San Mateo 24 - DIOSPA QHELQACHISQ

Templo thuñisqa kanqa

¹ Jesús Temploj pationmanta llojsishajtin, yachachisqankuna qayllaykuspa, Temploj muyuyninpi wasikuna imaynachus ruwasqa kasqankuta rikucherqanku.

² Jesustajrí paykunata nerqa: Kay tukuyta rikunkichejchu? Kayta sut'ita niykichej: Kaypeqa mana uj rumillapis rumi patapi qhepakonqachu, manachayqa tukuynin thuñisqa kanqa, nispa.

Qhepanejman ñak'ariykuna kanqa

³ Olivos orqopi Jesús kashaspa, pay tiyaykukorqa, yachachisqankuna qayllaykuspataj, sapallanpi taporqanku: Niwayku ari, mayk'ajtaj Templo thuñisqa kanqa? Ima señaltaj kanqa yachanaykupaj mayk'ajchus kutimunaykita, chantá mayk'ajchus kay pacha tukukunanta ima? nispa.

⁴ Chantá Jesús paykunaman kuticherqa: Allinta qhawakuychej, pajtataj pipis q'otiyasunkichejman.

⁵ Chayta niykichej, imaraykuchus sutiypi ashkha runakuna jamuspa, nenqanku: Noqaqa Diospa kachamusqan Cristo kani, nispa. Ajinamantataj ashkha runata pantachenqanku.

⁶ Qankunaqa wañuchinakumanta, maqanaku kananmanta ima uyarispa, ama mancharikuychejchu. Chay tukuy ima kananpuni tiyan. Chaywanpis manaraj kay pachaj tukukuyninchu kanqa.

⁷ Uj suyoqa waj suyoj contranta oqharikonqa, uj kamachejtaj waj kamachejpa contranta. Jinallataj tukuynejpi jallp'a ikhakuykuna kanqa, yarqhay ima.

⁸ Chaywanpis chay tukoyqa paqarichikoj warmej nanayninpa qallariynin jinalla kanqa.

⁹ Chantá runakuna qankunata jap'ichispa, ñak'arichisonqachej, wakinniykichejtataj wañuchisonqachej. Ajinata tukuy runaj chejnisqan kankichej noqaj sutiyrayku.

¹⁰ Chaypacha yachachisqaykunamanta ashkha qhepaman kutiriponqanku, purajmantataj ch'atanakonqanku, chejninakonqanku ima.

¹¹ Ashkha llulla sut'inchajkuna rikhurimuspa, may chhika runata pantachenqanku.

¹² Jinallataj millayta ruwana mayta ashkhayajtin, runakunaqa manaña wajkunata munakonqankuchu.

¹³ Chaywanpis qankunamanta pichus tukukuykama sinch'ita sayaj, chay runatamá Dios qhespichenqa.

¹⁴ Jinallataj Diospa janaj pacha kamachiyninmanta sumaj willayqa tukuynejpi willasqa kanqa, tukuy runakuna yachanankupaj. Chaymantaraj kay pachaj tukukuynin kanqa.

¹⁵ Pichus kayta ñawirejqa sut'ita yachachun: Qankuna rikunkichej chay chejnina millay millachikunata Diospa Templonpi sayashajta, mayqenmantachus Diosmanta sut'inchaj Daniel parlarqa, chayta.

¹⁶ Chaypacha Judeapi kashajkuna orqokunaman ayqechunku.

¹⁷ Chay p'unchaypi pipis wasi alto patapi kashaspaqa, ama urayk'amuchunchu wasinmanta imatapis orqhonanpaj.

¹⁸ Chajrapi kajpis nillataj wasinman kutirimuchunchu p'achanta apakunanpaj.

¹⁹ Ay, chay p'unchaypi wijsayoj warmikunamanta, ñuñoj wawayoj warmikunamantapis.

²⁰ Diosmanta mañakuychej ari, chay ayqenaykichej ama chiri tiempopi kananpaj, nitaj samarina p'unchaypipis.

²¹ Chay jina llakeyqa mana jayk'ajpis karqachu, Dios kay pachata ruwasqanmantapacha kunankama, nillataj qhepamanpis kanqachu.

²² Manachus Dios chay p'unchaykunata pisiyachinman chayqa, mana pipis qhespichisqachu kanman. Aswanpis payqa ajllakusqankunata munakusqanrayku chay p'unchaykunata pisiyachenqa.

²³ Chaypachachus pipis nisunkichejman: Qhawaychej, kaypi Diospa kachamusqan Cristo kashan, nispa, chayrí: Jaqaypi Cristo kashan, nispa chayqa, amapuni nisqankuta jap'ikunkichejchu.

²⁴ Ajinamanta llullakuspa: Cristo kani, nispa nejkuna rikhurimonqanku, mana cheqanta sunt'inchajkuna ima. Paykunataj runaj mana jayk'aj rikusqan t'ukunakunata ruwaspa, runakunata pantachenqanku. Atispaqa, Diospa ajllakusqankunatapis pantachinkuman.

²⁵ Kay nisqayta allinta uyariwajchej. Kay tukuyta ñawpajmantaña willashaykichej.

²⁶ Chayrayku sichus pipis nisunkichejman: Qhawaychej, Cristo ch'innejpi kashan, nispa chayqa, amapuni rinkichejchu. Chayrí sichus nisunkichejman: Qhawaychej, wasi ukhupi pakasqa kashan, nispa chayqa, amallataj nisqanta jap'ikunkichejchu.

²⁷ Manachayqa imaynatachus lliuj lliujqa inti llojsimuynejmanta inti yaykuynejkama lliphipirispa k'ancharin, ajinallataj kanqa Runaj Churinpa jamunan p'unchay.

²⁸ Maypichá aya tiyan, chayman suwintukuna tantakonqanku, nispa. Ajinata Jesús yachacherqa.

Runaj Churinpa kutimuynin

²⁹ Jesús yachachillarqataj: Ñak'ariy p'unchaykunaj qhepanta, inti laqhayaykaponqa. Killapis manaña k'anchanqachu, ch'askakunapis urmaranqanku. Jinallataj janaj pacha atiykunapis kharkatitenqanku.

³⁰ Chaypacha Runaj Churinpa jamuyninmanta señal janajpi rikhurimonqa. Jinapitaj tukuy kay pachapi ayllukuna mayta manchachikuspa, waqanqanku. Chantá paykuna Runaj Churinta janaj pachamanta phuyu patapi jamushajta rikuwanqanku, jatun atiywan, jatun kayniypa lliphipiyninwan ima.

³¹ Noqataj angelniykunata kachamusaj, trompetata sinch'ita waqachispa. Paykunataj tukuy ajllasqaykunata tantanqanku kay pachaj ujnin k'uchunmantapacha, janajpa ujnin kantunkama.

³² Kunan kay higo sach'a rijch'anachinamanta yachaychej. Maypachachus higo sach'aj k'allmankuna wawayarin, laqhenkunataj ijirimun, chaypacha, qankuna q'oñi tiempo qayllapiña kasqanta yachankichej.

³³ Ajinallatataj qankunapis kay tukuy ima rikhurimojtin, Runaj Churin ñapis punkupiña kasqanta yachankichej.

³⁴ Kayta sut'ita niykichej: Manaraj mita masiykichej tukukushajtinku, kay tukuy ima junt'akunan tiyan.

³⁵ Janajpis, kay pachapis tukukaponqanku. Chaywanpis nisqayqa mana jayk'ajpis pasanqachu, manachayqa junt'akonqapuni.

³⁶ Chay p'unchay, Runaj Churinpa jamunan p'unchay, chayrí chay phani mayk'ajchus kananmantaqa mana pipis yachanchu, ni janaj pachapi angelkunapis, nitaj Churipis. Tata Dioslla chaymantaqa yachan.

³⁷ Imaynachus Noéj tiemponpi karqa, ajinallataj kanqa Runaj Churinpa kutimunan p'unchaypipis.

³⁸ Chaypacha, manaraj jatun para chayamushajtin, runakunaqa mikhusharqanku, ujyasharqanku, casarakusharqanku ima, Noé arcaman yaykunan p'unchaykama.

³⁹ Paykuna mana imatapis reparakorqankuchu jatun para jamunankama, tukuyninkutaj chinkachisqa karqanku. Ajinallataj kanqa Runaj Churin rikhurimunan, chay p'unchaypi.

⁴⁰ Chaypachaqa iskay runakuna chajrapi kashanqanku. Ujnin oqharisqa kanqa, ujnintaj saqerparisqa.

⁴¹ Jinallataj iskay warmikuna molinopi jak'ushanqanku. Ujnin oqharisqa kanqa, ujnintaj saqerparisqa.

⁴² Chayrayku, qankunapis wakichisqa suyaychej, imaraykuchus mana yachankichejchu ima p'unchaychus Tukuyta Kamachejniykichej kutimunanta.

⁴³ Kaytawan yachaychej: Sichus wasiyoj ima phanitachus suwa jamunanta yachanman chayqa, mana puñuspa suyaykunman, manataj suwachikunmanchu.

⁴⁴ Chayrayku qankunapis wakichisqallataj kaychej, imaraykuchus Runaj Churenqa mana yuyasqaykichej p'unchaypi kutimonqa.

Iskay kamachikuna

⁴⁵ Pitaj allin yuyayniyoj mayordomo jina kanman? Paytaqa patronnin churan maychus tiemponpi kamachin masinkunaman mikhuchinanpaj.

⁴⁶ Jaqay mayordomo kusikuyniyojmin kanqa, sichus patronnin ajinata ruwashajta taripanqa chayqa.

⁴⁷ Kayta sut'ita niykichej: Chay jina mayordomotaqa patronnin tukuy kapuyninta qhawananpaj churanqa.

⁴⁸ Chaywanpis mayordomo sajra sonqoyoj kaspa, ichapis ninman: Patronneyqa manaraj chayamonqachu, nispa.

⁴⁹ Chantá wakin kamachi masinkunata maqayta qallarinman, jinallatataj warmi kamachikunatapis. Chantá mikhunman, ujyanmantaj machanankama.

⁵⁰ Jinallapi patronnin kutimonqa mayordomoj mana suyasqan p'unchaypi, mana yachasqan phanipitaj.

⁵¹ Chayamuspataj, patronqa chay mayordomota sinch'ita jasut'iytawan, puraj uyakunatawan khuska wijch'onqa, maypichus waqay, kiru k'arukuytaj kanqa, chayman, nispa. Ajinata Jesús yachacherqa.