San Mateo 20 - DIOSPA QHELQACHISQ

Uvata pallajkunamanta rijch'anachina

¹ Diospa janaj pacha kamachiynenqa chajrayoj uj runaman rijch'akun, pichus tutamanta uva pallanankupaj peonkunata mink'aj llojsisqa, chayman.

² Paykunata mink'ashaspataj, uj jornalta pagananta nisqa. Chaymantataj uva huertanman paykunata kachasqa.

³ Chantá yunta watay chay chayta, huertayojqa plazapi mana ima ruwanayoj runakunata rikusqa.

⁴ Qayllaykuspataj, nisqa: Qankunapis uva huertayman ruwaj riychej, chantá maychus kajta pagasqaykichej, nispa. Paykunataj risqanku.

⁵ Chajrayoj runaqa chawpi p'unchayta ujtawan llojsisqa, jinallataj chawpi p'unchay pasaytapis, chaypachallataj pallajkunata mink'asqa.

⁶ Yunta kachariy chay chayta ujtawan plazaman llojsispa, chajrayojqa wajkunatapis tarisqa mana ima ruwanayojta. Chantá paykunata nisqa: Imaraykutaj kaypi tukuy p'unchaynintinta mana imata ruwaspa kashankichejri? nispa.

⁷ Paykunataj kutichisqanku: Mana pipis mink'akuwaykuchu, nispa. Paytaj nisqa: Qankunapis huertayman uva pallaj rillaychejtaj, nispa. Paykunataj risqanku.

⁸ Ch'isiyaykuyta, uva huertayojqa mayordomonta nisqa: Peonkunata wajyaspa, pagapuy, qhepata yaykojkunamanta qallarispa, ñawpaj yaykojkunapi tukuychaspa, nispa.

⁹ Jinataj, mayordomoqa inti yaykuyllataña jamojkunaman uj jornaltapuni sapa ujman pagapusqa.

¹⁰ Tutamantapacha ruwaj peonkunatajrí chayta rikuspa, aswan ashkha qolqeta jap'iyta yuyashasqanku. Chaywanpis mana jinachu kasqa, manachayqa mayordomoqa sapa ujninkuman uj jornaltakamalla pagapusqa.

¹¹ Pagonkuta jap'ispataj, chay peonkuna chajrayojpaj kay jinata thutuyta qallarisqanku:

¹² Kay qhepa jamojkunaqa uj phanillataña pallarqanku. Qantaj noqaykuman jinallataj paykunaman pagapunki. Noqaykurí p'unchay junt'ata ruphaypi tuntispa ruwarqayku, nispa.

¹³ Chajrayoj runatajrí ujninman kutichisqa: Kawsaqéy, noqaqa mana ch'awkiyashaykichu. Manachu uj jornalta pagasunayta nispa mink'arqayki?

¹⁴ Kunantaj pagoykita jap'ikapuspa, ripullay. Noqaqa kay qhepa jamojkunaman, qanman jinallataj pagapuyta munani.

¹⁵ Manachu qolqeywan munasqayta ruwayta atini? Chayrí, k'acha kasqayraykuchu sajra ñawiwan qhawashawanki? nispa.

¹⁶ Chantá parlayta tukunanpaj Jesús nerqa: Ajinallataj kunan qhepapi kajkunaqa chaypacha ñawpajpi rikhurenqanku, ñawpajpi kajkunataj qhepapi kanqanku, nispa.

Wañunanmanta Jesús ujtawan willan

¹⁷ Jesús Jerusalenman rishaspa, chunka iskayniyoj yachachisqankunata wajnejman wajyarqa, kay jinatataj nerqa:

¹⁸ Kunanqa Jerusalén llajtaman rishanchej, chaypitaj noqa, pichus Runaj Churin kajta kuraj sacerdotekunaj makinkuman, Diospa kamachisqanmanta yachachejkunaman ima jaywaykuwanqanku. Paykunataj wañuchinawankupaj juchachawanqanku.

¹⁹ Chantá paykuna mana judío kajkunaman jaywaykuwanqanku. Mana judío kajkunataj alqochakuspa jasut'iwanqanku, cruzmantaj chakataykuwanqanku. Chaywanpis kinsa p'unchayninman wañusqamanta kawsarimpusaj, nispa.

Uj mama wawankunapaj mañapun

²⁰ Chaypacha Zebedeoj warminwan, churinkunawan ima Jesusman qayllaykorqanku. Warmitaj Jesuspa ñawpaqenpi qonqoriykukuspa, uj imata mañakorqa.

²¹ Jesustaj nerqa: Imatataj munankiri? nispa. Chay warmitaj kuticherqa: Niy ari, qan kamachishajtiyki, kay iskay churiykuna tiyaykukunankuta ujnin pañaykipi, ujnintaj lloq'eykipi, nispa.

²² Jesustaj nerqa: Mana yachankichejchu imatachus mañakusqaykichejta. Noqa imaynatachus ñak'arisaj, ajinata ñak'ariyta atiwajchejchu? nispa. Paykunataj nerqanku: Arí, atisqayku, nispa.

²³ Chantá Jesús kuticherqa: Arí, qankunaqa noqa jina ñak'arinkichej. Chaywanpis pañaypi, lloq'eypitaj qankunata tiyachinayqa mana noqamantachu. Chaytaqa Tata Diosniylla wakichin, pikunatachus pay ajllarqa, chaykunapaj, nispa.

²⁴ Jinallapi chay chunka yachachisqakuna chayta uyarispa, chay iskaynin wawqekunapaj mayta phiñakorqanku.

²⁵ Jesustajrí tukuyninkuta wajyaspa, nerqa: Qankuna yachankichej, sapa llajtapi kamachejkunaqa atiyniyoj kasqankuta rikuchispa, munayninkuman jina runakunata apaykachanku. Ajinallatataj kurajkunapis atiyninkuwan munajta mana munajta runankunata kamachillankupuni.

²⁶ Qankuna ukhupirí mana jinachu kanan tiyan. Manachayqa pichus qankunamanta kurajpaj qhawasqa kayta munajqa kamachiykichej jina kanan tiyan.

²⁷ Jinallataj, mayqellanpis qankunamanta ñawpajpi kayta munajqa tukuyniykichejpa wata runan kanan tiyan.

²⁸ Noqa Runaj Churenqa mana runawan sirvichikunaypajchu jamorqani. Aswanpis runakunaj kamachin jina kanaypaj jamorqani, kawsayniytataj qoj, ashkha runakuna qhespichisqa kanankupaj, nispa.

Jesús iskay ñawsakunata qhawarichin

²⁹ Jesús yachachisqankunawan Jericó llajtamanta llojsishajtin, ashkha runakuna payta qhatisharqanku.

³⁰ Chantá iskay ñawsakuna chay ñan patapi tiyasharqanku. Jesús chaynejta rishasqanta uyarispataj, paykuna qhapariyta qallarerqanku: Wiraqochi, Davidpa Churin, khuyarikuwayku ari, nispa.

³¹ Runatajrí paykunata ch'inyachiyta munaspa, paykunata k'amerqanku. Chay ñawsa runakunatajrí astawanraj qhaparerqanku: Wiraqochi, Davidpa Churin, khuyarikuwayku ari, nispa.

³² Chantá Jesusqa sayaspa, ñawsakunata wajyarqa, jamojtinkutaj taporqa: Imatataj ruwapusunayta munankichejri? nispa.

³³ Paykunataj kuticherqanku: Wiraqochi, qhawarichinawaykuta munayku, nispa.

³⁴ Chantá Jesús paykunamanta khuyakuspa, ñawinkuta llankhaykorqa. Chayta ruwasqantawankamataj, paykuna rikuyta aterqanku. Chaymantataj Jesuswan khuska rerqanku.