Malaquías 3 - DIOSPA QHELQACHISQ

¹ Tukuy Atiyniyoj Tata Dios nin: Willarajniyta kachamusaj, ñanta wakichipunawanpaj. Chantá pitachus mask'ashankichej, chay Kamachejqa ujllata Templonman chayarparimonqa. Tratomanta willarajqa, pitachus imata jina suyashankichej, chay chayamonqaña, nispa.

² Pitaj Tata Diospa jamunan p'unchayta awantayta atinmanri? Pay rikhurimojtin, pitaj sayayta atinmanri? Ni pi, imaraykuchus payqa qorita ch'uyachej lawrashaj nina jina kanqa, chayrí p'achata t'ajsajpa jabonnin jina.

³ Tata Dios tiyarikuspa, Leví jatun aylluta ch'uwachanqa, imaynatachus yachajkuna ninapi qolqe metalta, qorita ima ch'uwachanku, jinata. Chaymantataj paykunaqa Tata Diospa munasqanman jina ofrendata apamonqanku.

⁴ Chaypacha Tata Diosqa Judá suyoj ofrenda jaywasqanwan kusikonqa, jinallataj Jerusalenpa ofrenda jaywasqanwanpis, imaynatachus ñawpa tiempopi kusikoj, ajinata.

⁵ Tukuy Atiyniyoj Tata Dios nin: Noqa qankunata juzgaj jamusaj. Chaypachataj noqamin testigo jina sayasaj kay jina kajkunaj contrankupi: Layqakuna, wasanchajkuna, llullakuspa tilojkuna, jornal pagota mana qopojkuna, pikunachus warmisapatawan ni piniyoj wajchakunatawan ñak'arichejkuna, waj llajtayojta ñak'arichejkuna, pikunachus mana jatun respetowan noqata qhawawanku ima, chaykunaj contrankupi sayaykusaj.

Temploman ofrendata apana

⁶ Noqa Tata Diosqa kasqay jinallapuni kani. Chayrayku Jacobpa mirayninmanta kajkuna, noqaqa mana qankunata chinkacherqaykichejchu.

⁷ Qankunaqa ñawpa tataykichej jina kamachisqaymanta karunchakorqankichej, manataj kamachisqayta kasuyta munarqankichejchu. Kunanrí noqa Tukuy Atiyniyoj Tata Dios niykichej: Noqaman kutirikamuwaychej, noqapis qankunaman kutirimullasajtaj, nispa. Qankunatajrí ninkichej: Imaraykutaj ninki qanman kutirikunayku kasqantari? nispa.

⁸ Kayta tapuriykichej: Runaqa Diosmanta suwanmanchu? Arí, qankuna noqamanta suwawankichej, nispa. Chantá ninkichejrajtaj: Imatataj qanmanta suwaykuri? nispa. Qankuna sapa chunkamanta ujta qonawaykichejta, jinallataj ofrendatapis suwawankichej.

⁹ Arí, tukuy suyuntin, tukuyniykichej suwawankichej, chayraykutaj maldicisqa kankichej.

¹⁰ Noqa Tukuy Atiyniyoj Tata Diosmin niykichej: Kapuyniykichejmanta sapa chunkamanta ujta Temployman apamuychej, wasiypi mikhuna kananpaj. Ajinatachus ruwankichej chayqa, rikunkichej imaynatachus noqa janaj pachaj ventananta kicharispa, may chhika saminchaykunata parachimunaykichejta. Ruwaychej má, chantá rikunkichej.

¹¹ Chaypacha mana saqesajchu ni ima khuru chajraykichejta tukuykunanta, jinallataj uva sach'aykichejpis manchay poqoyniyoj kanqa. Noqa Tukuy Atiyniyoj Tata Dios ajinata nini.

¹² Chantá jallp'aykichej may moq'ena kanqa, tukuy suyukunapi kaj runakunataj imayna kusikuyniyojchus kasqaykichejmanta mayta parlanqanku. Noqa Tukuy Atiyniyoj Tata Dios ajinata nini.

Dios ayllunmanta khuyakunanta nin

¹³ Tata Dios nillantaj: Qankuna mayta contrayta rimankichej, nispa. Chantapis tapunkichejraj: Imatataj qanpa contraykipi parlaykuri? nispa.

¹⁴ Kay jinata ninkichej: Diospa munayninta junt'ayqa yanqhalla. Imatataj tarinchej kamachisqanta kasuspari? Tukuy Atiyniyoj Tata Diospa ñawpaqenpi juchanchejmanta llakisqa purispapis, imatataj tarisunchejri?

¹⁵ Machu machu kajkunata ni imamanta llakiyniyojta kawsajta rikunchej. Millayta ruwaspa purejkunatapis tukuy imapi allillan rin. Paykuna Diosta phiñachinapaj jina imata ruwajtinkupis, mana jasut'isqachu kanku, nispa ninkichej.

¹⁶ Chaypacha Tata Diosta may jatun respetowan qhawajkuna parlanakorqanku, Tata Diostaj imatachus nisqankuta sumajta uyarerqa. Chantá paykuna Tata Diospa ñawpaqenpi qhelqarqanku, pikunachus Diosta may jatun respetowan qhawarqanku, paymantataj yuyarikorqanku, chaykunaj sutinkunata ama qonqasqa kanankupaj.

¹⁷ Tukuy Atiyniyoj Tata Dios nin: Noqaj wakichisqay p'unchaypi paykunaqa watej aylluy kanqanku. Imaynatachus uj tata nisqanta kasukoj wawanta khuyan, ajinallatataj noqapis paykunamanta khuyakusaj.

¹⁸ Chantá qankuna ujtawan reparayta atinkichej pichus cheqan, pitajchus mana cheqan runachu kasqanta. Reparallankichejtaj pichus Diosta yupaychasqanta, pitajchus mana yupaychasqantawan, nispa.