Marcos 3 - DIOSPA QHELQACHISQ

Jesús makin ch'akisqa runata qhaliyachin

¹ Watejmanta Jesús tantakuna wasiman yaykullarqataj, chaypitaj makin ch'akisqa uj runa kasharqa.

² Wakin runakuna chaypi kajkunamanta Jesusta wateqasharqanku, rikuyta munaspa samarina p'unchaypi qhaliyachenqachus, chayrí manachus, payta ch'ataykunankupaj.

³ Jesustajrí makin ch'akisqa runata nerqa: Jamuy, kaypi kajkunaj chawpinpi sayay, nispa.

⁴ Chantá Jesús runakunata taporqa: Samarina p'unchaypi ima ruwanataj allin kanman: Allin kajtachu, chayrí mana allin kajtachu? Runata yanapanachu, chayrí wañupojta saqenachu? nispa. Paykunatajrí ch'inlla karqanku.

⁵ Chaymanta Jesusqa phiñakuspa, muyuyninpi kajkunata qhawarerqa, paykunamantataj llakikorqa rumi sonqo kasqankurayku. Chay onqosqa runatataj nerqa: Makiykita jaywariy, nispa. Paytaj makinta jaywarejtinkama, makin qhaliyaporqa.

⁶ Chantá fariseokuna llojsiytawan, kuraj kamachej Herodesman sayasqa kajkunawan tantaykukuspa, Jesusta wañuchinankupaj yachachinakorqanku.

Ashkha runa qocha kantupi tantakunku

⁷ Chantá Jesús yachachisqankunawan Galilea qocha kantuman riporqa, jinallataj ashkha runakuna Galileamanta, Judeamantawan paypa qhepanta rerqanku.

⁸ Jesuspa t'ukunata ruwasqanmanta uyarisqankurayku runakuna Jerusalenmantapis jamullarqankutaj, Idumeamanta, Jordán mayu chimpamanta, chantá Tiroj, Sidonpa muyuyninmanta ima.

⁹ Chhika runakunata rikuspa, Jesusqa yachachisqankunata nerqa: Boteta wakichipuwaychej, runakuna k'iskikamuspa ama ñit'imunawankupaj, nispa.

¹⁰ Jesús ashkha runataña qhaliyachisqanrayku, tukuy onqosqa runa k'iskikamusharqanku Jesusta llankhaykunankupaj.

¹¹ Runakunapi kaj millay supaykunapis Jesusta rikuytawan, ñawpaqenman choqakuspa, qhaparej kanku: Qanqa Diospa Churin kanki, nispa.

¹² Jesustajrí paykunata mayta kamacherqa, pichus pay kasqanta ama sut'inchanankupaj.

Jesús chunka iskayniyoj kuraj kachasqankunata ajllan

¹³ Chantá Jesús orqoman rispa, wajyarqa, pikunatachá munarqa, chaykunata, tukuy paykunataj Jesusman jamorqanku.

¹⁴ Chaykunamantataj Jesús chunka iskayniyojta ajllarqa kuraj kachankuna kanankupaj. Chantá paykunata churarqa paywan purinankupaj, jinataj tukuynejman paymanta willaramunankupaj ima.

¹⁵ Jinallataj paykunaman atiyta qorqa, supaykunatapis runakunamanta qharqonankupaj.

¹⁶ Kaykuna kanku Jesuspa chay chunka iskayniyoj ajllasqan kuraj kachankuna: Simón, pitachus Jesús Pedro sutiwan suticharqa, chay.

¹⁷ Chantá Zebedeoj churinkuna Santiago, wawqen Juanwan, pikunatachus Jesusqa Boanerges sutiwan sutichallarqataj, chaykuna. Chay suteqa “Qhon qhonpa churinkuna” niyta munan.

¹⁸ Chaymanta kallarqankutaj: Andrés, Felipe, Bartolomé, Mateo, Tomás, Alfeoj churin Santiago, Tadeo, pitachus Simón cananita nillasqankutaj.

¹⁹ Kallarqataj Jesusta jap'ichej Judas Iscariote ima.

Santo Espíritoj contranta rimajkuna

²⁰ Chantá Jesús uj wasiman yaykorqa, ujtawantaj ashkha runakuna tantakamullarqankutaj. Chayrayku Jesús, yachachisqankunawan imaqa manaña mikhuytapis aterqankuchu.

²¹ Jinapi Jesuspa ayllunkuna imachus kasqanta yachaspa, payta pusakapunankupaj jamorqanku, imaraykuchus mana yuyayninpichu kasqanta yuyarqanku.

²² Jinapis Diospa kamachisqanmanta wakin yachachejkuna, pikunachus Jerusalenmanta jamusqanku, chaykuna nerqanku: Kay runapeqa Kuraj Supay Beelzebú kashan. Chayraykuchá Beelzebúj atiyninwan supaykunata qharqon, nispa.

²³ Jesustajrí paykunata wajyaspa, rijch'anachinawan nerqa: Imaynatataj Supay Satanasqa pay kikinta qharqokunmanri? nispa.

²⁴ Jesús nillarqataj: Sichus uj suyupi runakuna chejninakuspa t'aqanakunkuman chayqa, chay suyoqa manaña sayanmanchu, tukukunman.

²⁵ Uj wasi ayllupipis phiñanakuspa, maqanakunkuman chayqa, t'aqanakunkuman, manañataj khuska kayta atinkumanchu.

²⁶ Ajinallatataj, Supay Satanaspis payman sayasqa kajkunaj contranpi jatarispaqa, manallataj sayayta atinmanchu, aswanpis chinkapunman.

²⁷ Mana pipis kallpasapa runaj wasinman yaykuyta atinmanchu kapuyninta qhechoj, manachus ñawpajta kallpasapa runata wataykunmanraj chayqa. Wataykusparajpuni, chay runaj wasinpi kaj chhikata suwakapunman.

²⁸ Kayta sut'ita niykichej: Diosqa runakunaj ima juchankutapis, tukuy mana allin rimasqankutapis pampachayta atin.

²⁹ Santo Espíritoj contranta rimajpatarí, mana jayk'ajpis juchan pampachasqachu kanqa, manachayqa pay wiñaypaj juchachasqa kanqa, nispa.

³⁰ Jesús chayta nerqa, imaraykuchus Diospa kamachisqanta yachachejkuna nisqanku: Payqa millay supayniyoj, nispa.

Jesuspa maman, wawqenkuna ima

³¹ Chay qhepata Jesuspa maman, wawqenkuna ima chayamorqanku. Chantá, jawallamanta payta wajyajta kacharqanku.

³² Jesuspa muyuyninpi tiyashajkunataj payta nerqanku: Mamayki, wawqe panaykikuna ima mask'ashasunku, nispa.

³³ Jesustajrí paykunaman kuticherqa: Pikunatataj mamaypaj, wawqeykunapaj ima qhawaniri? nispa.

³⁴ Chantá muyuyninpi tiyashajkunata qhawarispa, nerqa: Kaykunamari mamay, wawqeykunapis kanku.

³⁵ Pichus Diospa munayninta ruwan, chaymá wawqeyqa, panaypis, mamaypis, nispa.