Marcos 15 - DIOSPA QHELQACHISQ

Jesusta Pilatoman pusanku

¹ Sut'iyamojtenqa, kuraj kaj sacerdotekuna, kurajkunawan, Diospa kamachisqanmanta yachachejkunawan ima ujtawan Jatun Juntapi tantakorqanku parlarinankupaj. Chaymantataj Jesusta wataspa, Romamanta kamachej Pilatoman pusarqanku.

² Chantá Pilatoqa Jesusta taporqa: Qanchu judiokunaj kuraj kamachejninku kanki? nispa. Jesustaj kuticherqa: Arí, qan ninki, nispa.

³ Chaykama kuraj kaj sacerdotekuna tukuy imamanta Jesusta ch'ataykusharqanku.

⁴ Chantá Pilato ujtawan Jesusta tapullarqataj: Manachu imatapis kutichikunki? Uyariy, contraykita tukuy imamanta ch'ataykususqankuta, nispa.

⁵ Chaywanpis Jesús manapuni imatapis kuticherqachu. Chayrayku Pilato t'ukusharqa.

Jesusta wañunanpaj juchachanku

⁶ Sapa Pascua raymipi kamachej Pilato uj presota kacharichejpuni, mayqentachá runakuna munaj kanku, chayta.

⁷ Chaypacha, Barrabás sutiyoj uj runa carcelpi waj runakunawan wisq'asqa kasharqa, imaraykuchus paykuna ch'ajwapi runata wañuchisqanku.

⁸ Ashkha runa tantakamuspataj, Pilatomanta mañarqanku sapa wata ruwasqanman jina uj presota kacharichinanta.

⁹ Pilatotaj paykunata nerqa: Judiokunaj kuraj kamachejninta kacharinayta munawajchejchu? nispa.

¹⁰ Pay allinta yacharqa kuraj kaj sacerdotekuna envidiakuspa, Jesusta jap'ichisqankuta ashkha runakuna payta qhatisqankurayku.

¹¹ Jinallapi kuraj kaj sacerdotekunaqa runakunaman yachacherqanku Pilatomanta mañanankupaj Barrabasta kacharichinanta.

¹² Pilatotaj ujtawan paykunata nerqa: Imatataj ruwanayta munankichej qankuna judiokunaj kuraj kamachejniykichejwanri? nispa.

¹³ Runakunataj qhaparispa, kuticherqanku: Cruzman chakatachiy, nispa.

¹⁴ Chantá Pilato nerqa: Ima mana allin kajtataj pay ruwarqari? nispa. Paykunarí astawan qhaparerqanku: Cruzman chakatachiy ari, nispa.

¹⁵ Ajinapi Pilatoqa runakunaman allin rijch'ayta munaspa, Barrabasta kacharicherqa. Chaymantataj Jesusta jasut'ichispa, soldadonkunaman jaywaykorqa cruzman chakatanankupaj.

¹⁶ Chantá soldadokunaqa Jesusta kamachina wasej ukhu pationman pusaykorqanku, chaymantaj tukuy soldadokunata tantacherqanku.

¹⁷ Jinapi Jesusta puka p'achawan p'achallicherqanku, khishkamanta simp'asqa pillutataj umanman churaykorqanku.

¹⁸ Jinaspataj, Jesusmanta alqochakuyta qallarerqanku: Jallalla, judiokunaj kuraj kamachejninku kawsachun, nispa.

¹⁹ Soldadokunaqa Jesuspa umanpi soqosowan wajtaspa, uyanman thoqaykorqanku, alqochakoj jinataj qonqorikuspa, ñawpaqenman k'umuykorqanku.

²⁰ Jesusmanta alqochakuyta tukuytawantaj, chay puka p'achata lluch'uspa, kikin p'achanta churaykaporqanku. Chantá Jesusta cruzman chakatanankupaj llajtamanta jawaman orqhorqanku.

Jesusta cruzman chakatanku

²¹ Chaypacha, Cirenemanta Simón sutiyoj runa, pichus Alejandroj, Rufojtawan tatan kaj, campomanta jampusharqa. Chayllapi romano soldadokunaqa paywan mana munashajta Jesuspa cruzninta apacherqanku.

²² Paykuna Jesusta Gólgota nisqa cheqaman pusarqanku. Chay niyta munan T'ojlu Moqo.

²³ Chayaspataj, soldadokuna Jesusman mirrawan chajrusqa vinota qoyta munarqanku. Paytajrí mana ujyayta munarqachu.

²⁴ Chantá Jesusta cruzman chakatarqanku. Chaymantataj soldadokunaqa suerteta choqaspa, Jesuspa p'achankunata rak'inakorqanku, chayman jina sapa uj apakapunanpaj.

²⁵ Jesusta cruzman chakatasharqanku chaypacha, jisq'on kaj phani karqa.

²⁶ Imamantachus Jesús juchachasqa karqa, chayta rejsichinankupajtaj kay jina qhelqasqa karqa: Kayqa judiokunaj kuraj kamachejninku, nispa.

²⁷ Jinallataj Jesuswan khuskata iskay suwatapis chakatallarqankutaj, ujninta Jesuspa pañanman, ujnintataj lloq'enman.

²⁸ Ajinamanta Diospa Qhelqachisqanpi kay nisqa junt'akorqa: Payqa juchasapakunawan yupasqa karqa, nispa.

²⁹ Chaynejta purejkuna umankuta khiwirispa, Jesuspaj rimarqanku: Yaw, qan Templota thuñinaykita nisqanki, kinsa p'unchaypitaj watej sayachinaykita.

³⁰ Kunantajrí qan kikiykita qhespichikuy, chay cruzmantataj urayk'amuy ari, nispa.

³¹ Ajinallatataj kuraj kaj sacerdotekuna, Diospa kamachisqanmanta yachachejkunawan ima Jesusta asipayaspa ninakusharqanku: Wajkunata qhespicherqa, chaywanpis pay kikin mana qhespichikuyta atinchoqa.

³² Kunanqa Diospa kachamusqan Cristo, Israelpa kuraj kamachejnin, chay cruzmanta urayk'amuchun, chayta rikuspa paypi atinikunanchejpaj, nispa. Ajinallatataj, pikunachus Jesuswan khuska cruzman chakatasqa kasharqanku, chay suwakunapis paypa contranpi rimallarqankutaj.

Jesús wañun

³³ Chawpi p'unchay kashajtin, tukuy kay pacha laqhayaykorqa kinsa kaj phanikama.

³⁴ Chay kikin phanillapitaj Jesús sinch'ita qhaparerqa: Eloi, Eloi, lama sabactani? nispa. Chay niyta munan: Diosníy, Diosníy, imaraykutaj saqerpariwankiri? nispa.

³⁵ Chayta uyarispa, chaypi kajkunamanta wakinkuna nerqanku: Uyariychej, Diosmanta sut'inchaj Eliasta wajyakushan, nispa.

³⁶ Ujnintaj usqhayta phinkispa, esponjata k'allku vinoman chhapuykuytawan, soqosoman wataykorqa. Chantá Jesuspa siminman ch'onqananpaj qayllacherqa, alqochakuspataj nerqa: Suyaychej, qhawanaraj, ichachus Elías jamonqa cruzmanta urayk'uchej, nispa.

³⁷ Chantá Jesús sinch'ita qhaparispa, wañuporqa.

³⁸ Chaypachallataj, Templopi jatun velo ujllata iskayman llik'irparikorqa patamanta urakama.

³⁹ Chaypacha romano soldadokunaj capitanninku Jesuspa cruzninpa ñawpaqenpi kasharqa. Paytaj Jesús qhaparispa wañusqanta rikuspa, nerqa: Kay runaqa Diospa Churinpuni kasqa, nispa.

⁴⁰ Jinallataj wakin warmikunapis karullamanta qhawamusharqanku. Paykuna ukhupi karqanku María Magdalena, sullk'a kaj Santiagojta, Josejtawan mamanku María, Salomé ima.

⁴¹ Galileapi Jesús kashajtillanraj, chay warmikunaqa payta yanapaspa, Jesuswan purej kanku. Waj ashkha warmikunapis paywan khuska Jerusalenman jamusqanku, jinataj paykunapis chaypi kasharqanku.

Jesusta p'ampanku

⁴² Chay p'unchay samarina p'unchaypaj wakichikuna karqa. Manaraj inti yaykushajtintaj,

⁴³ Arimateamanta José sutiyoj mana manchachikuspa, Pilatomanta Jesuspa ayanta mañamorqa. Chay Joseqa Jatun Juntapi allinpaj qhawasqa karqa, paytaj Diospa kamachiynin jamunanta imata jina suyasharqa.

⁴⁴ Pilatotajrí t'ukorqa Jesús wañusqaña kasqanmanta. Chayrayku soldadokunaj capitanninkuta wajyaspa, taporqa Jesús wañusqañachus chayrí manarajchus, chaymanta.

⁴⁵ Romano soldadokunaj capitanninkutaj Jesús wañusqantaña willajtin, Pilatoqa Joseman Jesuspa ayanta qoporqa.

⁴⁶ Josetaj linomanta ruwasqa sabanata rantimuspa, Jesuspa ayanta cruzmanta urayk'uchiytawan, mayt'uykorqa. Chantá chhankapi jusk'usqa aya p'ampanaman Jesuspa ayanta churaykorqa, jatun rumiwantaj yaykunan punkunta wisq'aykorqa.

⁴⁷ Chaypacha María Magdalena, Josejpa maman Mariawan ima, maymanchus Jesuspa ayanta churasqankuta qhawasharqanku.