San Lucas 20 - DIOSPA QHELQACHISQ

Jesusta atiyninmanta tapunku

¹ Uj p'unchay Jesús Templopi Diosmanta sumaj willayta runakunaman yachachisharqa. Jinallapi kuraj sacerdotekuna, Diospa kamachisqanmanta yachachejkuna, kurajkunawan ima chayamorqanku.

² Jesustataj nerqanku: Niwayku ari: Ima atiywantaj kaykunata ruwankiri? Chayrí, pitaj atiyta qosorqa kay imakunata ruwanaykipaj? nispa.

³ Jesustaj kuticherqa: Noqapis ujta tapurillasqaykichejtaj. Niwaychej ari:

⁴ Pitaj Juanman bautizananpaj atiyta qorqa: Dioschu, chayrí runallachu? nispa.

⁵ Chaypacha paykunapura ninakusharqanku: Dios churarqa, nispa nisun chayqa, pay niwasun: Imaraykutaj chantá paypa nisqanta mana jap'ikorqankichejchuri? nispa.

⁶ Juanta runakuna churanku, nispa nisun chayrí, tukuy llajtantinñataj rumiwan ch'anqaykuwasunman, imaraykuchus paykuna yuyanku Juanqa Diosmanta sut'inchajpuni kasqanta, nispa.

⁷ Chayrayku kuticherqanku: Mana yachaykuchu, nispa.

⁸ Chaymantataj Jesús nerqa: Noqapis manallataj nisqaykichejchu pichus atiyta qowasqanta kay imakunata ruwanaypaj, nispa.

Sajra llank'ajkunamanta rijch'anachina

⁹ Chantá Jesús runakunaman parlaspa, kay rijch'anachinata willarqa: Uj kuti, uj runa jallp'anpi uvata mallkisqa. Chantá llank'ajkunaman partidopi qospa, unaypaj karuman ripusqa.

¹⁰ Uva pallana p'unchay chayamojtintaj, huertayojqa ujnin kamachinta kachasqa, llank'ajkunamanta paypata kajta jap'inanpaj. Llank'ajkunatajrí chay kachata maqaykuytawan, ch'usaj makillata kachapusqanku.

¹¹ Chaymanta huertayoj runaqa waj kamachintañataj kachasqa. Llank'ajkunataj paymanta alqochakuytawan, paytapis maqaykuspa, ch'usaj makillata kachapullasqankutaj.

¹² Huertayojtaj waj kamachintañataj kachallasqataj. Llank'ajkunarí chay kamachitapis maqaykuspa, yawar pukallata wijch'usqanku.

¹³ Chantá uva huertayoj nisqa: Kunanrí imanasajtaj? Ah, yachaniña imatachus ruwanayta. Munasqa churiytañataj kachasaj. Paytaqa respetanqankupuni, nispa.

¹⁴ Chaywanpis llank'ajkunaqa ninakusqanku: Kay runaqa huertata chayaqeta jina jap'enqa. Chayrayku payta wañurparichinachej, uva huertataj noqanchejpaj kanqa, nispa.

¹⁵ Ajinaqa, paykuna huertayojpa churinta huertamanta jawaman orqhoytawan, wañurparichisqanku, nispa. Chaymanta Jesús uyarejkunata taporqa: Uva huertayojqa imananqataj chay llank'ajkunatari?

¹⁶ Pay jamuspa, chay llank'ajkunata wañurachenqa, huertantataj waj llank'ajkunaman qonqa, icharí? nispa. Chayta uyarispa, runakunaqa nerqanku: Ama chaytaqa Dios munallachunpischu, nispa.

¹⁷ Jesustajrí paykunata qhawarispa, nerqa: Chantá Diospa kay qhelqachisqan ima niytataj munan: Wasi ruwajkunaj qhesachasqanku rumeqa cimiento esquinapaj sumaj rumiman tukupun, nispa?

¹⁸ Pillapis chay rumi pataman urmaykojqa t'unasqa kanqa. Chantá pejpa patanmanchá chay rumi urmaykonqa, chayqa phirisqa kanqa, nispa.

¹⁹ Chayta uyarispa, kuraj sacerdotekuna, Diospa kamachisqanmanta yachachejkuna ima Jesusta chay kikinpi jap'iykuyta munarqanku, imaraykuchus reparakorqanku contrankuta chay rijch'anachinata nisqanta. Chaywanpis, mana payta jap'erqankuchu runakunata manchachikusqankurayku.

Impuestota paganamanta

²⁰ Chantá judiokunaj kurajninkukunaqa allinman tukoj puraj uya runakunata kacharqanku, Jesusta wateqanankupaj. Jinamanta Jesusta ima parlasqallanpipis jap'iyta munarqanku, Romaj churasqan kamachejpa makinman jaywaykunankupaj.

²¹ Jinapitaj paykuna taporqanku: Yachachej wiraqochi, allinta nisqaykita yachayku, cheqanta yachachisqaykita ima. Qanqa mana runaj uyanta qhawarispallachu imatapis ruwanki, manachayqa Diospa munayninta kasunamanta cheqanta yachachinki.

²² Ima ninkitaj qan: Allinchu kanman Romapi kuraj kamachej Cesarman impuestota pagana, chayrí manachu? nispa.

²³ Jesustajrí mana allin yuyaywan chayta tapusqankuta yachaspa, nerqa:

²⁴ Rikuchiwaychej denario phisuta. Pejpa uyantaj, chantá pejpa sutintaj kay phisupi churasqa? nispa. Paykunataj kuticherqanku: Cesarpata ari, nispa.

²⁵ Chantá Jesús paykunaman nerqa: Jina kajtenqa, Cesarpata kajtaqa Cesarman qopuychej, Diospata kajtatajrí Diosman qopuychej, nispa.

²⁶ Kurajkuna mana imaynamantapis parlasqanpi Jesusta pantachiyta aterqankuchu runakunaj ñawpaqenpi, aswanpis kutichisqanmanta t'ukuspa, ch'inyarqanku.

Wañusqakuna kawsarimunankumanta tapukunku

²⁷ Chaymantaqa wakin saduceokunañataj Jesuswan parlaj rerqanku. Paykunaqa wañuymanta mana kawsarimuy kasqanta ninku. Chantá Jesusta taporqanku:

²⁸ Yachachej Wiraqochi, noqanchejpajqa Moisés kay qhelqasqata saqerqa: Casarasqa qharichus warminwan manaraj wawayoj kashaspa wañun chayqa, wawqen casarakuchun chay warmisapawan, ajinamanta wañoj wawqenpa miraynin ama chinkananpaj, nispa.

²⁹ Uj kuti qanchis wawqekuna karqanku. Kuraj kaj casarakorqa chaymantataj wañuporqa, warminpi mana wawayoj.

³⁰ Chantá iskay kaj wawqeñataj chay warmisapawan casarakorqa. Paypis kikillantataj mana wawayoj wañuporqa.

³¹ Ajinallatataj kinsa kaj wawqepis chay warmisapawan casarakullarqataj. Ajinamanta qanchisnintin chay warmiwan casarakorqanku, tukuyninkutaj chay warmipi wawata mana rejsispa wañuporqanku.

³² Tukuyninkoj qhepantataj chay warmipis wañupullarqataj.

³³ Kunan niwayku: Qanchisnintin paywan casarakojtinku, wañuymanta kawsarimuy p'unchaypi, chay warmi mayqenpa warmintaj kanqari? nispa.

³⁴ Chantá Jesús paykunaman kuticherqa: Kay pachapi runakuna casarakunku, casarachinkutaj.

³⁵ Jamoj kawsaypirí, pikunatachus Dios nin wañusqamanta kawsarimpunapaj jina kasqankuta, chay runakuna manaña casarakonqankuchu, nitaj casarachenqankuchu.

³⁶ Paykuna manaña wañonqankuchu, manachayqa angelkuna jinallaña Diospa wawankuna kanqanku, wañusqamanta kawsarimpusqankurayku.

³⁷ Mana chayllachu. Moisespis wañusqakuna kawsarimunankumanta parlallarqataj, maypachachus lawrashaj t'ankar sach'amanta willarqa, chaypacha. Tukuyta Kamachej Diosmanta parlaspa, Moisés nerqa: Diosqa Abrahampata, Isaacpata, Jacobpata ima Diosnin kasqanta, nispa.

³⁸ Diosqa mana wañusqakunaj Diosninchu, manachayqa kawsajkunajta. Paypajtaj tukuy kawsashanku, nispa.

³⁹ Chantá Diospa kamachisqanmanta yachachejkunamanta wakinkuna nerqanku: Yachachej Wiraqochi, may sumajtapuni kutichinki, nispa.

⁴⁰ Chaymantataj Jesusta manaña imamantapis taporqankuchu.

Pejpa churintaj Cristori?

⁴¹ Chaypacha Jesús paykunata taporqa: Imaraykutaj ninku Diospa kachamusqan Cristo Davidpa Churin kasqantari?

⁴² Davidpis Salmos qhelqapi nin: Diosqa Tukuyta Kamachejniyta nerqa: Kay pañaynejpi tiyarikuy

⁴³ awqaykikunata chakiyki uraman churanaykama, nispa.

⁴⁴ Chantá, imaynatataj Cristoqa Davidpa Churin kanman, Davidllataj payta Tukuyta Kamachej nishajtinri? nispa.

Jesusqa Diospa kamachisqanmanta yachachejkunata ch'ataykun

⁴⁵ Tukuy runakuna uyarishajtinku, Jesús yachachisqankunata nerqa:

⁴⁶ Diospa kamachisqanta yachachejkunamanta qhawakuychej. Paykuna qhoysu p'achayoj purispa, plazakunapi napaykuchikuyta munanku. Tantakuna wasikunapipis ñawpajpipuni tiyakuyta munanku. Chantá jatun mikhuykunapipis aswan allin kaj tiyanapipuni tiyayta munanku.

⁴⁷ Chaywanpis warmisapaj kapuyninkuta oqokapunku, mana jina kasqankuta reparachikunankupajtaj unay unayta Dioswan parlarikoj tukunku. Chayrayku paykuna aswan sinch'i ñak'ariywan jasut'isqa kanqanku, nispa.