San Mateo 1 - DIOSPA QHELQACHISQ

Jesuspa ñawpa tatankunaj sutinku

¹ Kayqa Jesucristoj ñawpa tatankunaj mirayninmanta sutinkuna. Jesusqa Davidpa mirayninmanta karqa, Abrahampa mirayninmantawan.

² Abrahamqa Isaacpa tatan karqa, Isaactaj Jacobpata. Jacobtaj Judajta, wawqenkunajtawan tatanku karqa.

³ Judaqa Farespata, Zerajtawan tatanku karqa, mamankutaj Tamar karqa. Farestaj Esronpata tatan karqa, Esrontaj Arampata.

⁴ Aramqa Aminadabpa tatan karqa, Aminadabtaj Nasonpata, Nasontaj Salmonpata.

⁵ Salmonqa Boozpa tatan karqa, mamantaj Rajab. Booztaj Obedpa tatan karqa, Obedpa mamantaj Rut, Obedtaj Yesejpata tatan karqa.

⁶ Yesetaj kuraj kamachej Davidpa tatan karqa. Kuraj kamachej Davidqa Salomonpa tatan karqa, Salomonpa mamantaj Betsabé karqa, pichus Uriaspa warmin karqa, chay.

⁷ Salomonqa Roboanpa tatan karqa, Roboantaj Abiaspata, Abiastaj Asajpata.

⁸ Asaqa Josafatpa tatan karqa, Josafattaj Joranpata, Jorantaj Uziaspata.

⁹ Uziasqa Yotanpa tatan karqa, Yotantaj Ajazpata, Ajaztaj Ezequiaspata tatan karqa.

¹⁰ Ezequiasqa Manasespa tatan karqa, Manasestaj Amonpata, Amontaj Josiaspata.

¹¹ Josiasqa Jeconiaspa tatan karqa, wawqenkunajtawan, maypachachus israelitakuna Babiloniaman apasqa karqanku, chaypacha.

¹² Israelitakuna Babiloniaman apasqa kasqankumantaña Jeconiasqa Salatielpa tatan karqa, Salatieltaj Zorobabelpata.

¹³ Zorobabelqa Abiudpa tatan karqa, Abiudtaj Eliaquinpata, Eliaquintaj Azorpa tatan karqa.

¹⁴ Azorqa Sadocpa tatan karqa, Sadoctaj Aquinpata, Aquintaj Eliudpata.

¹⁵ Eliudqa Eleazarpa tatan karqa, Eleazartaj Matanpata, Matantaj Jacobpata.

¹⁶ Jacobqa Josejpa tatan karqa, Josetaj Mariaj qosan karqa, Mariataj Jesuspa maman karqa, Jesustaj Diospa kachamusqan Cristo sutichasqa karqa.

¹⁷ Ajinaqa Abrahammanta Davidkama chunka tawayoj miraykuna karqa. Davidmantapacha israelitakuna Babiloniaman apachikusqankukama, chunka tawayoj miraykuna karqa. Chaymantataj Cristokama waj chunka tawayoj miraykuna kallarqataj.

Jesucristoj paqarikusqan

¹⁸ Jesucristoj paqarikusqan kay jina karqa: María mamanqa mañaqasqa karqa Josewan casarakunanpaj. Chaywanpis manaraj khuska tiyakushajtinku, Mariaqa wijsallisqa rikhurerqa Santo Espíritoj atiyninwan.

¹⁹ María wijsallisqa kasqanta yachaspa, Joseqa cheqan runa kasqanrayku, María warminta pakayllamanta saqerpayayta munasharqa, mana p'enqaypi payta rikhurichinanrayku.

²⁰ Joseqa Mariata saqerpayayta yuyashajtintaj, Diospa angelnin payman mosqoypi rikhurispa, nerqa: José, Davidpa ayllunmanta kaj, Mariawan casarakullay, amataj p'enqakuychu, imaraykuchus pay wijsallisqa kashan Santo Espíritoj atiyninnejta.

²¹ Mariaqa qhari wawayoj kanqa, chay wawatataj Jesús sutiwan sutichanki, imaraykuchus payqa ayllunta juchankumanta qhespichenqa, nispa nerqa chay angelqa.

²² Chay tukuy ima karqa, imaynatachus Dios ujnin sut'inchajninnejta sut'inchasqa, chayman jina junt'akunanpaj:

²³ Qharej mana chayasqan uj sipas wijsallikonqa, uj qhari wawatataj paqarichikonqa. Chay wawata Emanuel sutiwan sutichanqanku. Chay suti niyta munan: Diosqa noqanchejwan, nispa.

²⁴ José puñusqanmanta rijch'arispa, Diospa angelninpa kamachisqanman jina ruwarqa. Mariawan casarakuspataj, paywan khuska tiyakorqa.

²⁵ Chaywanpis Joseqa María warminwan mana puñuykorqachu, María wawanta paqarichikunankama. Josetaj chay wawata Jesús sutiwan suticharqa.