Marcos 5 - DIOSPA QHELQACHISQ

Jesús Gerasapi uj runamanta supaykunata qharqon

¹ Ajinamanta Jesús yachachisqankunawan qochaj chimpanpi kaj Gerasa cheqaman chayarqanku.

² Jesús botemanta urayk'usqantawantaj, supayniyoj uj runa panteonmanta llojsimuspa, taripaj jamorqa.

³ Payqa panteonpi tiyakoj, manataj pipis watayta atejchu ni cadenawanpis.

⁴ Ashkha kutitaña chakinta, makintapis cadenawan watasqanku, sapa kutitaj cadenatapis p'itiraj, manataj pipis atipayta aterqañachu.

⁵ Payqa tuta p'unchay qhaparispallapuni panteonpi, chayrí orqokunapi ima puriykachaj, rumiwantaj takarakoj.

⁶ Chay runaqa Jesusta karumantapacha rikuspa, payman t'ijorqa, paypa ñawpaqenmantaj qonqoriykukorqa.

⁷ Sinch'ita qhaparispataj, nerqa: Jesús, Patapi Kaj Diospa Churin, imá ruwanayki tiyan noqawanri? Diospa sutinpi mañakuyki ama ñak'arichinawaykita, nispa.

⁸ Chayta nerqa, imaraykuchus Jesús kamachisqa: Millay sajra supay, chay runamanta llojsiy, nispa.

⁹ Chantá Jesús chay supayta taporqa: Imá sutiyki? nispa. Paytaj kuticherqa: Suteyqa Tropa, imaraykuchus ashkha kayku, nispa.

¹⁰ Chayta niytawantaj, Jesusmanta mayta mañakorqa ama karuman wijch'unanta.

¹¹ Chaynejpi uj loma karqa, chaypitaj ashkha khuchikuna mikhusharqanku.

¹² Supaykunataj Jesusmanta mañakorqanku: Khuchikunaman kachawayku. Chaykunaman yaykojta saqewayku, nispa.

¹³ Chantá Jesús ajinata ruwanankuta saqerqa. Millay supaykunataj chay runamanta llojsiytawan, khuchikunaman yaykorqanku. Chay khuchikunaqa 2.000 jina karqanku. Jinapi imata jina phawaspa, qaqanta qochaman wijch'uykukorqanku, jeq'eqaspataj wañurarqanku.

¹⁴ Chayta rikuspa, khuchi michejkunaqa ayqerqanku, jinaspataj llajtapi, campopi ima runakunaman imatachus rikusqankuta willarqanku. Chayta uyarispataj, runakuna imachus kasqanta yachanankupaj jamorqanku.

¹⁵ Paykunaqa, Jesús maypichus kasharqa, chayman chayaspa, pichus ashkha supayniyoj karqa, chay runata p'achallisqataña rikorqanku. Sumaj yuyayninpiña kaspa tiyasharqa, paykunataj mancharikorqanku.

¹⁶ Rikojkunataj chay jamojkunaman willarqanku, imaynatachus millay supayniyoj karqa, chay runa qhaliyapusqanta, jinallataj khuchikunapis imaynatachus wañurasqankuta ima.

¹⁷ Chantá chay runakuna Jesusta mayta nerqanku chaynejmanta ripunanta.

¹⁸ Jesús boteman yaykushajtin, pichus millay supayniyoj karqa, chay runaqa Jesusmanta mañakorqa paywan khuska rejta saqenanta.

¹⁹ Jesustajrí mana paywan rinanta munarqachu, manachayqa chay runata nerqa: Wasiykiman kutipuy, chaypitaj aylluykikunaman willamuy, imakunatachus Tukuyta Kamachej Dios qanpaj ruwasqanta, maytataj khuyakususqanta ima.

²⁰ Ajinamanta chay runa riporqa. Chantá Decápolis llajtakunapi purerqa tukuyman willaraspa imatachus Jesús paypaj ruwasqanta, chayta uyarejkunataj mayta t'ukorqanku.

Jesusqa Jairoj ususinta kawsarichin, yawar apayniyoj warmitapis qhaliyachin

²¹ Gerasamanta Jesús ujtawan botepi qochaj chimpanman kutirerqa. Qocha kantupi kashajtintaj, ashkha runakuna payman tantakamorqanku.

²² Chantá tantakuna wasimanta ujnin kamachej Jairo sutiyoj jamullarqataj. Jesusta rikuytawantaj, ñawpaqenman qonqorikukuspa, maytapuni mañarikorqa:

²³ Ususiy wañupushanña. Jamuriy ari. Makiykiwan payta llankhaykuripuwanki, qhaliyaspa kutirinanpaj, nispa.

²⁴ Chantá Jesús Jairowan rerqa, ashkha runataj qhepanta rishasqankurayku, k'iskinakuspa payta ñit'isharqanku.

²⁵ Chay runa chawpipi uj onqosqa warmi kasharqa, paytaj chunka iskayniyoj watataña yawar apay onqoywan kasharqa.

²⁶ Payqa jampikamayojkunawan jampichikuspa, unaytaña ñak'arisqa, tukuy kapuyninta tukuchinankama. Chaywanpis mana imaynapi qhaliyayta atisqachu, manachayqa astawanraj chullchusharqa.

²⁷ Jesusmanta parlajta uyarisqanraykutaj, chay warmeqa runaj chawpinta qhepallata jamushaspa, Jesuspa p'achanta llankhaykorqa.

²⁸ Paytaj sonqonpi nisharqa: Sichus p'achallantapis llankhaykuyman chayqa, qhaliyapuyman, nispa.

²⁹ Jesuspa p'achanta llankhaykojtinpachataj, yawar apaynin ch'akiporqa, chay warmitaj reparakorqa onqoyninmanta qhaliyakapusqanta.

³⁰ Jesustajrí paymanta atiy llojsisqanta reparakorqa, runakunaman kutirispataj, taporqa: Pitaj p'achayta llankhaykuwanri? nispa.

³¹ Yachachisqankunaqa payman kuticherqanku: Runakuna k'iskikamuspa qanta ñit'imususqankuta rikushanki, qantaj tapushanki: Pitaj llankhaykuwanri? nispa.

³² Jesustajrí muyuyninta qhawallarqapuni, pichus llankhaykusqanta rikuyta munaspa.

³³ Jinapi chay warmeqa qhaliyapusqanta yachakuspa, manchariywan kharkatitispa Jesusman chimpaykorqa. Ñawpaqenman qonqoriykukuspataj, imatachus ruwasqanta rimarerqa.

³⁴ Jesustaj payta nerqa: Wawáy, noqapi atinikusqaykirayku qhaliyachisqa kanki. Kunanqa sonqo tiyaykusqa ripuy, imaraykuchus manaña ajinata onqoykunkichu, nispa.

³⁵ Chayta Jesús warmiman nishajtin, tantakuna wasipi kamachej Jairoj wasinmanta kamachikuna chayamorqanku. Paykunataj Jairota nerqanku: Ususiyki wañupunña, amaña Yachachejta jamunanta niychu, nispa.

³⁶ Jesustajrí chay willasqankuta mana uyarej tukuspa, Jairota nerqa: Ama llakikuychu, manachayqa noqapi atinikullaypuni, nispa.

³⁷ Jairoj wasinman rishajtinku, Jesús waj runakuna paywan rinankuta mana munarqachu, manachayqa Pedrota, Santiagota, wawqen Juanllatawan pusarqa.

³⁸ Chantá tantakuna wasipi kamachej Jairoj wasinman chayaspa, Jesusqa llakiywan waqashajta uyarerqa, chantá waqaspa qhaparejkunatawan ima rikorqa.

³⁹ Wasiman yaykuspataj, chay runakunata nerqa: Imamantá waqarikuspa, chay jinatapuni ch'ajwashankichejri? Kay ch'iriskaqa mana wañusqachu, manachayqa puñushallan, nispa.

⁴⁰ Chayta Jesús nisqanmanta asikorqanku. Jesustajrí chay tukuy runata jawaman llojsinankuta nerqa. Chantá chay ch'iriskaj tatanta, mamanta, paywan kajkunatawan ima pusaykuspa, maypichus ch'iriska kasharqa, chayman yaykorqa.

⁴¹ Makinmanta jap'ispataj, Jesusqa ch'iriskata nerqa: Talita kumi, nispa. Parlayninchejpi chay niyta munan: “Imillita, sayariy”, nispa.

⁴² Manaraj imallapi ch'iriskaqa sayarispa, puriyta qallarerqa. Payqa chunka iskayniyoj watayoj karqa. Chay ch'iriskata kawsashajta rikuspataj, runakuna maytapuni t'ukorqanku.

⁴³ Jesustajrí paykunata mayta kamacherqa ama pimanpis chay ruwasqanta willanankuta. Jinallataj ch'iriskaman mikhunata qonankuta, nerqa.