Marcos 10 - DIOSPA QHELQACHISQ

Qhari warmi mana t'aqanakunamanta

¹ Jesús Cafarnaunmanta riporqa Judea cheqaman, Jordán mayu chimpaman. Jinapi watejmanta ashkha runakuna Jesusman jamorqanku, Jesustaj paykunaman ujtawan Diosmanta yachachillarqataj, yachasqa kasqanman jina.

² Chaypacha wakin fariseokunaqa Jesusman chimpaykorqanku, payta pantachiyta munaspataj, taporqanku: Niwayku, qhareqa warminmanta t'aqakuyta atillanmanchu? nispa.

³ Jesustajrí paykunaman kutichispa, tapullarqataj: Imatataj Moisés chaymanta kamacherqa? nispa.

⁴ Paykunataj kuticherqanku: Moisés nerqa qhareqa t'aqanaku papelta warminman jaywananta, chaymantataj kachapunanta, nispa.

⁵ Jesustajrí paykunata nerqa: Moisés chayta kamachisorqachej qankuna rumi sonqo kasqaykichejrayku.

⁶ Chaywanpis kay pachaj qallarikuyninpi Diosqa qharitawan, warmitawan ruwarqa.

⁷ Chayrayku qhareqa tatanta, mamanta ima saqespa, warminwan khuskachakapun.

⁸ Iskayninkutaj ujllaña kanku. Ajinapeqa manaña iskaychu kanku, manachayqa ujllaña.

⁹ Chayrayku Diospa ujchasqantaqa ama pipis t'aqachunchu, nispa.

¹⁰ Chantá, Jesús wasipiña kashajtin, yachachisqankuna chayllamantataj Jesusta watej taporqanku.

¹¹ Jesustaj paykunata nerqa: Pi qharillapis warminmanta t'aqakuspa, sichus waj warmiwan casarakun chayqa, pay khuchichakun ñawpaj kaj warminpa contranpi.

¹² Ajinallatataj sichus warmipis qosanmanta t'aqakuspa waj qhariwan casarakun chayqa, paypis khuchichakullantaj, nispa.

Jesús wawakunata saminchan

¹³ Uj p'unchay, wakin tata mamakuna wawankukunata Jesusman pusamorqanku, llankhaykuspa Diospa sutinpi saminchananpaj. Jesuspa yachachisqankunatajrí wawankuta pusamojkunata k'amerqanku.

¹⁴ Jesús chayta rikuspa, yachachisqankunapaj phiñakorqa, nerqataj: Wawakunata noqaman jamojta saqeychej, amataj jark'aychejchu, imaraykuchus kay wawakuna jina kajkunalla Diospa kamachiyninman yaykonqanku.

¹⁵ Kayta sut'ita niykichej: Pichus mana wawa jina Diospa kamachiyninta jap'ikojqa mana jayk'aj chayman yaykonqachu, nispa.

¹⁶ Chantá Jesús wawakunata marq'ariykukorqa, umankuman makinta churaspataj, paykunata Diospa sutinpi samincharqa.

Qhapaj runaqa Jesuswan parlarikun

¹⁷ Jesús Jerusalenman puririshajtinña, uj runa usqhayllata payman chimparqa. Jesuspa ñawpaqenman qonqoriykukuspataj, payta taporqa: K'acha Yachachej Wiraqochíy, imata ruwaspataj wiñay kawsayta tariymanri? nispa.

¹⁸ Jesustaj payta nerqa: Imaraykutaj K'acha Yachachej niwankiri? Mana pipis k'acha kanchu. Diosllamin k'acha.

¹⁹ Chaywanpis tapuwasqaykiman kutichisqayki. Diospa kamachisqankunata qan yachanki: Ama runata wañuchinkichu, ama khuchichakuspa qhenchachakunkichu, ama suwakunkichu, ama pimantapis llullakuspa parlankichu, ama pitapis ch'awkiyankichu, chantá tataykita, mamaykitawan jatunpaj qhawanki, nispa.

²⁰ Chay runataj Jesusman kuticherqa: Yachachej Wiraqochíy, chay tukuy imataqa wayna kasqaymantapacha junt'ani, nispa.

²¹ Chantá Jesusqa may munakuywan payta qhawaspa, nerqa: Jina chayqa, kaytawanraj ruwanayki tiyan wiñay kawsayniyoj kanaykipaj. Tukuy kapuyniykita vendespa, wajchakunaman chay qolqeta rak'iray. Ajinamanta janaj pachapi tukuy imayoj kanki. Chaymantataj kutimuspa, yachachisqay kanaykipaj noqawan jamuy, nispa.

²² Chayta uyarispa, chay runaqa phutisqa, llakisqataj riporqa, imaraykuchus may jina qhapaj karqa.

²³ Chantá Jesusqa muyuyninta qhawarispa, yachachisqankunata nerqa: Qhapajkunaqa ñak'ayllata Diospa kamachiyninman yaykonqanku, nispa.

²⁴ Jesuspa yachachisqankuna chay nisqanmanta t'ukorqanku. Chaywanpis Jesús watejmanta paykunata nerqa: Wawaykuna, manamin atikoj jinallachu Diospa kamachiyninman yaykunaqa.

²⁵ Astawanqa camelloraj yarwej ninrinta yaykuyta atinman, Diospa kamachiyninman qhapaj runa yaykunanmanta nisqaqa, nispa.

²⁶ Chayta uyarispa, Jesuspa yachachisqankuna astawanraj t'ukorqanku, paykunapurataj ninakusharqanku: Chay jina kajtenqa, pitaj qhespichisqa kayta atinmanri? nispa.

²⁷ Jesustajrí paykunata qhawarispa, nerqa: Runapajqa chay mana atikunchu. Diospajrí atikun, imaraykuchus Dios tukuy imata ruwayta atin, nispa.

²⁸ Jinapi Pedro parlayta qallarerqa: Noqaykoqa qanwan purinaykupaj tukuy tiyapuwasqaykuta saqerpariyku, nispa.

²⁹ Jesustaj kuticherqa: Kayta sut'ita niykichej: Wakinkunaqa noqarayku, sumaj willayraykutaj wasinkuta saqerparinku, wawqenkukunata, panankukunata, tatankuta, mamankuta, wawankukunata, jallp'ankukunata ima.

³⁰ Paykunataj pachaj jinatawanraj kay pachapi wasikunata jap'enqanku, wawqekunata, panakunata, mamakunata, wawakunata, jallp'akunata ima. Jinallataj may ñak'arichisqa, chantá qhatiykachasqa ima kallanqankutaj. Jamoj p'unchaypitajrí wiñay kawsayta jap'enqanku.

³¹ Chaywanpis pikunachus kunan jatunpaj qhawasqa kanku, chaykunaqa qhepaman pisipaj qhawasqa kanqanku. Pikunachus kunan pisipaj qhawasqa kajkunarí, chay p'unchaypi jatunpaj qhawasqa kanqanku, nispa.

Jesús wañunanmanta ujtawan sut'inchan

³² Jerusalén llajtaman rishajtinku, Jesús yachachisqankunaj ñawpaqenkuta risharqa. Paykunataj t'ukuspa, mancharisqataj qhepanta risharqanku. Chantá Jesús chunka iskayniyoj yachachisqankunata wajnejman wajyaspa, ujtawan imachus payta qhatirinanmanta willayta qallarerqa.

³³ Pay nerqa: Kunanqa Jerusalén llajtaman rishanchej, chaypitaj Runaj Churinta kuraj sacerdotekunaj makinkuman jaywaykonqanku, Diospa kamachisqanmanta yachachejkunaman ima. Paykunataj payta wañuchinankupaj juchachanqanku, jinaspataj, mana judío kajkunaj makinkuman jaywaykonqanku.

³⁴ Chantá paymanta alqochakonqanku, thoqaykonqanku, jasut'enqanku, jinataj payta wañuchenqanku. Chaywanpis kinsa p'unchayninman pay wañusqamanta kawsarimponqa, nispa.

Santiagowan Juanwan ujta mañakunku

³⁵ Chaypacha Zebedeoj churinkuna Santiago, Juanwan ima Jesusman qayllaykuspa, nerqanku: Yachachejniyku, mañakusqaykuta qonawaykuta munaykuman, nispa.

³⁶ Paytaj paykunata taporqa: Imatataj qankunarayku ruwanayta munankichejri? nispa.

³⁷ Paykunataj kuticherqanku: Kamachinayki tiyanapi may jatunchasqa kamachishajtiyki, qanwan khuska tiyachinawaykuta munaykuman, ujniykuta pañaykipi, ujniykutataj lloq'eykipi, nispa.

³⁸ Chantá Jesús paykunata nerqa: Qankuna imatachus mañakusqaykichejta mana yachankichejchu. Noqa imaynatachus ñak'arisaj, ajinata ñak'ariyta atiwajchejchu? Noqa imaynatachus wañusaj, ajinata wañuyta atiwajchejchu? nispa.

³⁹ Paykunataj kuticherqanku: Arí, atisqayku, nispa. Chantá Jesús paykunata nillarqataj: Arí, cheqatapuni qankunaqa noqa jina ñak'arinkichej, wañunkichej ima.

⁴⁰ Chaywanpis pañaypi, lloq'eypitaj qankunata tiyachinayqa mana noqamantachu. Chaytaqa Dioslla wakichin, pikunatachus pay ajllarqa, chaykunapaj, nispa.

⁴¹ Jinallapi chunka yachachisqankuna chayta uyarispa, Santiagopaj, Juanpajwan phiñakorqanku.

⁴² Jesustajrí tukuynin yachachisqankunata tantaspa, nerqa: Yachankichej jina, llajtakunata kamachejkunaqa atiyniyoj kasqankuta rikuchispa, munayninkuman jina runakunata apaykachanku. Ajinallatataj kurajkunapis atiyninkuwan, munajta mana munajta runankukunata kamachillankupuni.

⁴³ Qankuna ukhupirí mana jinachu kanan tiyan. Manachayqa, pichus qankunamanta kurajpaj qhawasqa kayta munajqa kamachiykichej jina kanan tiyan.

⁴⁴ Pitajchus qankuna ukhupi ñawpaj kaj kayta munajqa tukuyniykichejpa wata runan kanan tiyan.

⁴⁵ Chayqa ajina, imaraykuchus noqa Runaj Churinpis mana sirvichikunaypajchu jamorqani. Aswanpis wajkunaj kamachin jina kanaypaj jamorqani, kawsayniytataj qoj, ashkha runakuna qhespichisqa kanankupaj, nispa.

Jesusqa ñawsa Bartimeota qhawarichin

⁴⁶ Chantá Jesús yachachisqankunawan khuska Jericó llajtaman chayarqanku, chaymanta llojsishajtinkutaj, ashkha runakuna paykunata qhaterqanku. Chay ñan kantullapitaj uj runa, Timeoj churin, ñawsa Bartimeo mañakuspa tiyasharqa.

⁴⁷ Jinapi Bartimeoqa Nazaretmanta Jesús jamushasqanta uyarispa, qhapariyta qallarerqa: Jesús, Davidpa Churin, khuyarikuway ari, nispa.

⁴⁸ Chaypi kajkunamanta ashkha ch'inyachiyta munaspa, payta k'amerqanku. Paytajrí aswan sinch'ita qhaparerqa: Jesús, Davidpa Churin, khuyarikuway ari, nispa.

⁴⁹ Chantá Jesús payta uyarispa, sayarqa, nerqataj: Payta wajyamuychej, nispa. Runakunataj ñawsata nerqanku: Kusirikuy, sayariy. Jesús wajyashasunki, nispa.

⁵⁰ Jinapi Bartimeoqa qhatananta wijch'uspa, ujta sayariytawan Jesusman chimparqa.

⁵¹ Jesustaj nerqa: Imatataj qanrayku ruwanayta munankiri? nispa. Ñawsa runataj Jesusta nerqa: Yachachej Wiraqochíy, qhawarichinawaykita munani, nispa.

⁵² Chantá Jesusqa payta nerqa: Ripullay, noqapi atinikusqaykirayku qhaliyasqaña kanki, nispa. Nisqantawankamataj, ñawsa runaqa qhawarerqa. Chantá Jesuswan khuska rerqa.