Marcos 4 - DIOSPA QHELQACHISQ

Tarpoj runamanta rijch'anachina

¹ Ujtawan Jesús yachachiyta qallarerqa Galilea qocha kantupi. Chaymantaj ashkha runakuna tantakamorqanku. Chayrayku Jesús boteman yaykuspa tiyarikorqa, runakunataj qocha kantupi kasharqanku.

² Jesustaj tukuy imata rijch'anachinawan paykunaman yachacherqa. Ujta yachachishaspa, kay jinata nerqa:

³ Kayta uyariychej: Uj runa tarpoj llojsisqa.

⁴ Grano mujuta t'akashajtintaj, wakin muju ñanman urmasqa, p'isqokunataj jamuspa, mikhukapusqanku.

⁵ Wakin mujoqa rumirara pisi jallp'ayojman urmasqa. Chay mujutaj usqhayllata p'utumusqa mana ukhu jallp'ayoj kasqanrayku.

⁶ Chaywanpis inti llojsimuspa, p'utumojta qawirparichisqa, mana allin saphiyoj kasqanraykutaj ch'akipusqa.

⁷ Wakin mujurí khishkarara qhora chawpinman urmasqa, qhorataj wiñaykuspa, p'utumojta p'ampaykusqanku. Chayrayku mana poqosqachu.

⁸ Wakin mujutajrí sumaj jallp'aman urmaspa, p'utumusqa, jinataj poqonankama sumajta wiñasqa. Poqoynintaj kay jina karqa: Wakinpi uj mujullamanta kinsa chunkata poqosqa, wakinpi sojta chunkata, wakinpitaj pachajta, nispa.

⁹ Chantá Jesús nerqa: Pichus nisqayta jap'ikuyta munajqa allinta uyarichun, nispa.

Imaraykutaj Jesús rijch'anachinawan yachachinri?

¹⁰ Aswan qhepaman Jesús sapallan kashajtin, chay qayllapi kajkuna, chunka iskayniyoj yachachisqankuna ima payman chimpaykuspa, chay rijch'anachinamanta taporqanku.

¹¹ Jesustaj kuticherqa: Imachus kanqa Dios kamachishajtin, chay pakasqa yachayta Dios qankunaman rejsichisunkichej. Waj runakunamanrí rijch'anachinallawan yachachina tiyan.

¹² Ñawpa qhelqakunapi kay jinata nin: Qhawashaspapis, mana yachakonqankuchu. Uyarishaspapis, mana entiendenqankuchu. Ajinamanta, Diosman mana kutirikonqankuchu, juchankupis manallataj pampachasqachu kanqa, nispa.

Jesús tarpojmanta rijch'anachinata sut'inchan

¹³ Chaymantataj Jesús paykunata taporqa: Manachu kay rijch'anachinata entiendenkichej? Imaynamantataj chantá waj rijch'anachinakunata entiendewajchejri?

¹⁴ Mujuta tarpojqa Diospa simi nisqanta willarajmin.

¹⁵ Wakin runaqa ñan patapi urmasqa muju jina kanku. Paykunaqa Diospa nisqanta uyarinku. Chaywanpis Supay Satanás jamuytawan, runaj sonqonpi tarpusqa Diospa nisqanta qonqachin.

¹⁶ Ajinallataj wakin runakuna rumirara jallp'a jina kanku, maymanchus muju t'akakusqa, chay jina. Paykunaqa Diospa nisqanta uyariytawankama, kusisqa jap'ikunku.

¹⁷ Chaywanpis mana allin saphichasqa kasqankurayku, mana unaytachu sayanku. Manachayqa Diospa nisqanta jap'ikusqankurayku llakiy jamojtin, chayrí qhatiykachasqa kanku chayqa, paykuna usqhayllata urmanku.

¹⁸ Wakin runakuna khishkarara jallp'a jina kanku, maymanchus muju t'akakusqa, chay jina. Paykuna Diospa nisqanta uyarinku.

¹⁹ Chantá sonqonkupi kay kawsaymanta phutikuykunawan, qhapajyayta munanawan, waj imakunata munapayaywan ima Diospa nisqanta p'ampaykunku. Chayrayku Diospa munasqanta mana ruwayta atinkuchu.

²⁰ Wakin runakunatajrí sumaj jallp'a jina kanku, maymanchus muju t'akakusqa, chay jina. Paykunaqa Diospa simi nisqanta uyarispa, sonqonkupi jap'ikunku, chaymantataj sumaj poqoyta jina rikuchinku. Chay runakunamanta wakenqa sapa mujumanta kinsa chunkata poqoj jina kanku, wajkuna sojta chunkata, wajkunataj pachajta, nispa.

Lamparamanta rijch'anachina

²¹ Chantá Jesús nillarqataj: Pillapis lamparata jap'ichispaqa, wich'iwan k'umpuykunmanchu, chayrí, puñuna uraman churaykunmanchuri? Mana, icharí? Manachayqa allinta k'anchananpaj lamparataqa patamanpuni churana.

²² Kikillantaj tukuy pakasqa kajpis, mana sut'inchasqa kajpis sut'inchakonqapuni.

²³ Pichus nisqayta jap'ikuyta munajqa allinta uyarichun, nispa.

²⁴ Jesús nillarqataj: Imatachus uyarisqaykichejta allinta watuychej. Imaynatachus wajkunawan ruwankichej, chay jinallatataj Dios qankunawan ruwanqa, chaymantapis astawanraj.

²⁵ Kapuyniyojmanqa Dios astawanraj qonqa. Mana kapuyniyojmantatajrí pisi kapusqantapis qhechonqa, nispa.

P'utoj mujumanta rijch'anachina

²⁶ Jesús nillarqataj: Diospa kamachiynenqa mujuta jallp'aman t'akaj runaman rijch'akun.

²⁷ Chay runaqa tuta puñun, p'unchaypitaj rijch'arin, chaykamataj mujoqa p'utumuspa, tuta p'unchay wiñan, mana paypa yachasqallan.

²⁸ Chantá jallp'aqa kikillanmanta p'utumoj yurata ñawpajta wiñachin, qhepanta espigachin, chantá sumaj granota espigapi poqochin.

²⁹ Trigo sumaj poqosqaña kajtintaj, runaqa hozewan ruthuyta qallarin, imaraykuchus ruthuna p'unchay chayamunña, nispa.

Mostaza mujumanta rijch'anachina

³⁰ Chaymanta Jesús nillarqataj: Imaynataj kanman Diospa kamachiynin? Ima rijch'anachinawantaj chaymanta yachachisunmanri?

³¹ Diospa kamachiynenqa mostaza mujuman rijch'akun. Chay mujoqa jallp'api tarpusqa mujukunamanta nisqa aswan juch'uysitu.

³² Jinapis tarpusqaña kaspa, tukuy qhorata atipanankama wiñan. P'alqankunaqa jatuchajta wiñanku, p'isqokunapis thansankunapi thapachakunku, nispa.

Jesús rijch'anachinawan yachachin

³³ Jesús chay jina rijch'anachinakunawan runakunaman Diospa nisqanta willaj, maychus entiendeyta atisqankuman jina.

³⁴ Jesusqa runakunaman rijch'anachinakunawanpuni yachachej. Yachachisqankunamantajrí sapallankupi kajtinku tukuy imamanta sut'inchaj.

Jesús sinch'i wayrata, phiñarikoj qochatawan thañichin

³⁵ Chay p'unchay ch'isiyashajtinña, Jesús yachachisqankunata nerqa: Jaku, qochaj chimpanman rinachej, nispa.

³⁶ Runakunata kacharparipuspataj, yachachisqankuna Jesusta chimpaman pusarqanku, mayqen botepichus kasharqa, chaypi. Waj botekunapipis wajkuna rillarqankutaj.

³⁷ Chantá may sinch'ita wayramuyta qallarerqa, yakupis qhollchoqeyaspa, boteman junt'aykusharqaña.

³⁸ Jesustajrí botej qhepannejpi sawnanaman umanta atiykukuspa, puñukaporqa. Chantá yachachisqankuna payta rijch'arichispa, nerqanku: Yachachejniyku, manachu llakikunki, yakuman chinkaykushanchejñaqa? nispa.

³⁹ Jesustajrí jatarimuspa, wayrata k'amerqa, qochatapis nerqa: Ch'in kay. Thañiriy, nispa. Wayrataj thañerqa, yakutaj tiyaykorqa.

⁴⁰ Chantá Jesús paykunatañataj nerqa: Imaraykutaj kay jinatapuni mancharinkichejri? Manachu noqapi atinikunkichej? nispa.

⁴¹ Paykunarí manchariywan t'ukuspa, ninakorqanku: Pitaj kay runari, wayrapis, mama qochapis payta kasunankupajri? nispa.