Marcos 8 - DIOSPA QHELQACHISQ

Jesús 4.000 runakunaman mikhuchin

¹ Uj p'unchay, ashkha runakuna Jesusta uyarinankupaj tantakamojtinku, ujtawan mana imapis mikhunankupaj karqachu. Jesustaj yachachisqankunata wajyaspa, nerqa:

² Kay runakunamanta khuyarikuni, imaraykuchus kinsa p'unchaytaña noqawan kashanku, manataj imapis mikhunankupaj kanchu.

³ Sichus mana mikhusqatachu wasinkuman kachapuyman chayqa, ichapis ñanpi sayk'uspa llawch'iyankuman, imaraykuchus wakenqa karumanta jamunku, nispa.

⁴ Chantá Jesuspa yachachisqankuna kuticherqanku: Kay ch'inpi, maypitaj t'antata tarisunman, kay chhika runakunaman mikhuchinanchejpajri? nispa.

⁵ Jesustajrí paykunata taporqa: Mashkha t'antataj tiyapusunkichejri? nispa. Paykunataj kuticherqanku: Qanchis t'antalla tiyan, nispa.

⁶ Chantá Jesús runakunata pampapi tiyarakunankuta kamacherqa. Chaymantataj chay qanchis t'antata jap'ispa, Diosman pachis nerqa. T'antata partispataj, yachachisqankunaman jaywarqa, runaman rak'iranankupaj. Paykunataj ajinata ruwarqanku.

⁷ Paykunajta pisilla challwitankupis kallarqataj. Chayrayku Jesús chaykunamantapis Diosman pachis nispa, runakunaman rak'iranankuta kamachillarqataj.

⁸ Ajinamanta chay runakuna sajsakunankukama mikhorqanku, Jesuspa yachachisqankunataj puchojta qanchis canasta junt'ata oqharerqanku.

⁹ Chayta mikhojkuna 4.000 jina karqanku. Chaymantataj Jesús paykunata kachaporqa.

¹⁰ Chantá Jesús yachachisqankunawan boteman yaykuspa, Dalmanuta cheqaman rerqanku.

Fariseokuna t'ukuna señalta ruwananta mañanku

¹¹ Chantá fariseokuna jamuspa, Jesuswan churanakuyta qallarerqanku. Payta pantachiyta munaspataj, paykuna janaj pachamanta runaj mana jayk'aj rikusqan t'ukunata ruwananta mañarqanku, ajinata Diosmantapuni jamusqanta yachanankupaj.

¹² Jesustajrí ukhuta samarispa, paykunata nerqa: Imaraykutaj qankuna runaj mana jayk'aj rikusqan t'ukunata ruwanayta mañakushankichejpuniri? Kayta sut'ita niykichej: Mana ima t'ukunatapis rikuchisqaykichejchu, nispa.

¹³ Chantá paykunata saqerparispa, yachachisqankunawan ujtawan boteman yaykorqa qochaj chimpanman rinankupaj.

Fariseokunaj levaduranku

¹⁴ Chaypacha Jesuspa yachachisqankuna qoqawita apayta qonqapusqankurayku, botepiña kashaspa, uj k'ata t'antayojlla kasqankuta repararqanku.

¹⁵ Jinapi, Jesús paykunata ajinata k'amerqa: Allintapuni qhawakuychej fariseokunaj levadurankumanta, jinallataj Herodespa levaduranmantapis, nispa.

¹⁶ Jesuspa yachachisqakunatajrí paykunapura ninakusharqanku: Mana t'antata apakamusqanchejraykuchá chayta nishawanchej, nispa.

¹⁷ Jesús imatachus parlashasqankuta yachaspa, paykunata ujtawan k'amerqa: Imaraykutaj mana t'anta kasqanrayku siminakushankichejri? Manarajchu yachankichej, nitajchu entiendeyta atinkichej? Rumi sonqollarajpunichu kankichej?

¹⁸ Ñawiyoj kashaspapis, manachu rikunkichej? Ninriyoj kashaspapis, manallatajchu uyarinkichej? Manachu yuyarikunkichej

¹⁹ imaynatachus phishqa t'antata partispa, 5.000 runakunaman mikhuchisqayta? Chaypacha mashkha canasta junt'atataj puchoj t'antata oqharerqankichej? nispa. Paykunataj kuticherqanku: Chunka iskayniyoj canastata, nispa.

²⁰ Chantá Jesús tapullarqataj: Qanchis t'antawan 4.000 runakunaman mikhuchisqaymantarí, mashkha canasta junt'atataj puchoj t'antata oqharerqankichej? nispa. Paykunataj nerqanku: Qanchis canastata, nispa.

²¹ Jesustaj nerqa: Jina kajtenqa, manarajpunichu entiendenkichej? nispa.

Jesús Betsaida llajtapi ñawsa runata qhawarichin

²² Chay qhepata Jesuswan, yachachisqankunawan ima Betsaida llajtaman chayarqanku. Jinapi runakunaqa Jesusman uj ñawsa runata pusamuspa, llankhaykunanta qhaliyachinanpaj mañarqanku.

²³ Jesustaj ñawsa runata makinmanta jap'ispa, llajtamanta jawaman pusarqa. Chaymantataj ñawsa runaj ñawinman thoqaytawan, makinwan payta llankhaykuspa, taporqa: Imatapis rikunkiñachu? nispa.

²⁴ Chay runataj tukuynejman qhawarispa, nerqa: Runakunata chharpullata rikushani, sach'akuna purishankumanpis jina, nispa.

²⁵ Chantá Jesús ujtawan makinwan chay runaj ñawinta llankhaykorqa. Kay kutipitaj chay runa allinta rikorqa, tukuy imatataj sut'ita rikorqa, ñawin qhaliyapusqanrayku.

²⁶ Chaymantataj Jesús chay runata wasinman kachapuspa, nerqa: Wasiykiman ripuspa, ama llajtanejtachu rinki, nispa.

Pedro nin Jesusqa Diospa Kachamusqan kasqanta

²⁷ Chaymanta Jesús yachachisqankunawan Cesarea Filipo cheqanejpi ranchokunaman rerqa. Ñanta rishajtinkutaj, Jesús yachachisqankunata taporqa: Runakunaqa pi kasqaytataj ninkuri? nispa.

²⁸ Paykunataj kuticherqanku: Wakinkunaqa Bautizaj Juan kasqaykita ninku, wajkunataj Elías kasqaykita, wakinkunataj Diosmanta mayqen sut'inchajchá, nispa ninku.

²⁹ Chantá Jesús tapullarqataj: Qankunarí pi kasqaytataj ninkichejri? nispa. Pedrotaj kuticherqa: Qanqa Diospa kachamusqan Cristo kanki, nispa.

³⁰ Jinapi Jesús yachachisqankunata mayta kamacherqa amapuni pichus pay kasqanta pimanpis willanankuta.

Jesús wañunanmanta sut'inchan

³¹ Chaymanta Jesusqa yachachisqankunaman kay jinata yachachiyta qallarerqa: Noqa Runaj Churenqa maytapuni ñak'arisaj. Jinallataj kurajkuna, kuraj sacerdotekuna, Diospa kamachisqanmanta yachachejkuna ima qhesachawanqanku, wañuchiwanqankutaj. Chaywanpis kinsa p'unchaymanta kawsarimpusaj, nispa.

³² Ajina sut'ita paykunaman willajtin, Pedroqa Jesusta wajnejman pusaspa, k'amiyta qallarerqa.

³³ Chantá Jesusqa yachachisqankunaman kutirispa, Pedrotañataj k'amerqa: Riy kaymanta, Supay Satanás. Qanqa mana Diospa munasqanman jinachu yuyashanki, manachayqa runa jinalla, nispa.

³⁴ Chaymanta Jesús yachachisqankunata, chay tantasqa runakunatawan wajyaspa, nerqa: Pillapis yachachisqay kayta munajqa munasqanman jinalla purinanta saqechun, cruzninta oqharispataj, qhepayta jamuchun.

³⁵ Pichus noqata kasunawanmanta nisqa kawsaynin aswan kasqanta qhawajqa, mana wiñay kawsayman yaykonqachu. Chaywanpis noqarayku, chantá sumaj willayrayku pichus kawsayninta mana may kasqanta qhawanchu, chay runaqa wiñay kawsayman yaykonqa.

³⁶ Ima allintaj runapaj kanman, sichus kay pachaj tukuy kapuyninta jap'ispapis mana wiñay kawsayman yaykunmanchu chayqa?

³⁷ Manachayqa, imatataj pipis paganman wiñay kawsayniyoj kananpajri?

³⁸ Sichus pipis noqamanta chantá nisqaymantawan kay khuchichakoj juchasapakunaj ñawpaqenkupi p'enqakun chayqa, noqa Runaj Churinpis chay runamanta p'enqakullasajtaj, maypachachus Tata Diosniypa jatun kayninpa lliphipiyninpi, ajllasqa angelninkunawan kutimusaj, chaypacha, nispa.