San Mateo 10 - DIOSPA QHELQACHISQ

Jesús chunka iskayniyoj kuraj kachankunata ajllan

¹ Chantá Jesús chunka iskayniyoj yachachisqankunata wajyaspa, paykunaman atiyta qorqa supaykunata runamanta qharqonankupaj, jinataj imaymana onqoykunamanta, nanaykunamantawan ima runakunata qhaliyachinankupaj.

² Chay chunka iskayniyoj kuraj kachankunaj sutinku kaykuna kanku: Ñawpaj kaj Simón, Pedro nisqa, wawqen Andreswan, Zebedeoj churinkuna Santiagowan, Juanwan ima.

³ Kallarqankutaj Felipe, Bartolomé, Tomás, impuestota cobraj Mateo, Alfeoj churin Santiago, Tadeo,

⁴ cananeo nisqa Simón, Judas Iscariote ima, pichus Jesusta jap'ichinan karqa, chay.

Jesusqa kuraj kachankunata kachan

⁵ Jesús chay chunka iskayniyoj kuraj kachankunata kay jinata kamachispa kacharqa: Mana judío kajkunaman ama rinkichejchu, nitaj Samaria jap'iyman yaykunkichejchu.

⁶ Manachayqa Israel ayllullaman riychej, pikunachus chinkasqa oveja jina kanku, chaykunallaman.

⁷ Rispataj, willaramuychej: Diospa janaj pacha kamachiynenqa qayllapiña kashan, nispa.

⁸ Chantá onqosqakunata qhaliyachiychej, wañusqakunatataj kawsarichiychej. Jinallataj llejti onqoyniyojkunata qhaliyachispa llimphuchaychej, supaykunatapis runakunamanta qharqoychej. Qankunaqa kay atiyta qhasilla jap'erqankichej. Chayrayku chay ruwasqaykichejmantaqa ama pagachikuychejchu.

⁹ Wayaqaykichejpi ama qolqeta, nitaj qorita, nillataj cobremanta phatatapis apakuychejchu.

¹⁰ Ñanpi mikhunaykichejpaj amallataj qoqawi wayaqata apaychejchu, nitaj iskay p'achakunata, nitaj waj juk'utakunatapis, nillataj varatapis. Ama imatapis apakuychejchu, imaraykuchus pichus llank'ajqa ruwasqanmanta mikhunanpuni tiyan.

¹¹ Qankuna may llajtamanpis, chayrí ranchomanpis chayaspaqa, pichus k'acha runa kajta mask'aychej, chay wasinpitaj qhepakuychej, waj llajtaman rinaykichejkama.

¹² Wasiman yaykuspataj, chaypi tiyakojkunata Diospa sutinpi napaykuychej.

¹³ Chay wasipi tiyakojkuna napaykusqaykichejta jap'ikunapaj jinachus kankuman chayqa, Dios paykunata saminchanqa. Mana chaypaj jina kajtinkurí, Dios paykunata mana saminchanqachu.

¹⁴ Sichus pillapis wasinkuman mana wajyarikusunkichej, nitaj parlasqaykichejtapis uyarisunkichej chayqa, chay wasimanta, chayrí chay llajtamanta llojsiychej, chakiykichejmanta jallp'ata thalarakuspa, ajinamanta mana allin ruwasqankuta yachanankupaj.

¹⁵ Noqataj sut'ita niykichej: Juicio p'unchaypeqa chay llajtayojkunapaj aswan ñak'ariy kanqa, Sodomapi, Gomorrapi tiyakojkunamanta nisqaqa, astawanraj, nispa.

Jamoj p'unchaykunapi ñak'ariykuna

¹⁶ Kunanqa, noqa kachashaykichej ovejatapis atojkunaj chawpinkuman kachashayman jina. Qankunarí katarikuna jina sumaj yuyayniyoj kaychej, urpikuna jinataj llamp'u sonqoyoj.

¹⁷ Allinta qhawakuychej runakunamanta, imaraykuchus juntaman qankunata pusaspa, tantakuna wasikunapi jasut'ichisonqachej.

¹⁸ Noqaraykutaj llajtata kamachejkunaman, kuraj kamachejkunaman ima pusasonqachej. Chantá, ñawpaqenkupi paykunaman, mana judío kajkunamanpis noqamanta testigo jina willankichej.

¹⁹ Kamachejkunaman apachisojtiykichej, ama phutikunkichejchu imaynatachus parlanaykichejmanta, chayrí imatachus ninaykichejmanta. Chaypacha Dios imatachus parlanaykichejta yuyaychasonqachej.

²⁰ Mana qankunallachu parlankichej, astawanqa Tata Diosniykichejpa Espíritun qankunanejta parlanqa.

²¹ Chaypachaqa uj ayllupi runaqa wawqenta wañuchinankupaj jap'ichenqa, tatapis wawanta jap'ichillanqataj. Wawakunapis tatankoj, mamankoj contranta oqharikuspa, paykunata kamachejkunawan wañuchichenqanku.

²² Noqarayku tukuy runakuna chejnisonqachej. Chaywanpis qankunamanta pichus tukukuykama sinch'ita sayaj, chay runata Dios qhespichenqa.

²³ Sichus mayqen llajtapipis chejnispa qhatiykachasunkichej chayqa, waj llajtamanñataj ayqeychej. Kayta sut'ita niykichej: Manaraj tukuy israelitakunaj llajtankukunapi willayta tukushajtiykichej, ñapis Runaj Churenqa kutimonqaña, nispa.

²⁴ Yachakojqa yachachejninmanta mana aswan kurajchu, nitaj wata runapis patronninmanta aswanchu.

²⁵ Yachakojpajqa walej yachachejnin jina kanan, wata runapajpis patronnin jina kanan. Jinallataj, noqatachus Beelzebú sutiwan sutichawanku chayqa, imatarajchus qankunata sutichasonqachej, nispa. Ajinata Jesús kachankunata nerqa.

Pitataj manchachikusunri?

²⁶ Jesús nillarqataj: Chayrayku, ama runakunata manchachikuychejchu. Tukuy pakasqa kajpis, jinallataj mana sut'inchasqa kajpis sut'inchakonqapuni.

²⁷ Imatachus laqhapi nisqaykichej, chaytaqa qankuna sut'i p'unchaypi niychej. Pakaypi uyarisqaykichejtapis wasi patamanta qhaparispa willaychej.

²⁸ Ama qankunata wañuchejkunata manchachikuychejchu, imaraykuchus paykuna almaykichejtaqa mana imanayta atinkuchu. Aswanpis, Diostamin manchachikuychej, imaraykuchus pay wañuchisuspa, lawrashaj nina qochaman wijch'uykusuyta atin.

²⁹ Manachu runakuna iskay p'isqetutapis phisullapi vendenku? Chaywanpis, Tata Diosniykichej mana munajtenqa, ni uj p'isqetullapis pampaman urmanchu.

³⁰ Jinallataj Diospis qankunamanta mana qonqanchu. Umaykichejpi chujchaykichej mashkhachus kasqanta yachan.

³¹ Chayrayku ama manchachikuychejchu, imaraykuchus qankunaqa aswan valorniyoj kankichej ashkha p'isqokunamanta nisqaqa.

Jesucristojta kasqanmanta rimarej

³² Sichus pipis runakunaj ñawpaqenpi yachachisqay kasqanta rimarenqa chayqa, noqapis janaj pachapi kashaj Tataypa ñawpaqenpi nisaj: Payqa noqajtamin, nispa.

³³ Chantá, sichus pipis runakunaj ñawpaqenpi mana rejsiwaj tukonqa chayqa, noqapis payta mana rejsisajchu janaj pachapi kashaj Tataypa ñawpaqenpi.

Jesusrayku t'aqanaku

³⁴ Ama yuyaychejchu noqa kay pachaman allin kawsayta apamoj jamusqayta. Aswanpis mana allin kawsayta apamuni, runakunatataj t'aqanachej jamuni.

³⁵ Noqaqa jamuni uj runaj churin tatanpa contranpi kananpaj, jinallataj uj ususi mamanpa contranpi kananpaj, ñojch'apis suegranpa contranpi.

³⁶ Sapa ujpata ayllun ukhullamantataj awqan rikhurenqa.

³⁷ Pichus tatanta, chayrí mamanta noqamanta astawan munakojqa mana noqajta kananpaj jinachu. Ajinallatataj, sichus pipis churinta, chayrí ususinta noqamanta astawan munakun chayqa, nillataj payqa noqajta kananpaj jinachu.

³⁸ Jinallataj manachus pipis cruzninta oqharispa qhepayta jamunman chayqa, payqa mana noqajta kananpaj jinachu.

³⁹ Pichus noqata kasunawanmanta nisqa kawsaynin aswan kasqanta qhawanman chayqa, payqa mana wiñay kawsayman yaykonqachu. Chaywanpis pichus noqarayku kawsayninta mana may kasqanta qhawanchu, chay runa wiñay kawsayman yaykonqa.

T'inkakunamanta

⁴⁰ Sichus pipis qankunata wajyarikusunkichej chayqa, noqata wajyarikushawan. Pichus noqata wajyarikuwajtaj Kachamuwajniyta wajyarikushan.

⁴¹ Sichus pipis Diosmanta sut'inchajta wajyarikun Diosmanta sut'inchaj kasqanrayku chayqa, payqa Diosmanta sut'inchaj jinallataj t'inkata jap'enqa. Sichus pipis cheqan runata wajyarikun cheqan runa kasqanrayku chayqa, paypis cheqan runa jinallataj t'inkata jap'enqa.

⁴² Sichus pipis yachachisqaykunamanta pisipaj qhawasqa kajman uj vaso yakullatapis jaywarin yachachisqay kasqanrayku chayqa, kayta sut'itapuni niykichej: Chay runaqa t'inkata jap'enqapuni, nispa.