San Lucas 12 - DIOSPA QHELQACHISQ

Puraj uya fariseokuna

¹ Waranqa waranqa runakuna Jesusman tantakamorqanku, anchata k'iskikamuspataj, sarunakusharqanku. Jesustaj ñawpajta yachachisqankunata nerqa: Sumajta qhawakuychej fariseokunaj levadurankumanta. Chay niyta munan puraj uya kayninkumanta.

² Tukuy pakasqa kajpis jinallataj mana sut'inchasqa kajpis sut'inchakonqapuni.

³ Chayrayku, imatachus laqhapi nisqaykichejqa sut'i p'unchaypi uyarikonqa. Imatachus wasi ukhupi chhichiykusqaykichejpis wasi patamantapacha qhaparikonqa tukuy uyarinankupaj.

Pitataj manchachikunari?

⁴ Munasqa kawsaqeykuna, qankunaman niykichej: Ama manchachikuychejchu qankunata wañuchejkunata, imaraykuchus chaymanta astawanqa manaña imatapis ruwayta atisunkichejchu.

⁵ Noqarí pitachus manchachikunaykichejta nisqaykichej: Pichus runata wañuchiytawankama, atiyniyoj kashan nina lawrayman wijch'unanpaj, paytamin manchachikuychej.

⁶ Manachu runakuna phishqa p'isqokunata iskay phatallapi vendenku? Chaywanpis, Dios ni ujninkumantapis qonqanchu.

⁷ Ajinallataj Diospis qankunamanta mana qonqanchu. Umaykichejpi chujchaykichej mashkhachus kasqankuta yachallantaj. Chayrayku ama manchachikuychejchu, imaraykuchus qankuna aswan valorniyoj kankichej ashkha p'isqokunamanta nisqaqa, nispa.

Mana manchachikuspa Jesusmanta willana

⁸ Jesús nillarqataj: Noqaqa niykichej: Sichus pipis runaj ñawpaqenpi yachachisqay kasqanta rimarenqa chayqa, noqa Runaj Churinpis Diospa angelninkunaj ñawpaqenpi nillasajtaj: Payqa noqajtamin, nispa.

⁹ Runakunaj ñawpaqenpichus pipis mana rejsiwaj tukonqa chayqa, noqapis payta Diospa angelninkunaj ñawpaqenpi mana rejsisqayta nisaj.

¹⁰ Sichus pipis Runaj Churinpa contranta millayta riman chayqa, Dios chay juchata pampachayta atin. Sichus pipis Santo Espíritoj contranta millayta riman chayrí, Diosqa chay juchanta manapuni pampachanqachu.

¹¹ Runakuna tantakuna wasipi, juezkunaman, kurajkunaman ima apachisojtiykichej, ama phutikunkichejchu imaynatachus kutichikunaykichejmanta, chayrí, imatachus ninaykichejmanta.

¹² Chaypacha Santo Espiritumin imatachus parlanaykichejta yachachisonqachej, nispa.

Wampu qhapaj runamanta rijch'anachina

¹³ Jinapi runakuna ukhumanta ujnin nerqa: Yachachej Wiraqochíy, wawqeyman niripuway chayaqeykuta rak'inawanta, nispa.

¹⁴ Jesustaj kuticherqa: Wawqéy, pitaj noqata juezpaj churawarqa, chayrí chayaqeta rak'ejta jinari? nispa.

¹⁵ Chantá nillarqataj: Qankunaqa tukuy imata astawan astawan munanamanta sumajta qhawakuychej. Mana yuyanachu qhapaj kayqa allin kawsayman runata apasqanta, nispa.

¹⁶ Chaypacha Jesús uj rijch'anachinata willarqa: Uj qhapaj runa kasqa, chajrantaj ashkhata poqosqa.

¹⁷ Jinapi chay runa sonqonpi nisqa: Imanasajtajri? Manaña maymanpis poqoy oqharisqayta waqaychayta atinichu, nispa.

¹⁸ Chantá nillasqataj: Kayta ruwasaj. Pirwaykunata phaskaspa, aswan jatuchajta ruwasaj, chaypitaj chajra poqochisqayta, tukuy kapuyniytawan waqaychasaj.

¹⁹ Chantá sonqoypi nisaj: Kunanqa kapuwasqan ashkhaña, sumaj jallch'asqataj unaypaj. Chayrayku kunanqa chhika patapi kawsakuspa mikhusaj, ujyasaj, kusikusajtaj, nispa.

²⁰ Diostajrí payta nisqa: Wampu runa, kunan ch'isipacha wañunki. Jinaqa pipajtaj kanqa chay tukuy ima tantasqaykiri? nispa.

²¹ Ajinallataj kanqa, pichus payllapaj kay pachapi tukuy imata tantaspa, Diospa ñawpaqenpi mana imayoj rikhurin, chay runapaj, nispa.

Diosqa wawankunata qhawarin

²² Chantá Jesús yachachisqankunata nerqa: Chayrayku niykichej: Kawsanaykichejpaj imatachus mikhunaykichejmanta ama phutikuychejchu, nitaj imawanchus p'achallikunaykichejmantapis.

²³ Kawsashaspa imaynatachus purinanchejta aswanpaj qhawananchej tiyan, imatachus mikhunanchejmanta, imawanchus p'achallikunanchejmanta nisqaqa.

²⁴ Qhawariychej: P'isqokunaqa mana tarpunkuchu nitaj ruthunkuchu, nillataj mikhuna jallch'ananku kanchu, nitaj pirwankupis. Chaywanpis Dios paykunata mikhuchin. Manachu qankuna aswan valorniyoj kankichej chay p'isqokunamanta nisqaqa?

²⁵ Mayqentaj qankunamanta anchata phutikuspa, khuskan metrota jina sayayninman yapaykukunmanri?

²⁶ Sichus chayllatapis mana ruwayta atinkichejchu chayqa, imaraykutaj phutikunkichej waj imamantari?

²⁷ Jinallataj qhawariychej imaynatachus t'ikakuna campopi wiñasqankuta. Chaykuna mana llank'ankuchu nitaj phushkankuchu. Chaywanpis ñawpa kuraj kamachej Salomón may qhapaj kashaspapis, manapuni ujnin t'ika jinallapis p'achallikorqachu.

²⁸ Sichus Dios chay jinata campo qhorata p'achallichin, mayqenchus kunan wiñan q'ayataj ninapi ruphachisqa kanqa chayqa, qankunamanpis astawan sumajta p'achallichisonqachej. Jina kajtenqa, imaraykutaj paypi mana atinikunkichejchuri?

²⁹ Chayrayku ama llakikuychejchu imatachus mikhunaykichejmanta, chayrí ujyanaykichejmantapis. Amallataj chay imakunarayku phutikuychejchu.

³⁰ Diosman mana kutirikojkuna chay tukuy imata astawan mask'anku. Tataykichejrí yachanña imatachus pisichikusqaykichejta.

³¹ Aswanpis, qankuna Diospa kamachiyninpi sonqoykichejta churaychej, jinapitaj Dios chay waj imakunata yapata jina qosonqachej.

Janaj pachapi qhapaj kanapaj

³² Qankuna pisi t'aqa oveja jinalla kaspapis, ama manchachikuychejchu, imaraykuchus Tataykichej kamachishaspa, mayta munan paywan khuska kamachinaykichejta.

³³ Chayrayku kapuyniykichejta vendeychej, chay qolqeta pisichikojkunaman rak'inaykichejpaj. Ajinamanta mana thantakoj wayaqata ruwakunkichej, kapuyniykichejtataj janaj pachapi waqaychankichej. Chaypeqa kapuyniykichej mana tukukonqachu, manataj suwapis yaykonqachu, nitaj thutapis k'utonqachu.

³⁴ Chayta ruwaychej, imaraykuchus maypichá kapuyniykichej kashan, chayllapitaj sonqoykichejpis kanqa.

Jesús kutimunanpaj wakichisqa kanamanta rijch'anachina

³⁵ Chumpiykichej mat'isqa kachun, lamparaykichejpis jap'ichisqa.

³⁶ Qankunaqa casarakuymanta patronninkuta suyaj kamachikuna jina kaychej. Paykuna suyanku, patronninku chayamuspa wajyajtinkama, punkuta kicharinankupaj.

³⁷ Kusikuyniyojmin kanqanku chay kamachikuna, pikunatachus patronninku chayamuspa, rijch'arisqata taripanqa, chaykuna. Sut'ita niykichej: Kikin patronninku paykunata tiyaykuchispa, mikhunata jaywanqa.

³⁸ Jinapeqa patrón chawpi tutatapis jamuchun, chayrí sut'iyayllatañapis. Paykunatachus rijch'ashajta taripanqa chayqa, chay kamachikuna kusikuyniyojmin kanqanku.

³⁹ Kaytawan allinta yachaychej: Sichus wasiyoj ima phanitachus suwa jamunanta yachanman chayqa, mana puñuspa suyaykunman, manataj suwachikunmanchu.

⁴⁰ Ajinallatataj qankunapis wakichisqa kanaykichej tiyan, imaraykuchus mana suyashajtillaykichej Diospa Churin ujtawan jamonqa, nispa. Ajinata Jesús yachachisqankunaman yachacherqa.

Mana allinta ruwaj mayordomomanta rijch'anachina

⁴¹ Chantá Pedro taporqa: Tukuyta Kamachej Jesús, chay rijch'anachinaqa noqallaykupajchu karqa, chayrí tukuypajchu? nispa.

⁴² Tukuyta Kamachej Jesustaj kuticherqa: Chay karqa allin yuyayniyoj mayordomo jina kajpaj. Paytaqa patronnin churan wasi qhawajta, maychus tiemponpi kamachin masinkunaman mikhuchinanpaj.

⁴³ Chay mayordomo kusikuyniyojmin kanqa, sichus patronnin ajinata ruwashajta taripanqa chayqa.

⁴⁴ Sut'ita niykichej: Chay jina mayordomotaqa patronnin tukuy kapuyninta qhawananpaj churanqa, nispa.

⁴⁵ Chaywanpis ichapis chay mayordomo sonqonpi ninman: Patronneyqa manaraj chayamonqachu, nispa. Chantá kamachi masinkunata maqayta qallarinman, jinallatataj warmi kamachikunatapis. Chantá mikhunman, ujyanmantaj machanankama.

⁴⁶ Jinallapi patronnin kutimonqa mayordomoj mana suyasqan p'unchaypi, nitaj yachasqan phanipi. Chayamuspataj, payta sinch'ita jasut'iytawan, mana kasojkunawan khuska kananpaj qharqonqa.

⁴⁷ Ima kamachipis patronninpa munayninta yachashaspa, sichus mana wakichinkuchu, nitaj patronninpa munayninta ruwanchu, chayqa, pay manchay jasut'isqa kanqa.

⁴⁸ Pichus mana yachaspalla juchachakun chayrí, mana chhika jasut'isqachu kanqa. Pimanchus ashkhata jaywasqamantaqa ashkhallataj mañasqa kanqa. Pimanchus ashkhata qonku qhawananpaj, paymantapis ashkhallatataj mañanqanku, nispa.

Jesusrayku t'aqanaku

⁴⁹ Chantá Jesús nillarqataj: Noqaqa kay pachapi ninata jap'iykuchej jamuni. Jinataj mayta munayman lawrashanantaña.

⁵⁰ Ñak'arinayqa may sinch'i kanqa, noqataj manchayta phutikushani junt'akunankama.

⁵¹ Qankuna yuyankichejchu kay pachaman allin kawsayta apamoj jamusqayta? Mana. Astawanpis runakunata t'aqanachej jamuni.

⁵² Kunanmanta ñawpajmanqa, uj wasipi phishqa tiyakojkuna t'aqanakonqanku: Kinsaqa iskaypa contranpi kanqanku, iskaytaj chay kinsaj contran.

⁵³ Tataqa churinpa contranpi kanqa, churintaj tatanpa contran. Mamaqa ususinpa contranpi kanqa, ususintaj mamanpa contran. Suegrapis ñojch'anpa contrallanpitaj kanqa, ñojch'apis suegranpa contrallantaj, nispa.

Tiempo kashajtin, Dioswan allinyakapuna

⁵⁴ Jesús tantasqa runakunaman nillarqataj: Qankuna inti yaykuynejpi phuyuta oqharikojta rikuspa, ninkichej: Paranqa, nispa, parantaj.

⁵⁵ Uranejmanta wayramojtintaj, ninkichej: Ruphamonqa, nispa, ruphantaj.

⁵⁶ Puraj uya kankichej. Qankuna sumajta rejsinkichej janajpa rijch'ayninta, kay pachajtapis, icharí? Chaywanpis mana reparayta atinkichejchu Dios imatachus kunan tiempo ruwashasqanta.

⁵⁷ Imaraykutaj mana qankuna kikiykichej reparankichejchu imachus cheqan kasqantari?

⁵⁸ Piwanpis quejapi kaspaqa, corregidorpaman rej jina ñanllapiraj paywan allinyakapuy. Manachayqa juezpaman apasunkiman, paytaj carcelta qhawajwan jap'ichisuspa, wisq'aykuchisunkiman.

⁵⁹ Noqataj niyki: Chaymanta mana llojsimunkichu tukuy manuykita paganaykikama, nispa.