Malaquías 2 - DIOSPA QHELQACHISQ

¹ Sacerdotekuna, kay k'ameyqa qankunapaj:

² Sichus mana kasuwankichej, nitaj sutiytapis tukuy sonqo jatunchankichej chayqa, imawanchus samincharqaykichej, chayllawantaj maldicisqaykichej. Chaykunatataj maldiciniña, imaraykuchus sonqoykichejpi mana munankichejchu noqata jatunchawayta. Ajinata noqa Tukuy Atiyniyoj Tata Dios niykichej.

³ Chayrayku noqa mirayniykichejta k'amisaj. Chantá noqaman ñak'aspa jaywanapaj apamusqaykichej uywaj phusnunta uyaykichejman qhallisqaykichej, chay wanuwan khuskataj wijch'usqa kankichej.

⁴ Ajinamanta yachankichej noqamin kayta kamachisqayta, Leví jatun ayllumanta sacerdotekunawan trato ruwasqay ama p'akisqa kananpaj. Ajinata Tukuy Atiyniyoj Tata Dios nispa nin.

⁵ Leví jatun aylluwan tratoy karqa kawsayta, sonqo tiyaykusqa kaytawan paykunaman qonaypaj. Jinataj chayta wakicherqani noqata jatunpaj qhawanawankupaj, mayta respetanawankupaj ima. Paykunataj may respetowan qhawawaspa, k'umuykamuwarqanku.

⁶ Leví jatun aylloqa cheqan kajta runakunaman yachacherqanku, siminkupitaj mana ni ima ch'ichi parlay karqachu. Paykunaqa noqawan uj sonqolla cheqan kaypitaj kawsakorqanku, jinataj ashkha runakunata millayta purisqankumanta kutiricherqanku.

⁷ Sacerdotekunaqa runakunaman yachachinanku tiyan imaynatachus noqata rejsinawankuta, munayniyman jina purinankupaj. Chantá tukuy runakuna paykunaman rinanku tiyan yachayta jap'ikunankupaj, imaraykuchus sacerdotekunaqa Tukuy Atiyniyoj Tata Diospa kachankuna kanku.

⁸ Qankunarí, cheqan ñanmanta karunchakorqankichej, yachachisqaykichejwantaj ashkha runata pantacherqankichej. Ajinapi qankunaqa Leví jatun aylluwan trato ruwasqayta p'akinkichej. Noqa Tukuy Atiyniyoj Tata Dios ajinata nini.

⁹ Qankuna mana kasuwankichejchu, kamachisqayta yachachispapis wakin runakunallata allinpaj qhawankichej. Chayrayku noqa qankunata tukuy runaj ñawpaqenpi p'enqaypi rikhurichisqaykichej, pisipajtaj qhawachisqaykichej. Ajinata noqa Tukuy Atiyniyoj Tata Dios nini.

Israel Diosmanta karunchakun

¹⁰ Manachu tukuyninchej uj tatayojlla kanchej? Manachu uj Dioslla tukuyninchejta ruwawarqanchej? Jina kajtin, imajtintaj ujkuna ujkuna q'otiyanakunchej, ajinamanta ñawpa tatanchejkunawan Diospa ruwasqan tratota p'akispari?

¹¹ Judamanta kaj qharikunaqa lantikunata yupaychaj warmikunawan casaraspa, Diosta wasanchanku. Jerusalenpi millay ch'ichi imakunata ruwanku, Israelpipis kikillantaj. Tata Diospa munakusqan Templotapis ch'ichichallankutaj.

¹² Chayrayku Tata Dios chay jina ruwaj runakunata Jacobpa ayllunmanta chinkarparichichun, pillapis kachun, Tukuy Atiyniyoj Tata Diosman ofrendata apamojpis kachun.

¹³ Qankunarí mana chayllatachu ruwankichej. Tata Diospa altarninta waqaywan p'ampaykunkichej, sonqo nanayta waqaspa, imaraykuchus Tata Diosqa ofrendaykichejta mana tukuy sonqochu jap'ikun.

¹⁴ Jinataj tapunkichejraj: Imaraykutaj Tata Dios jaywasqayta mana jap'ikunkichu? nispa. Dios jaywasqaykita mana jap'ikunchu, imaraykuchus pay rikun piwanchus wayna kashaspa casarakorqanki, chay warmiwan trato ruwasqaykita imaynatachus p'akisqaykita. Payqa warmiyki karqa, qantaj nerqanki mana jayk'ajpis payta saqerparinaykita.

¹⁵ Manachu Tata Diosqa warmiykita qantawan uj runa jinallaman tukuchisorqachej? Ukhuykichejwan espirituykichejwan ima Diospata kankichej. Chantá Dios imatataj munanri? Manachu munan mirayniykichej payllapaj t'aqasqa kanankutari? Chayrayku qankuna sonqoykichejta allinta qhawakuychej, wayna kashaspa casarakusqaykichej warmita ama wasanchanaykichejpaj.

¹⁶ Israelpa Diosnin, Tukuy Atiyniyoj Tata Dios nin: Sonqoykichejta allinta qhawarikuychej, ama warmiykita wasanchanaykichejpaj, imaraykuchus noqa chejnini qhari warmi ukhupi t'aqanakuyta, pichus mana p'enqakuspa chay millayta ruwajtawan.

Juicio p'unchay qayllamushanña

¹⁷ Tata Diosqa parlasqaykichejta uyarispa, sayk'unña. Chaywanpis qankuna tapunkichejraj: Imata nispataj payta sayk'ucherqaykuri? nispa. Qankuna ninkichej: Tata Diosqa mana allinta ruwajkunata allinpaj qhawan, paykunawantaj kusikun, nispa. Manachayqa nillankichejtaj: Maypitaj kashan justiciata ruwaj Diosri? nispa.