San Mateo 12 - DIOSPA QHELQACHISQ

Samarina p'unchaymanta churanaku

¹ Chaypacha uj samarina p'unchaypi Jesús trigo chajraj chawpinta risharqa, yachachisqankunataj yarqhachikuspa, trigo umakunata t'iperqanku chayta mikhunankupaj.

² Fariseokunatajrí chayta rikuspa, Jesusta nerqanku: Qhaway yachachisqaykikunata, samarina p'unchaypi mana ruwanata ruwashanku, nispa.

³ Jesustajrí fariseokunata nerqa: Manachu jayk'ajpis ñawirerqankichej David, paywan kajkunawan ima, yarqhachikuspa imatachus ruwasqankumanta?

⁴ Diospa wasinman yaykuspa, paykunaqa Diospaj t'aqasqa t'antata oqharerqanku, mikhorqankutaj. Chaytaqa mana David, nitaj paywan kajkunapis mikhunanchu karqa, manachayqa sacerdotekunallapaj karqa.

⁵ Chayrí, manachu Moisespa kamachisqanpi ñawirerqankichej, Templopi sacerdotekuna samarina p'unchaypi ruwanankuta junt'ashaspapis mana juchayojchu kasqankuta?

⁶ Noqatajrí niykichej: Pichus kaypi kajqa aswan kurajmin Templomanta nisqaqa.

⁷ Qankunachus yachawajchej imatachus niyta munasqanta: Noqaqa ujkunata khuyanaykichejta munani, manataj uywa ñak'asqa q'olachinata jaywanawaykichejtachu nispa chayqa, qankunaqa mana juchayojkunata mana juchachawajchejchu karqa.

⁸ Chayta niykichej, imaraykuchus Runaj Churenqa samarina p'unchaypi imatachus ruwana kasqanta ninanpaj atiyniyojmin, nispa.

Jesús makin ch'akisqa runata qhaliyachin

⁹ Chaymanta llojsispa, Jesús tantakuna wasiman rerqa.

¹⁰ Chaypitaj makin ch'akisqa uj runa kasharqa. Jinapi fariseokunaqa Jesusta ch'ataykuyta munaspa, taporqanku: Samarina p'unchaypi onqosqata qhaliyachiy atikunchu? nispa.

¹¹ Jesustaj paykunata nerqa: Qankunamanta mayqenpatapis uj ovejaykichej samarina p'unchaypi pujyuman urmaykojtin, manachu orqhokapuwajchej?

¹² Runarí manachu aswan valorniyoj kanman ovejamanta nisqaqa? Chayrayku samarina p'unchaypipis runa masipaj allin kajta ruwayta atinchej, nispa.

¹³ Chaymantataj Jesús chay runata nerqa: Makiykita jaywariy, nispa. Paytaj makinta jaywarejtin, chay makenqa qhaliyaporqa, ujnin kaj makin jina.

¹⁴ Chaywanpis fariseokunaqa llojsiytawan, yachachinakorqanku imaynamantachus Jesusta wañuchinankupaj.

Isaiaspa sut'inchasqan junt'akun

¹⁵ Payta wañuchiyta munashasqankuta yachaspa, Jesús chay cheqamanta riporqa, jinataj ashkha runakuna qhepanta rillarqankutaj. Chantá Jesús tukuy onqosqakunata qhaliyacherqa.

¹⁶ Chaywanpis paykunata mayta kamacherqa ama pimanpis willanankuta pichus pay kasqanta.

¹⁷ Ajinata ruwaspa, Jesusqa Diosmanta ñawpa sut'inchaj Isaiaspa nisqanta junt'arqa:

¹⁸ Dios nin: Kaymin noqaj kamachiy, pitachus noqa ajllakuni, chay. Paymin munakusqay, paywantaj may kusisqa kani. Payman Espirituyta qoni, chantá tukuy suyuman justiciamanta willanqa.

¹⁹ Payqa mana piwanpis churanakonqachu, nitaj qhaparqachanqachu, nillataj callepipis sinch'ita parlanqachu.

²⁰ Lajrasqa soqosollatapis mana p'akenqachu, nitaj ñak'ayllata lawrashaj mecherotapis wañuchenqachu, cheqan justiciata atipachinankama.

²¹ Chantá tukuy kay pachapi kaj runakunaqa paypi atinikuspa allin kajta suyakonqanku. Ajinata Isaías Jesusmanta sut'incharqa.

Santo Espiritupaj rimajkuna

²² Uj kuti runakunaqa Jesusman pusarqanku supayniyoj ñawsa opa runata, Jesustaj payta qhaliyacherqa. Ajinamanta chay runaqa parlarerqa, qhawarerqataj.

²³ Chayta rikojkunataj t'ukuspa, nerqanku: Manachu kayqa Davidpa Churin kanman? nispa.

²⁴ Fariseokunarí chayta uyarispa, nerqanku: Kuraj Supay Beelzebú kay runaman atiyta qon, chayraykumin pay supaykunata qharqon, nispa.

²⁵ Chantá Jesús imatachus yuyasqankuta yachaspa, nerqa: Sichus uj suyupi tiyakojkuna chejninakuspa t'aqanakunkuman chayqa, chay suyu mana sayanmanchu, tukukunman. Jinallatataj sichus uj llajtapi, chayrí wasi ayllupipis phiñanakuspa t'aqanakunkuman chayqa, manallataj khuska kayta atinkumanchu.

²⁶ Sichus Supay Satanás pay kikillantataj qharqokun chayqa, pay kikin t'aqanasqa kashan. Imaynatataj kamachiynin sayallanqapuniri?

²⁷ Chantá sichus noqa Beelzebujpa atiyninwan supaykunata qharqoni chayqa, pinejtataj yachachisqaykichejkunaqa supaykunata qharqonkuri? Chayrayku, chay nisqaykichejmanta paykuna juchachasonqachej.

²⁸ Sichus noqaqa Diospa Espiritunpa atiyninwan supaykunata qharqoni chayqa, sut'itapuni niykichej: Diosqa qankuna ukhupi kamachiyta qallarishanña, nispa.

²⁹ Chayrí imaynatataj pipis kallpasapa runaj wasinman yaykuyta atinman, kapuyninta qhechoj, manachus ñawpajta chay runata wataykunmanraj chayqa? Chay runata wataykusparajpuni, pipis paypa wasinpi kaj chhikata suwakapunman.

³⁰ Pichus mana noqaman sayasqa kajqa contraypi kashan, pitajchus noqawan ruwanayta mana ruwajqa contraypi ruwan.

³¹ Chayrayku niykichej: Diosqa runakunaj ima juchankutapis, tukuy mana allin rimasqankutapis pampachayta atin. Pitajchus Santo Espíritoj contranta millayta riman chayrí, chay juchanqa mana pampachasqachu kanqa.

³² Sichus pipis Runaj Churinpa contranta millayta riman chayqa, chay juchan pampachasqa kanqa. Sitajchus pipis Santo Espíritoj contranta riman chayrí, mana chay juchaqa pampachasqachu kanqa kay p'unchaypi, nitaj jamoj p'unchaypipis.

Sach'ataqa poqoyninnejta rejsinchej

³³ Allin sach'aqa allin poqoyta poqon. Mana allin sach'arí mana allin poqoytachu poqon. Chayrayku sach'ataqa poqoyninnejta rejsinchej.

³⁴ Qankuna venenoyoj katarikuna jina kankichej. Imaynatataj allin kajta parlawajchej, qankuna mana allin runakuna kashaspari? Imawanchus runaj sonqon junt'a kashan, chayman jina parlan.

³⁵ Sumaj runaqa allinta parlan, imaraykuchus sonqonqa allin imakunawan junt'a kashan. Millay runarí mana allin kajta parlan, imaraykuchus sonqonqa mana allinkunawan junt'a kashan.

³⁶ Chayrayku niykichej: Juicio p'unchaypeqa tukuy runakuna cuentata qonqanku tukuy qhasi manakajta parlasqankumanta,

³⁷ imaraykuchus parlasqaykiman jina cheqan runapaj rejsisqa kanki, manachayrí juchachasqa kanki, nispa.

Wakinkuna t'ukuna ruwanata mañanku

³⁸ Uj kuti Diospa kamachisqanmanta wakin yachachejkuna, fariseokunawan ima Jesusta nerqanku: Yachachej Wiraqochi, runaj mana jayk'aj rikusqan t'ukunata ruwanaykita rikuyta munayku Diosmanta jamusqaykita yachanaykupaj, nispa.

³⁹ Jesustajrí paykunaman kuticherqa: Qankunaqa millayta ruwaj kankichej, qhenchachakojtaj. Chayrayku runaj mana jayk'aj rikusqan t'ukunata ruwanayta mañankichej. Chaywanpis, mana waj t'ukunata rikuchisqaykichejchu, manachayqa, Diosmanta sut'inchaj Jonaswan imachus karqa, chayllata.

⁴⁰ Imaynatachus Jonás jatun challwaj wijsanpi kinsa p'unchayta, kinsa tutatawan karqa, ajinallatataj Runaj Churinpis kinsa p'unchayta, kinsa tutatawan jallp'aj sonqonpi kanqa.

⁴¹ Chantá Nínive llajtayojkunaqa juiciopi jatarimuspa, kunan p'unchaypi tiyakojkunata juchachanqanku, imaraykuchus Jonás willarajtinkama, paykuna Diosman kutirikusqanku. Kunantajrí Jonasmanta aswan kuraj kaj kaypi kashan.

⁴² Chantá juicio p'unchaypi, uray suyumanta qoyapis sayarispa, kay runakunata juchachallanqataj, imaraykuchus qoyaqa karu jallp'amanta jamusqa Salomonpa yachayninta uyarej. Kunantajrí Salomonmanta aswan kuraj kaypi kashan, qankunataj mana uyariyta munankichejchu.

Runamanta llojsej supaymanta rijch'anachina

⁴³ Jayk'ajchus runamanta millay supay llojsin chaypacha, payqa ch'aki jallp'anejta purin samarikuyta mask'aspa. Mana tarispataj, nin:

⁴⁴ Kutipusaj, pimantachus llojsimorqani, chayman, nispa. Chayaspataj, pay reparan chay runa sumaj pichasqa, k'uchunchasqa, ch'usaj wasi jina kashasqanta.

⁴⁵ Chantá rispa, qanchis supaykunatawan pusaykun paymanta aswan millaykunata. Paykunataj chay runaman yaykuspa, chaypi tiyakapunku. Jinapi chay runaj kawsaynenqa aswan millayman tukupun, ñawpaj kasqanmanta nisqaqa. Ajinallataj kanqa kunan tiempo millayta ruwaj runakunawanpis, nispa.

Jesuspa maman, wawqenkunawan

⁴⁶ Jesús runakunaman parlashajtillanraj, maman, wawqenkuna ima jawapi suyasharqanku, paywan parlayta munaspa.

⁴⁷ Jinapi Jesusman willacherqanku: Mamayki, wawqeykikuna ima jawapi mask'ashasunku, qanwan parlariyta munaspa, nispa.

⁴⁸ Jesustajrí kuticherqa: Pikunatataj mamaypaj, wawqeykunapaj ima qhawaniri? nispa.

⁴⁹ Chantá makinwan yachachisqankunata rikuchispa, nerqa: Kaykunamari mamay, wawqeykunapis kanku.

⁵⁰ Pichus janaj pachapi kashaj Tataypa munayninta ruwajmari wawqey, panay, jinallataj mamaypis, nispa.