San Mateo 17 - DIOSPA QHELQACHISQ

Jesús waj jinaman tukun

¹ Chaymanta sojta p'unchayninman Jesusqa Pedrota, Santiagota, wawqen Juantawan ima, uj jatun orqoman pusarqa.

² Chaypitaj paykuna qhawashajtinku, Jesús waj jinaman tukorqa. Uyanqa inti jina k'ancharerqa, p'achantaj may yurajta lliphipirerqa.

³ Jinallaman Moiseswan, Eliaswan ima rikhurimuspa, Jesuswan parlayta qallarerqanku.

⁴ Chayta rikuspa, Pedroqa Jesusta nerqa: Tukuyta Kamachej Jesús, kaypi kasqanchejqa manchay sumaj. Munajtiykeqa, kinsa ch'ujllata kaypi ruwasqayku: Ujta qanpaj, ujta Moisespaj, ujtataj Eliaspaj, nispa.

⁵ Ajinata Pedro parlashajtillanraj, ujllata k'ancharishaj uj phuyu paykunata p'ampaykorqa, chay phuyu ukhumantataj Dios nimorqa: Kaymin munasqa Chureyqa, ajllakusqaytaj. Paywan sonqo junt'asqa kani, chayrayku payta uyariychej, nispa.

⁶ Jesuspa yachachisqankuna chayta uyarispa, pampakama k'umuykorqanku, imaraykuchus sinch'itapuni mancharikorqanku.

⁷ Chantá Jesús qayllaykuspa, paykunata llankharerqa, nerqataj: Sayariychej, ama mancharikuychejchu, nispa.

⁸ Qhawarispataj, yachachisqakuna manaña pitapis rikorqankuchu, manachayqa Jesusllata.

⁹ Orqomanta urayk'amushajtinku, Jesús paykunata kamacherqa: Kunan imatachus rikusqaykichejta ama pimanpis willankichejchu, Runaj Churin wañusqamanta kawsarimpunankama, nispa.

¹⁰ Chantá yachachisqankunaqa Jesusta taporqanku: Imaraykutaj Diospa kamachisqanmanta yachachejkuna ninku Eliasraj kutimunan kasqanta manaraj Diospa kachamusqan jamushajtinri? nispa.

¹¹ Jesustaj kuticherqa: Arí, Elías ñawpajta jamuspa, tukuy imata maychus kajman churanqa.

¹² Noqatajrí niykichej: Eliasqa jamorqaña. Runakunarí payta mana rejsispa, tukuy ima munasqankuta payta ruwarqanku. Ajinallatataj Runaj Churinpis paykunaj makinpi ñak'arenqa, nispa.

¹³ Chaypacha yachachisqankuna repararqanku Jesusqa Bautizaj Juanmanta parlashasqanta.

Jesusqa supayniyoj waynata qhaliyachin

¹⁴ Jesuswan, chay kinsa yachachisqankunawan ima chayarqanku maypichus ashkha runakuna tantasqa kasharqanku, chayman. Jinallapi, uj runa Jesusman qayllaykorqa, ñawpaqenman qonqoriykukuspataj, nerqa:

¹⁵ Wiraqochíy, churiymanta khuyarikuy ari, imaraykuchus t'uku onqoy payta anchata ñak'arichin. Ashkha kutita ninaman urmaykun, yakumanpis.

¹⁶ Noqataj yachachisqaykikunaman payta pusamorqani, paykunatajrí mana qhaliyachiyta aterqankuchu, nispa.

¹⁷ Jesustaj kuticherqa: Ay, noqapi mana atinikuyta atej runakuna. Mayk'ajkamataj qankunawan kasajri? Mayk'ajkamataj awantasqaykichejri? Chay waynata pusamuwaychejmá, nispa.

¹⁸ Chantá Jesusqa waynapi kaj supayta k'amerqa, supaytaj waynamanta llojserqa. Chaymantapachataj chay waynaqa qhaliyaporqa.

¹⁹ Aswan qhepaman yachachisqankuna Jesusman qayllaykuspa, sapallanpi taporqanku: Imaraykutaj noqayku waynamanta chay supayta mana qharqoyta aterqaykuchuri? nispa.

²⁰ Jesustaj kuticherqa: Qankuna noqapi mana atinikusqaykichejrayku mana supayta qharqoyta aterqankichejchu. Noqataj kayta sut'ita niykichej: Noqapi atinikusqaykichejchus mostaza muju jinallapis kanman chayqa, kay orqota niwajchej: Kaymanta jaqayman ithirikuy, nispa, ithirinmantaj. Mana imapis qankunapaj kanmanchu mana ruway atinaqa.

²¹ Chaywanpis kay jina supaykunata qharqonapajqa Diosmanta mañakuna, ayunanataj, nispa.

Jesús wañunanmanta ujtawan willan

²² Galileapi kashajtinku, Jesusqa ujtawan yachachisqankunata nerqa: Runaj Churenqa runakunaj makinman jaywasqa kanqa, paykunataj payta wañuchenqanku.

²³ Chaywanpis kinsa p'unchaymanta kawsarimponqa, nispa. Yachachisqankunarí Jesús wañunanmanta uyarispa, mayta llakikorqanku.

Impuestota paganamanta

²⁴ Maypachachus Jesús, yachachisqankunawan ima Cafarnaún llajtaman chayarqanku chaypacha, Templopaj impuestota cobrajkunaqa Pedroman qayllaykuspa, taporqanku: Manachu yachachejniyki Templopaj impuestota pagayta yachan? nispa.

²⁵ Pedrotaj kuticherqa: Arí, pay pagan, nispa. Chantá Pedro wasiman yaykushajtin, Jesús payta nerqapacha: Ima ninkitaj, Simón? Kay pachapi kuraj kamachejkunaqa pitataj tasata, chayrí impuestota pagachinku: Llajta masinkukunatachu, chayrí waj llajtayojkunatachu? nispa.

²⁶ Pedrotaj kuticherqa: Waj llajtayojkunata pagachinku, nispa. Chantá Jesús nerqa: Arí, jina kajtenqa, kuraj kamachejpa llajta masinkuna mana impuestota pagankuchu.

²⁷ Chaywanpis, kaykuna ama rimanankupaj kayta ruway: Qochaman rispa, challwa jap'inaykita choqamuy. Ñawpajta chhallmamoj challwatataj orqhospa, siminta kichariytawan, uj qolqeta tarinki. Chay qolqewantaj qanmanta, noqamantawan Templo impuestota pagamuy, nispa.