San Mateo 2 - DIOSPA QHELQACHISQ

Yachaysapa runakuna Jesusta watukunku

¹ Jesusqa Belén llajtapi paqarerqa, chaytaj Judea jap'iypi karqa, kuraj kamachej Herodes kamachisharqa, chaypacha. Jinapi inti llojsimuynejmanta yachaysapa runakuna Jerusalenman chayamorqanku.

² Chantá tapurikorqanku: Maypitaj kashanman pichus judiokunaj kuraj kamachejnin kananpaj paqarikojri? Kayta niyku, imaraykuchus inti llojsimuynejpi ch'askanta rikorqayku. Chayrayku payta yupaychaj jamuyku, nispa.

³ Kuraj kamachej Herodesrí chayta uyarispa, mancharikorqa, jinallataj Jerusalenpi tukuy kajkunapis.

⁴ Jinapi Herodesqa kuraj sacerdotekunata, Diospa kamachisqanmanta yachachejkunatawan wajyachispa, taporqa: Maypitaj Cristo paqarikunan karqari? nispa.

⁵ Paykunataj kuticherqanku: Belenpi, Judea jap'iypi, imaraykuchus Diosmanta sut'inchaj kay jinata qhelqarqa:

⁶ Qanrí Belén, Judá jap'iypi kaj, Judapi kaj llajtakuna ukhupi aswan uyarisqa kanki, imaraykuchus qanmanta uj kamachej llojsenqa, paytaj Israel aylluyta michenqa, nispa.

⁷ Chantá Herodesqa pakayllamanta yachaysapa runakunata wajyaspa, aswan allinta taporqa mayk'ajpunichus chay ch'aska paykunaman rikhurisqanta.

⁸ Chaymantataj paykunata Belenman kacharqa: Jaqayman riychej, allintataj chay wawamanta yachamuychej. Wawata tarispataj, willawankichej, noqapis payta yupaychamunaypaj, nispa.

⁹ Chay yachaysapa runakunaqa kuraj kamachejpa nisqanta uyariytawan, kachaykukorqanku. Jinallapi inti llojsimuynejpi rikhurimoj ch'askaqa ñawpaqenkuta Belennejman purirerqa. Chantá, wawa maypichus kasharqa, chaynejpi sayaykorqa.

¹⁰ Yachaysapa runakunaqa chay ch'askata rikuspa, maytapuni kusikorqanku.

¹¹ Wasiman yaykuspataj, wawata, María mamantawan rikorqanku, qonqoriykukuspataj, wawata yupaycharqanku. Chantá, q'epinkumanta imatachus apamusqankuta orqhospa qorita, inciensota, mirratawan ima jaywarqanku.

¹² Chay yachaysapa runakuna ripunankupaj wakichikushajtinku, Diosqa mosqoypi paykunata nerqa ama Herodesman kutinankuta. Chayrayku waj ñannejta llajtankuman kutiporqanku.

Josewan wasi ayllunwan Egiptoman ayqenku

¹³ Yachaysapa runakuna ripusqankumantaña, Diospa angelnenqa Joseman mosqoypi rikhurispa, nerqa: Sayariy, wawata, mamantawan pusariykukuspa, Egipto suyuman ayqey. Chaypitaj qhepakunki, noqa ujtawan willasunaykama, imaraykuchus Herodesqa wawata wañuchinanpaj mask'anqa, nispa.

¹⁴ Jinallapi José jatariytawankama, wawanta, warmintawan tutapacha pusariykukuspa, Egiptoman riporqa.

¹⁵ Chantá paykuna chaypi qhepakorqanku Herodes wañunankama. Ajinata Tukuyta Kamachej Dios sut'inchajninnejta imatachus nisqan junt'akorqa: Churiyta Egiptomanta jampunanpaj wajyarqani, nispa.

Herodes wawakunata wañuchinankuta kamachin

¹⁶ Herodesqa yachaysapa runakuna payta ch'awkiyasqankuta yachaspa, maytapuni phiñakorqa. Chantá, ch'aska rikhurimusqanmanta yachajkuna willasqankuman jina, Herodesqa soldadonkunata kamacherqa Belén llajtapi, muyuyninpi ima tukuy qhari wawakunata wañurachinankuta iskay watayojmanta uraman.

¹⁷ Ajinamanta Diosmanta ñawpa sut'inchaj Jeremiaspa qhelqasqan junt'akorqa:

¹⁸ Ramá llajtapi uj qhapariy uyarikun, jatun waqay, jik'uytaj. Raquelqa wawankunamanta waqashan, manataj sonqochasqa kayta munanchu, imaraykuchus wawankunaqa wañuchisqaña, nispa.

¹⁹ Aswan qhepaman Herodes wañusqanmantaña, Diospa angelnin Egiptopi mosqoypi Joseman watej rikhurerqa. Paytaj nerqa:

²⁰ Sayariy, wawata, mamantawan pusariykukuspa, Israel suyuman kutipuy, imaraykuchus wawata wañuchiyta munajkunaqa ñapis wañunkuña, nispa.

²¹ Chaymantá José jatariytawan, wawanta, warmintawan pusariykukuspa, Israel suyuman kutiporqa.

²² Chaywanpis pay uyarerqa Judeapi Arquelao kamachishasqanta tatan Herodespa cuentanmanta. Chayrayku chayman riyta manchachikorqa. Jinapi Dios mosqoypi willasqanrayku, Joseqa Galilea jap'iyman rerqa.

²³ Nazaret llajtaman chayaspataj, chaypi tiyakorqa. Ajinapi imatachus Diosmanta ñawpa sut'inchajkunaj nisqanku junt'akorqa: Pay Nazaret llajtayoj nisqa kanqa, nispa.