Marcos 6 - DIOSPA QHELQACHISQ

Nazaretpi Jesusta qhesachanku

¹ Chaymanta llojsispa, Jesusqa Nazaret llajtanman kutirerqa. Yachachisqankunapis paywan khuska rillarqankutaj.

² Samarina p'unchay chayamojtintaj, Jesusqa tantakuna wasipi yachachiyta qallarerqa. Chaypacha ashkha runakuna Jesuspa yachachisqanta uyarispa, t'ukorqanku, ninakorqankutaj: Kay runari, maypitaj kay tukuy imata yachamorqari? Imaynamantataj kay jinatapuni yachanri? Imaynamantataj kay t'ukuna ruwaykunatapis ruwanri?

³ Manachu payqa carpinterolla, Mariaj churintaj? Manachu Santiago, José, Judas, Simón ima wawqenkuna kanku? Manachu panankunapis kay llajtanchejpi noqanchejwan khuska tiyashankuri? nispa. Ajinata Jesusta qhesacharqanku.

⁴ Jesustajrí paykunata nerqa: Diosmanta sut'inchajtaqa mayllapipis allinpaj qhawanku. Chaywanpis kikin llajtanpi, ayllun ukhupi, wasinpi ima mana jinachu, nispa.

⁵ Chayrayku chaypeqa Jesús mana ni ima t'ukuna ruwaykunata ruwayta aterqachu. Wakin onqosqa runakunallata llankhaykuspa, qhaliyacherqa.

⁶ Chaywanpis pay mayta t'ukorqa chay runakuna paypi mana atinikusqankumanta. Chantá Jesús chay muyuynintinpi llajtakunaman rerqa, Diosmanta yachachispa.

Jesús yachachisqankunata kachan

⁷ Chaymantataj chunka iskayniyoj yachachisqankunata wajyaspa, paykunata iskaymanta iskay kacharqa. Jinallataj paykunaman atiyta qorqa, millay supaykunata runamanta qharqonankupaj.

⁸ Paykunata kamacherqa ama imatapis ñanpaj apakunankuta, ni wayaqatapis, ni qoqawitapis, nitaj qolqetapis qara chumpinkupi, manachayqa varallata.

⁹ Juk'utayoj rinanku karqa chaypis, mana waj p'achata mudakunankupaj apanankuchu karqa.

¹⁰ Chantá Jesusqa yachachisqankunata nillarqataj: Mayman rispaqa, uj wasillapi qhepakuychej, chay llajtamanta ripunaykichejkama.

¹¹ Sichus maypipis mana wajyarisunkichejmanchu, nitaj uyarisunkichejmanchu chayqa, chakiykichejpi jallp'ata thalarakuspa, chaymanta ripuychej, ajinamanta mana allin ruwasqankuta yachanankupaj, nispa.

¹² Ajina yachachisqankunaqa chaymanta puririspa, tukuy runaman willaramorqanku juchankumanta Diosman kutirikunankuta.

¹³ Jinallataj paykunaqa ashkha supaykunata runamanta qharqorqanku, ashkha onqosqakunatapis aceitewan jawispa, qhaliyacherqanku.

Bautizaj Juanta wañuchinku

¹⁴ Chaypacha kuraj kamachej Herodesqa Jesusmanta parlajta uyarerqa, imaraykuchus Jesús imatachus ruwasqanqa tukuynejpiña yachakorqa. Wakinkunataj nej kanku: Kayqa Bautizaj Juanchá, pichus wañusqanmanta kawsarimpun, chay. Chayraykumá payqa kay jina atiyniyojpuni, t'ukuna imakunatataj ruwan, nispa.

¹⁵ Wakintaj nej kanku: Payqa Diosmanta sut'inchaj Eliaschá, nispa. Wajkunatajrí nej kanku: Payqa Diosmanta ñawpa sut'inchajkuna karqanku, chaykuna jinallataj, nispa.

¹⁶ Herodestajrí chayta uyarispa, nerqa: Kayqa Bautizaj Juanpuni. Noqa paypa umanta qholucherqani chaypis, kunan wañusqamanta kawsarimusqa, nispa.

¹⁷ Ñawpajpi Herodesqa wawqen Filipoj warmin Herodiasta qhechuspa, paywan casarakusqa. Chantá chay warmirayku kikin Herodesllataj, Juanta jap'ichispa, cadenawan watasqata wisq'aykuchisqa.

¹⁸ Chayta ruwasqa, imaraykuchus Bautizaj Juanqa Herodesta chay warmirayku k'amisqa: Mana allinchu wawqeykej warminta qhechunaykeqa, nispa.

¹⁹ Chayta Juan nisqanraykutaj Herodiasqa payta chejnikuspa, wañuchichiyta munasqa, manataj atisqachu.

²⁰ Herodesrí Juanta manchachikusqa, pay cheqan runa, allin kawsayniyoj kasqanrayku. Jinallataj Juanta ama imananankumanta qhawasqa. Herodestaj Juanpa parlasqanta uyarispa, uma muyusqa rikhurisqa. Chaywanpis uyariyta munallajpuni.

²¹ Uj p'unchay Herodes diachakuspa, sumaj mikhunata wakichichisqa. Chaymantaj wajyachisqa kurajkunata, soldadota kamachejkunata, Galileapi atiyniyojkunata ima.

²² Chantá Herodiaspa ususin yaykumuspa, tukuypa ñawpaqenpi sumajta tususqa. Herodeswan, diachakuman wajyarisqakunawan ima chay sipaspa tususqanwan gustachikusqankurayku kuraj kamachejqa sipasta nisqa: Imatachus munasqaykita mañakuway, noqataj chayta qosqayki, nispa.

²³ Chantá tiluspa, Herodes nillasqataj: Tukuy ima mañakuwasqaykita qosqayki, kamachisqay suyoj khuskannintawanpis, nispa.

²⁴ Jinapi chay sipas llojsispa, mamanta tapumusqa: Imata qonawantataj mañakuymanri? nispa. Mamantaj kutichisqa: Bautizaj Juanpa umanta qosunanta mañay, nispa.

²⁵ Chantá sipasqa usqhayta kutiykuspa, kuraj kamachej Herodesta nisqa: Kunanpacha uj phampa chuwapi Bautizaj Juanpa umanta qoway, nispa.

²⁶ Chayta uyarispa, kuraj kamachej Herodesqa mayta phutikusqa. Chaywanpis, diachakuman tukuy wajyasqakunaj ñawpaqenpi tilusqanrayku, sipasmanqa manapuni mana niyta atisqachu.

²⁷ Chayrayku kuraj kamachej Herodes uj soldadota kachasqa Juanpa umanta qholuspa apamunanpaj.

²⁸ Chay soldadotaj carcelman rispa, Juanpa umanta qholurpariytawan, phampa chuwapi sipasman jaywasqa, sipastaj mamanman apasqa.

²⁹ Chantá Juanpa yachachisqankuna chayta yachaytawan, ayanta apakapuspa, p'ampamusqanku.

Jesús 5.000 runakunaman mikhuchin

³⁰ Jesuspa kuraj kachankunaqa kachasqa kasqankumanta kutimuspa, paywan tantakorqanku. Chantá tukuy ima ruwasqankumanta willarqanku, imatachus yachachisqankumanta ima.

³¹ Jesustaj paykunata nerqa: Jaku ch'in cheqanejman rinachej, chaypitaj tumpallatapis samarikusun, nispa. Chayta nerqa, imaraykuchus ashkha runakuna rispa jamuspa, paykunata ni mikhurikojtapis saqejchu kanku.

³² Ajinamanta paykunalla boteman yaykuspa, ch'in cheqanejman rerqanku.

³³ Chaywanpis ashkha runakuna Jesusta, yachachisqankunata ima rejta rikuspa, rejserqanku. Chayrayku tukuy llajtamanta usqhayllata chakipi kachaykukuspa, paykunamanta aswan ñawpajta qocha kantuman chayarqanku.

³⁴ Chantá Jesusqa botemanta urayk'uspa, ashkha runata rikorqa. Paytajrí paykunata khuyakuywan qhawarqa, mana michejniyoj oveja jina kasqankurayku. Chantá paykunaman tukuy imata Diosmanta yachachiyta qallarerqa.

³⁵ Inti yaykushajtinña, yachachisqankuna Jesusman qayllaykuspa, nerqanku: Ch'in cheqanejpi kanchej, ch'isiyaykushanñataj.

³⁶ Chayrayku kay runakunata kachapullayña, kay qayllapi wasikunamanta, ranchokunamanta ima mikhunata rantikamunankupaj, nispa.

³⁷ Jesustajrí yachachisqankunaman kuticherqa: Qankunamin paykunata mikhuchiychej, nispa. Paykunataj nerqanku: Pusaj killa qolqe ganasqanchejwan t'antata rantimusunman chaypis, manachá tukuyninkuman mikhuchisunmanchu, nispa.

³⁸ Jesús taporqa: Mashkha t'antataj kapusunkichejri? Rispa, qhawamuychej má, nispa. Paykunataj mashkhachus kasqanta yachaspa, Jesusman willarqanku: Phishqa t'antalla, iskay challwawan tiyan, nispa.

³⁹ Chantá Jesús yachachisqankunata kamacherqa qotu qotullata q'omer pampapi runakunata tiyarachinankuta.

⁴⁰ Chay runakunataj qotu qotulla tiyaykukorqanku, wakin pachaj t'aqapi, wakintaj phishqa chunka t'aqapi.

⁴¹ Chantá Jesús chay phishqa t'antata, iskay challwatawan makinpi jap'erqa, janajta qhawarispataj, Diosman chay mikhunarayku pachis nerqa. T'antata chhikaman partispataj, yachachisqankunaman jaywarqa paykuna runakunaman qonankupaj. Jinallataj iskay challwatapis jaywallarqataj, tukuyninkuman rak'iranankupaj.

⁴² Jinapi chay tukuy runakuna sajsakunankukama mikhorqanku.

⁴³ Chaymantataj, Jesuspa yachachisqankuna puchoj t'antata, puchoj challwatawan oqharispa, chunka iskayniyoj canastaman junt'acherqanku.

⁴⁴ Chay tukuy mikhojkunamanta qhari kajkunalla 5.000 karqanku.

Jesús yaku patanta purin

⁴⁵ Chaymanta Jesús yachachisqankunata nerqa boteman yaykunankuta, qocha chimpapi Betsaida llajtaman ñawpashanankupaj. Chaykamataj Jesusqa runakunata kachapusharqa.

⁴⁶ Runakunata kachapuytawantaj, pay orqoman wicharerqa Dioswan parlarikoj.

⁴⁷ Tutayaykojtin, botepi rejkunaqa chawpi qochapiña karqanku, Jesustajrí qocha kantupi sapallan kasharqa.

⁴⁸ Jinapi pay rikorqa yachachisqankunata ñak'ayllata boteta ñawpajman purichishajta, imaraykuchus ñawpaqenkumanta wayra manchayta phukumusharqa. Manaraj sut'iyashajtintaj, Jesús yaku patanta purispa, paykunanejman rerqa. Chaywanpis pay ñawpaykuyta munasharqa.

⁴⁹ Paykunatajrí yaku patanta purejta rikuspa, alma kasqanta yuyarqanku, qhaparerqankutaj.

⁵⁰ Chayta rikusqankuraykutaj tukuyninku manchachikuywan kharkatiterqanku. Jesustajrí ujllata paykunata nimorqa: Sonqochakuychej, noqa kani. Ama manchachikuychejchu, nispa.

⁵¹ Chantá Jesús boteman wicharisqantawan, wayra thañikaporqa. Chayta rikuspataj, yachachisqankuna mayta t'ukorqanku,

⁵² imaraykuchus Jesús t'antata ashkhayachisqanta rikorqanku chaypis, chay ruwasqan imatachus niyta munasqanta mana entiendeyta aterqankuchu, sonqonku rumiyasqa kasqanrayku.

Jesusqa Genesaretpi onqosqakunata qhaliyachin

⁵³ Qochata chimpaspa, Genesaret chaynejman chayarqanku, qocha kantupitaj boteta watarqanku.

⁵⁴ Botemanta urayk'ushajtinkutaj, runakunaqa Jesusta rejserqankupacha.

⁵⁵ Paykunataj maypichus Jesús kasqanta yachaspa, tukuynejman usqhayllata rerqanku, onqosqakunata phullupi wantuspa apamunankupaj.

⁵⁶ Maymanchá Jesús chayarqa, ch'innejman chayrí ranchokunaman, llajtakunaman ima, chaypi runakuna onqosqakunata calleman churaspa, Jesusmanta mañakorqanku p'achanpa kantullantapis llankharinankupaj. Jinapitaj tukuy llankhaykojkunaqa onqoyninkumanta qhaliyachisqa karqanku.