Marcos 9 - DIOSPA QHELQACHISQ

¹ Chaymanta Jesús nillarqataj: Kayta sut'ita niykichej: Kaypi kajkunamanta wakinniykichej mana wañuyta rikunkichejchu, Diospa kamachiynin manchay atiywan jamojta rikunaykichejkama, nispa.

Jesús waj jinaman tukun

² Chaymanta sojta p'unchayninman, Jesusqa Pedrota, Santiagota, Juantawan imalla uj jatun orqoman pusarqa. Chaypitaj paykunaj rikunankuta Jesús waj jinaman tukorqa.

³ P'achanqa k'ancharishaj, yuraj rit'iman jina tukorqa. Mana pipis t'ajsaspa chay jinata yurajyachiyta atinmanchu karqa.

⁴ Chaymantataj Eliaswan, Moiseswan ima rikhurimuspa, Jesuswan parlasharqanku.

⁵ Chantá Pedroqa Jesusta nerqa: Yachachej Wiraqochíy, walej kaypi kasqanchejqa. Chayrayku kunanqa kinsa ch'ujllata ruwasqayku: Ujta qanpaj, ujta Moisespaj, ujtataj Eliaspaj, nispa.

⁶ Jesuspa yachachisqankuna sinch'i mancharisqa kasqankurayku, Pedro imatachus parlashasqanta mana yacharqachu.

⁷ Chay jinallaman phuyu rikhurimuspa, paykunata p'ampaykorqa. Chay phuyu ukhumantataj Dios nimorqa: Kaymin munasqa Chureyqa. Paytamin uyariychej, nispa.

⁸ Chay yachachisqakuna ujtawan muyuyninkuta qhawarispataj, manaña chay ujkunata rikorqankuchu, manachayqa Jesús sapallantaña.

⁹ Chantá orqomanta urayk'amushajtinku, Jesús chay yachachisqankunata kamacherqa ama pimanpis imatachus rikusqankuta willanankuta, Runaj Churin wañusqamanta kawsarimpunankama.

¹⁰ Ajina yachachisqankunaqa imatachus rikusqankuta sonqonkupi waqaycharqanku. Chaywanpis paykunapuralla tapunakorqanku imatachus Jesús niyta munasqanta: Runaj Churin wañusqamanta kawsarimponqa, nispa.

¹¹ Chantá Jesusta taporqanku: Imaraykutaj Diospa kamachisqanmanta yachachejkuna ninku Eliasraj kutimunan kasqanta manaraj Diospa kachamusqan jamushajtinri? nispa.

¹² Jesustaj kuticherqa: Cheqamanta Eliasqa ñawpajta jamuspa, tukuy imata maychus kananman churanqa. Chaywanpis imaraykutaj Diospa Qhelqachisqanpi nin Runaj Churin mayta ñak'arinanta, qhesachasqataj kanantari?

¹³ Noqatajrí niykichej: Eliasqa jamorqaña, runakunataj munasqankuta paywan ruwarqanku, imaynatachus Diospa Qhelqachisqanpi kananta nerqa, ajinata, nispa.

Jesús uj waynamanta supayta qharqon

¹⁴ Jesús, kinsa yachachisqankuna ima, maypichus wakin yachachisqankuna kasharqanku, chayman chayaspa, muyuyninkupi ashkha runata rikorqanku. Jinallataj Diospa kamachisqanmanta wakin yachachejkunapis Jesuspa yachachisqankunawan churanakusharqanku.

¹⁵ Chaypi tantasqa runakunataj Jesusta rikuytawan t'ukorqanku, usqhayta rispataj, napaykorqanku.

¹⁶ Chantá Jesús yachachisqankunata taporqa: Imamantataj paykunawan churanakusharqankichejri? nispa.

¹⁷ Chaypi kajkunamantataj uj runa nimorqa: Yachachej Wiraqochíy, wawayta pusamorqayki, imaraykuchus payqa opayachej supayniyoj.

¹⁸ Maypi kaspapis sichus chay millay supay wawayta jap'in chayqa, ujllata pampaman wijch'uykun. Wawaytaj kirunta k'arurakuspa phosoqota ajtumun, k'aspipachataj wijch'ukun. Jinapi noqa yachachisqaykikunata chay millay supayta qharqonankuta nerqani, manataj aterqankuchu, nispa.

¹⁹ Jesustaj kuticherqa: Ay, noqapi mana atinikuyta atej runakuna. Mayk'ajkamataj qankunawan kasajri? Mayk'ajkamataj awantasqaykichejri? Chay waynata pusamuwaychejmá, nispa.

²⁰ Chantá usqhayllata chay waynata Jesusman pusarqanku. Chay supayrí Jesusta rikuytawan, chay kikinpi waynata sinch'ita thalarqa. Waynataj pampaman urmaspa, kayman jaqayman sunt'iykacharqa, siminmantataj phosoqota ajtumorqa.

²¹ Jesustaj waynaj tatanta taporqa: Mashkha unayñataj ajinari? nispa. Paytaj kuticherqa: Wawamantapacha ajina.

²² Sapa kuti millay supayqa wawayta ninaman, manachayqa yakuman wijch'uykun, payta wañuchiyta munaspa. Sichus qan imallatapis ruwayta atiwaj chayqa, khuyarikuwayku, ari, yanapariwaykutaj, nispa.

²³ Chantá Jesús nerqa: Imaraykutaj ninki: Atiwaj chayqa, nispari? Noqapi atinikojpajqa tukuy imapis atikun, nispa.

²⁴ Chayta uyariytawan, waynaj tatanqa qhaparerqa: Qanpi atinikuni. Chaywanpis yanapaway ari, qanpi aswan sinch'ita atinikunaypaj, nispa.

²⁵ Chantá ashkha runakuna tantakamushajta rikuspa, Jesús chay supayta k'amerqa: Kay waynata opayachej, joq'arayachej supay, noqa kamachiyki: Llojsiy paymanta, amataj ujtawan payman kutiykunkichu, nispa.

²⁶ Jinallapi chay supayqa sinch'ita qhaparerqa, waynata ujtawan manchayta thalaraspataj, paymanta llojserqa. Waynatajrí wañusqa jina choqakorqa. Chayta rikojkunataj nisharqanku: Wañupun, nispa.

²⁷ Jesusrí waynata makinmanta jap'ispa, aysarerqa, waynataj sayarerqa.

²⁸ Chantá Jesús uj wasiman yaykojtin, yachachisqankunalla paywan kashaspa, payta taporqanku: Imaraykutaj noqayku chay supayta mana qharqoyta aterqaykuchuri? nispa.

²⁹ Jesustaj kuticherqa: Chay jina supaytaqa Diosmanta mañakuspalla qharqoyta atiwajchej, waj jinamantaqa mana, nispa.

Jesús ujtawan wañunanmanta sut'inchan

³⁰ Chaymanta llojsispa, Jesuswan, yachachisqankunawan ima Galilea cheqanejta rerqanku. Jesustajrí chayninta rishasqanta mana pipis yachananta munarqachu,

³¹ imaraykuchus yachachisqankunamanpuni yachachiyta munasharqa. Paykunatataj ajinata nerqa: Runaj Churenqa runakunaj makinman jaywasqa kanqa, paykunataj wañuchenqanku. Chaywanpis kinsa p'unchayninmanta wañusqamanta kawsarimponqa, nispa.

³² Yachachisqankunatajrí chay nisqanta mana entienderqankuchu, tapuytapis manchachikorqanku.

Pitaj aswan kurajpaj qhawasqa kanman?

³³ Chay qhepata Jesusqa Cafarnaunman chayarqa, wasipiña kaspataj, yachachisqankunata taporqa: Imamantataj ñanpi churanakusharqankichejri? nispa.

³⁴ Paykunarí ch'inlla karqanku, imaraykuchus ñanpi churanakushasqanku, Dios kamachishajtenqa paykunamanta pichus kurajpaj qhawasqa kananmanta.

³⁵ Chantá Jesús tiyarikorqa, chunka iskayniyoj yachachisqankunata wajyaspataj, nerqa: Pillapis kurajpaj qhawasqa kayta munajqa tukuypa qhepanpi kanan tiyan, tukuypa kamachintaj, nispa.

³⁶ Chantá Jesús uj wawata oqharispa, yachachisqankunaj chawpinman sayaykucherqa, chaymantataj marq'arikuspa, paykunata nerqa:

³⁷ Pichus sutiypi kay wawa jina kajta, walejta jamunki, nispa jap'ikojqa noqata jap'ikushawan. Pichus noqata jap'ikuwajtaj, mana noqallatachu jap'ikuwan, aswanpis kachamuwajniy Tatayta, nispa.

Jesuspa sutinpi waj runa t'ukunata ruwan

³⁸ Chantá Juanqa Jesusta nerqa: Yachachejníy, noqayku uj runata rikorqayku, sutiykipi supaykunata qharqoshajta. Noqaykurí ama ajinata qharqonanta kamacherqayku, mana noqanchejwan kasqanrayku, nispa.

³⁹ Jesustajrí nerqa: Ama jark'aychejchu. Pillapis sutiypi t'ukuna imakunata ruwajqa mana noqapaj sajrata rimanmanchu.

⁴⁰ Mana contranchejpi kajqa noqanchejman kutisqa.

⁴¹ Sichus pipis sutiypi uj vaso yakullatapis jaywarisunkichejman Cristojta kasqaykichejrayku chayqa, sut'ita niykichej: Diosqa payman t'inkata qonqapuni, nispa.

Juchallichejqa jasut'isqa kanqa

⁴² Jesús nillarqataj: Sichus pipis noqapi atinikoj wawakunamanta ujllatapis juchallichinman chayqa, pay sinch'i jasut'isqa kanqa. Chay juchallichejpajqa aswan allin kanman molino rumita kunkanman wataykuspa, mama qochaman choqaykunankoqa.

⁴³ Chayrayku sichus makiyki juchallichisunki chayqa, khuchurpariy. Aswan allin kanman ch'ulla makilla kashaspa wiñay kawsayman yaykunaykeqa, iskaynin makiyoj kaspa lawrashaj nina qochaman yaykunaykimanta nisqaqa, maypichus nina mana wañunchu, chayman.

⁴⁴ Chaypeqa khurukunapis mana wañunkuchu, nitaj jayk'ajpis nina wañunchu.

⁴⁵ Sitajchus chakiyki juchallichisunki chayqa, khuchurpariy. Aswan allin kanman ch'ulla chakilla kaspa wiñay kawsayman yaykunaykeqa, iskaynin chakiyoj kaspa lawrashaj nina qochaman choqasqa kanaykimanta nisqaqa.

⁴⁶ Chaypeqa khurukunapis mana wañunkuchu, nitaj jayk'ajpis chay nina wañunchu.

⁴⁷ Chantá sichus ñawiyki juchallichisunki chayqa, orqhorpariy. Aswan allin kanman ch'ulla ñawilla kaspa Diospa kamachiyninman yaykunaykeqa, iskaynin ñawiyoj kaspa lawrashaj nina qochaman choqasqa kanaykimanta nisqaqa.

⁴⁸ Chaypeqa khurukunapis mana wañunkuchu, nitaj jayk'ajpis chay nina wañunchu.

⁴⁹ Tukuy runaman ñak'ariykuna nina jina jamonqa, imaynachus kasqanku sut'ita yachakunanpaj.

⁵⁰ Kacheqa sumajmin. Chaywanpis kachichus q'aymayanman chayqa, imaynatataj watejmanta k'araman kutinmanri? Jinallataj qankunapis sumaj kachi jina kaychej, ujkuna ujkunawantaj allinta kawsakuychej, nispa. Ajinata Jesús yachacherqa.