá wasiyojqa punkuta wisq'aykusqa.

¹¹ Jinapi chay phishqa sipaskuna chayamuspa, wajyakusqanku: Wiraqochi, wiraqochi, kicharimuwayku ari, nispa.

¹² Casarakojtajrí nimusqa: Qankunataqa manapuni rejsiykichejchu, nispa.

¹³ Noqataj qankunatapis nillaykichejtaj: Wakichisqapuni kaychej, imaraykuchus mana yachankichejchu ima p'unchaytachus, chayrí ima phanitachus Runaj Churin kutimunanta, nispa.

Qolqemanta rijch'anachina

¹⁴ Diospa janaj pacha kamachiynenqa rijch'akun uj patronman, pichus karuman ripushaspa, kamachinkunaman tiyapuyninta jaywasqa mirachinankupaj, chayman.

¹⁵ Payqa uj kamachiman 5.000 qolqeta qosqa, ujmantaj 2.000 qolqeta, ujninmantaj waranqallata. Ajinata sapa ujman qosqa ruwayta atisqankuman jina. Chaymantataj chay patrón karuman ripusqa.

¹⁶ Chantá 5.000 qolqeta jap'ej kamacheqa chay qolqeta uj jinatawan mirachisqa.

¹⁷ Jinallatataj 2.000 qolqeta jap'ejpis iskaytawan mirachisqa.

¹⁸ 1.000 qolqeta jap'ejrí rispa, pampata allaytawan, patronninpa qolqentaqa p'ampaykusqa.

¹⁹ Chantá patronninkoqa unaymanta kutimuspa, paykunamanta cuentata mañasqa.

²⁰ Jinapi pichus 5.000 qolqeta jap'ej kamachi chimpaykuspa, uj phishqa waranqatawan jaywasqa: Wiraqochíy, kay 5.000 qolqeta qowarqanki, chaywantaj kay 5.000 qolqetawan ganarqani, nispa.

²¹ Patronnintaj nisqa: Walejpacha, qanqa sumaj kamachi kanki. Kay pisi qolqewan allinta ruwasqaykirayku, kunanqa aswan sumaj ruwanaman churasqayki. Noqawan khuska kusirikunachej, nispa.

²² Chaymantaqa 2.000 qolqeta jap'ejñataj chimpaspa, nisqa: Wiraqochíy, kay 2.000 qolqeta qowarqanki, chaywantaj kay 2.000 qolqetawan ganarqani, nispa.

²³ Patronnintaj payta nisqa: Walejpacha, qanqa sumaj kamachi kanki. Kay pisi qolqewan allinta ruwasqaykirayku, kunanqa aswan sumaj ruwanaman churasqayki. Noqawan khuska kusirikunachej, nispa.

²⁴ Chantá 1.000 qolqeta jap'ejñataj chimpaykuspa, patronninta nisqa: Wiraqochíy, rejserqayki phiña runa kasqaykita. Mana tarpuspalla poqoyta oqharinki, jinallataj mana imatapis ruwaspalla jap'ikapuyta munanki.

²⁵ Chayrayku, manchachikuspa, jallp'aman qolqeykita p'ampaykamorqani. Kayqa, qolqeykita jap'ikapuy ari, nispa.

²⁶ Patronnintajrí payman kutichisqa: Qanqa ni imapaj allin, qhella kamachi kanki. Sichus qan yacharqanki mana tarpuspalla poqoyta oqharisqayta, chantá mana imatapis ruwaspalla jap'ikapuyta munasqayta chayqa,

²⁷ chay qolqeyta bancoman churanayki karqa. Ajinamanta noqa kutimuspa, qolqeyta interesnintawan orqhokapuyman karqa, nispa.

²⁸ Chantá patronqa chay waj kamachinkunata nisqa: Chay 1.000 qolqeta paymanta qhechuychej, chantá 10.000 qolqeyojmantaj jaywaychej.

²⁹ Tiyapuyniyojmanqa aswan ashkha qosqa kanqa, mana tiyapuyniyojmantatajrí pisi kapusqantapis qhechonqanku.

³⁰ Chantá kay ni imapaj allin kamachitaqa jawa laqhaman wijch'uychej, maypichus waqay, kiru k'arukuytaj kanqa, chayman.

Suyukuna juzgasqa kanqanku

³¹ Maypachachus Runaj Churin kuraj kamachej jina jatun kayninpa lliphipiyninpi, tukuy angelninkuwan jamonqa chaypacha, lliphipej kamachinan tiyanapi tiyaykukonqa.

³² Chantá tukuy suyumanta runakuna ñawpaqenman tantakamonqanku. Paytaj ujkunata ujkunamanta t'aqanqa, imaynatachus michejpis ovejakunata cabrakunamanta t'aqan, ajinata.

³³ Paytaj ovejakunata pañanman churanqa, cabrakunatataj lloq'enman.

³⁴ Chantá Kuraj Kamachejqa pañanpi kajkunata nenqa: Jamuychej, qankunaqa Tataypa saminchasqan kankichej. Chayrayku Diospa janaj pacha kamachiyninman yaykuychej, mayqenchus kay pachaj qallariyninmantapacha chayaqeykichejpaj wakichisqa karqa, chayman.

³⁵ Chayman yaykunkichej, imaraykuchus yarqhasqa kashajtiy, qankuna mikhuchiwarqankichej. Yakumanta ch'akisqa kashajtiy, ujyachiwarqankichej. Karu llajtayoj jina purishajtiytaj, wasiykichejman wajyarikuwarqankichej.

³⁶ Jinallataj mana p'achayoj kashajtiy, p'achallichiwarqankichej. Onqosqa kashajtiy, waturikuwarqankichej. Kikillantataj carcelpi kashajtiypis, watukoj jamuwarqankichej, nispa.

³⁷ Chantá cheqan kajta ruwajkuna nenqanku: Tukuyta Kamachej, mayk'ajtaj yarqhasqata rikususpa, mikhuchisorqaykuri, chayrí yakumanta ch'akisqa kashajtiyki, ujyachisorqaykuri?

³⁸ Chantapis mayk'ajtaj karu llajtayoj kasqaykita reparaspa, wasiykuman wajyarikorqaykuri? Chayrí p'achamanta usushajtiyki, mayk'ajtaj p'achallichisorqaykuri?

³⁹ Qan onqosqa, chayrí carcelpi kashajtiyki, mayk'ajtaj waturikusorqaykuri? nispa.

⁴⁰ Kuraj Kamachejtaj paykunaman kutichenqa: Kayta sut'ita niykichej: Imatachus aswan pisipaj qhawasqa ujnin kaj wawqeypaj ruwarqankichej, chaytaqa noqapajmin ruwarqankichej, nispa.

⁴¹ Chantá Kuraj Kamachejqa lloq'enpi kajkunatañataj nenqa: Qankunaqa millayta ruwaj kankichej. Chayrayku kaymanta wiñaypaj nina lawrayman riychej, mayqenchus wakichisqa kashan Kuraj Supaypaj, chantá angelninkunapaj ima, chayman.

⁴² Chayta niykichej, imaraykuchus yarqhasqa kashajtiy, qankuna mana mikhunata qoriwarqankichejchu, yakumanta ch'akichikojtiytaj, mana yakuta jaywariwarqankichejchu.

⁴³ Karu llajtayoj kashajtiy, mana wajyarikuwarqankichejchu. P'achamanta usushajtiy, mana p'achallichiwarqankichejchu. Onqosqa, carcelpitaj kashajtiypis, mana waturikuwarqankichejchu, nispa.

⁴⁴ Chantá paykuna taponqanku: Tukuyta Kamachej, mayk'ajtaj rikusorqayku yarqhasqata, yakumanta ch'akichikojta, karu llajtayoj kasqaykita, p'achamanta pisichikojta, onqosqata, carcelpi wisq'asqata ima, manataj yanapasorqaykuchuri? nispa.

⁴⁵ Kuraj Kamachejtaj paykunaman kutichenqa: Sut'ita niykichej: Sichus aswan pisipaj qhawasqa ujnin kaj wawqeyta mana yanaparqankichejchu chayqa, nillataj noqatapis yanapawarqankichejchu, nispa.

⁴⁶ Chaymantataj paykuna wiñay ñak'ariyman renqanku, cheqan kajta ruwajkunatajrí wiñay kawsayman yaykonqanku, nispa. Ajinata Jesús yachacherqa.