San Mateo 14 - DIOSPA QHELQACHISQ

Bautizaj Juanta wañuchinku

¹ Chaypacha kuraj kamachej Herodes Antipas sutiyoj Galileapi kamachisharqa, paytaj Jesuspa ruwasqanmanta uyarerqa.

² Chantá kamachinkunata nerqa: Chayqa Bautizaj Juanchá. Wañusqamanta kawsarimpusqanrayku payqa kay jina atiyniyojpuni, t'ukuna imakunatataj ruwan, nispa.

³ Herodesqa chayta nerqa, imaraykuchus Juanta ñawpajta jap'ichispa, watasqata carcelman wisq'aykuchisqa Filipo wawqenpa warmin Herodiasrayku.

⁴ Herodestaj chayta ruwasqa, imaraykuchus Juan payta nisqa: Mana cuñadaykita warmiykipaj jap'ikapuyta atinkichu, nispa.

⁵ Chayrayku Herodesqa Juanta wañuchichiyta munasqa. Chaywanpis runakunata manchachikuspa, mana imanayta atisqachu, imaraykuchus Juanta tukuy runakuna Diosmanta sut'inchajpaj qhawasqanku.

⁶ Chantá Herodespa diachakunpi Herodiaspa ususin diachakuman wajyasqakunaj ñawpaqenkupi tususqa, Herodestaj maytapuni kusikusqa.

⁷ Chayrayku payqa tiluspa, chay sipasta nisqa: Imatachus mañakuwasqaykita qosqayki, nispa.

⁸ Sipastajrí mamanpa yuyaychasqan kaspa, Herodesta nisqa: Bautizaj Juanpa umanta qoway uj phampa chuwapi, nispa.

⁹ Chayta sipas nejtinkamaqa, kuraj kamachej Herodes llakikusqa. Chaywanpis chaypi kajkunaj ñawpaqenkupi tilusqanrayku, Juanpa umanta qonankuta kamachisqa.

¹⁰ Jinataj uj soldado carcelman rispa, Juanpa umanta qholumusqa.

¹¹ Chay umatataj phampa chuwapi apamuspa, sipasman jaywasqa, paytaj mamanman apasqa.

¹² Chay qhepata, Juanpa yachachisqankuna jamusqanku, ayanta apakapuspataj, p'ampasqanku. Chantá, Jesusman willaj risqanku.

Jesús 5.000 runakunaman mikhuchin

¹³ Jesusqa Bautizaj Juan wañusqanta yachaspa, chaymanta uj botepi riporqa aswan karu cheqanejman, sapallan kananpaj. Runakunatajrí maymanchus risqanta yachaytawan, paypa qhepanta tukuy llajtamanta chakipi rerqanku.

¹⁴ Jinapi Jesús botemanta llojsishaspa, ashkha runata rikorqa. Paykunamanta khuyakuspataj, tukuy onqosqakunata qhaliyacherqa.

¹⁵ Ch'isiyaykuytataj, yachachisqankuna Jesusman qayllaykuspa, nerqanku: Ch'in cheqanejpi kanchej, ch'isiyaykushanñataj. Chayrayku kay runakunata kachapullayña, ranchokunaman rispa, imallatapis rantikamunankupaj, nispa.

¹⁶ Jesustajrí paykunata nerqa: Mana ripunankuchu tiyan. Qankuna paykunata mikhuchiychej, nispa.

¹⁷ Yachachisqankunataj kuticherqanku: Kaypeqa phishqa t'antalla, iskay challwakunallawan tiyapuwayku, nispa.

¹⁸ Jesustaj nerqa: Chayta apamuwaychej, nispa.

¹⁹ Chantá Jesús runakunata ch'iki pataman tiyarakunankuta kamacherqa. Jinaspataj, chay phishqa t'antakunata, iskay challwakunatawan makinpi jap'erqa, janajta qhawarispataj, Diosman pachis nerqa. Chantá, t'antakunata partispa, yachachisqankunaman jaywarqa, paykunataj runakunamanñataj rak'irarqanku.

²⁰ Jinapi tukuyninku sajsakunankukama mikhorqanku. Jesuspa yachachisqankunataj puchoj t'antata chunka iskayniyoj canasta junt'ata tantarqanku.

²¹ Chay mikhojkunaqa 5.000 jina qharikuna karqanku, mana warmikunata yupaspa, nitaj wawakunata.

Jesús yaku patata purin

²² Chaypacha Jesusqa yachachisqankunata boteman wicharinankuta kamacherqa, qocha chimpaman ñawpashanankupaj. Chaykamataj Jesusqa runakunata kachapusharqa.

²³ Runakunata kachapuytawantaj, sapallan orqoman wicharerqa, Dioswan parlarikoj. Tutayaykuytataj pay sapallan kasharqa.

²⁴ Chaykama yachachisqankuna botepi qocha chawpitaña rishajtinku, yakoqa qhollchoqeyaspa, kayman jaqayman boteta apaykachasharqa, ñawpaqenkumantataj wayra manchayta phukumusharqa.

²⁵ Manaraj sut'iyashajtintaj, Jesús yaku patata purispa, paykunanejman rerqa.

²⁶ Jinapi yachachisqankunaqa runaman rijch'akojta yaku patata purejta rikuytawan, mayta manchachikuspa, qhaparerqanku: Alma, alma, nispa.

²⁷ Jesustajrí usqhayllata paykunata nimorqa: Sonqochakuychej, noqa kani. Ama manchachikuychejchu, nispa.

²⁸ Chantá Pedro kuticherqa: Wiraqochi, qanchus kanki chayqa, yaku patata qanman jamunayta niway, nispa.

²⁹ Jesustaj nerqa: Jamuy, nispa. Jinapi Pedroqa botemanta llojsiytawan, Jesusman rinanpaj yaku patata puriyta qallarerqa.

³⁰ Pedrotajrí sinch'i wayrata reparaspa, mancharikorqa, yakuman chinkaykoj jina kashaspataj, qhaparerqa: Wiraqochi, yanapariway, nispa.

³¹ Jesusqa Pedrota usqhayta makinmanta aysariytawan, nerqa: Qan pisillata noqapi atinikunki. Imaraykutaj iskaychakunkiri? nispa.

³² Jesuswan, Pedrowan ima boteman wicharejtinkukamataj, wayra thañikorqa.

³³ Chaymantataj botepi kajkuna Jesusman qayllaykuspa, k'umuykukorqanku, nerqankutaj: Qanpuni Diospa Churin kanki, nispa.

Jesús Genesaretpi onqosqakunata qhaliyachin

³⁴ Chantá Jesuswan, yachachisqankunawan qocha chimpaman rispa, Genesaret chaynejman chayarqanku.

³⁵ Chay llajtayojkunataj Jesusta rejsiytawan, tukuynejman willaracherqanku pay chayamusqanmanta. Chantá tukuy onqosqakunata payman apamorqanku.

³⁶ Jinataj Jesusta mayta nerqanku onqosqakuna p'achanpa kantullantapis llankharinankuta saqenanta. Chantá tukuy llankhaykojkunaqa onqoyninkumanta qhaliyachisqa karqanku.