San Lucas 11 - DIOSPA QHELQACHISQ

Jesusqa Dioswan parlarikuyta yachachin

¹ Jesús uj kuti Dioswan parlarikuyta tukojtin, ujnin yachachisqan nerqa: Wiraqochi, Dioswan parlarikuyta yachachiwayku, imaynatachus Bautizaj Juanpis yachachisqankunaman yachacherqa, ajinata, nispa.

² Jesustaj paykunata nerqa: Dioswan parlarikuspaqa, ajinata ninkichej: Janaj pachapi kaj Tatayku, sutiyki jatunchasqa kachun. Jamuspa, noqaykuta kamachiyta qallariy.

³ Sapa p'unchay imatachus mikhunaykuta qowayku ari.

⁴ Juchaykutapis pampachapuwayku, imaynatachus noqaykupis contraykupi mana allin ruwajkunaj juchankuta pampachayku, ajinata. Ama juchallinaman tanqasqa kanaykuta saqewaykuchu, manachayqa jark'awayku Supayta kasunaykumanta, nispa.

⁵ Chantá Jesús nillarqataj: Nisunman: Qankunamanta pipis chawpi tutata uj kawsaqenpa wasinman rispa, niwajchej: Kawsaqéy, ama jina kaspa kinsa t'antata mañariway,

⁶ imaraykuchus uj kawsaqey karumanta chayamun, nitaj ni ima jaywarinaypaj kapuwanchu, nispa.

⁷ Chay kawsaqeykitajrí wasi ukhumanta kutichisunkiman: Ama umayta nanachiwaychu. Punkoqa wisq'asqaña, wawaykunapis noqawan puñushanku. Manaña jatarimuymanchu, nispa.

⁸ Kayta niykichej: Mana kawsaqeyki kasqanraykuchu t'antata jaywasunanpaj jatarimonqa. Manachayqa qan mana sayk'uspa mañakusqaykirayku, pay jatarimuspa, imatachus mañakusqaykita jaywasonqa.

⁹ Chayrayku niykichej: Diosmanta mañakuychej, qosonqachejtaj. Dios kutichisunanta mask'aychej, tarinkichejtaj. Punkutapis takallaychejpuni, Diostaj kicharimusonqachej.

¹⁰ Pichus Diosmanta mañakojqa jap'in, mask'ajtaj tarin, punkuta takajpajpis Dios punkuta kicharenqa.

¹¹ Qankunamanta mayqen tatapis, wawaykichej t'antata mañakojtin, rumitachu jaywawajchej? Wawaykichej challwata mañakojtin, kataritachu qowajchej? Mana, icharí?

¹² Chayrí, runtuta mañakojtinpis, atojsillutachu qowajchej?

¹³ Qankunachus mana allin runakuna kashaspa, allin kajta wawaykichejman qoyta yachankichej chayqa, astawanraj janaj pachapi kaj Tataykichejqa mañakojkunaman Santo Espirituta qonqa, nispa.

Jesusta tumpaykunku

¹⁴ Uj kutipi Jesusqa opayachej supayta uj runamanta qharqorqa. Chay supay llojsejtinkamataj, opaqa parlayta qallarerqa, runakunataj t'ukorqanku.

¹⁵ Wakinkunatajrí nerqanku: Kay runaqa supaykunaj kurajnin Beelzebúj atiyninwan supaykunata qharqon, nispa.

¹⁶ Chaypachallataj wajkunapis Jesús Diosmanta jamusqanmanta yachayta qonanpaj, mañarqanku pay runaj mana jayk'aj rikusqan t'ukunata ruwananta.

¹⁷ Jesustajrí yuyasqankuta yachaspa, nerqa: Sichus mayqen suyupi tiyakojkuna paykunapura t'aqanakunku, chejninakunkutaj chayqa, chay suyoqa manaña sayanmanchu, tukukunman. Ajinallatataj sichus uj wasi ayllumanta kajkuna phiñanakuspa t'aqanakunkuman chayqa, manallataj khuska kayta atinkumanchu.

¹⁸ Kikillantataj, sichus Supay Satanás paypa contrallanpitaj imatapis ruwanman chayqa, imaynatataj kamachillanmanpuniri? Chayta niykichej, imaraykuchus qankuna nishankichej Beelzebunejta noqa supaykunata qharqoshasqayta.

¹⁹ Sichus noqa Beelzebunejta supaykunata qharqoni chayrí, pinejtataj yachachisqaykichejkuna supaykunata qharqonkuri? Chayrayku, chay nisqaykichejmanta paykunamin juchachasonqachej.

²⁰ Chaywanpis sichus noqa Diospa atiyninwan supaykunata qharqoni chayqa, sut'itapuni niykichej: Diosqa qankuna ukhupi kamachiyta qallarishanña, nispa.

²¹ Jesús nillarqataj: Kallpasapa runa sumaj armasqa wasinta qhawajtenqa, tukuy kapuynin sumaj waqaychasqa kakun.

²² Chaywanpis sichus paymanta aswan kallpayoj jamuspa, maqanakupi atipanman chayqa, atinikusqan armanta qhechunman, paypa imankunata apakapuspataj, chaywan munasqanta ruwanman.

²³ Pichus mana noqaman sayasqa kajqa contraypi kashan. Pitajchus noqawan ruwanayta mana ruwajqa contraypi ruwan, nispa.

Runamanta llojsej supaymanta rijch'anachina

²⁴ Jesús uj rijch'anachinatawan nerqa: Jayk'ajchus runamanta supay llojsin, chaypacha, payqa ch'aki jallp'anejta purin samarikuyta mask'aspa. Mana tarispataj, nin: Kutipusaj, pimantachus llojsimorqani, chayman, nispa.

²⁵ Chayaspataj, pay reparan chay runa sumaj pichasqa, k'uchunchasqa ch'usaj wasi jina kashasqanta.

²⁶ Chantá rispa, qanchis supaykunatawan pusaykun paymanta aswan millaykunata. Paykunataj chay runaman yaykuspa, chaypi tiyakapunku. Jinapi chay runaj kawsaynenqa aswan millayman tukupun, ñawpaj kasqanmanta nisqaqa, nispa.

Kusikuyniyojkuna

²⁷ Chayta Jesús ninankama, runa ukhumanta uj warmi jatunmanta parlaspa, nerqa: Kusikuyniyojmin pi warmichus wijsanpi apasorqa, pejpa ñuñunmantachus ñuñorqanki, chay, nispa.

²⁸ Jesustajrí kuticherqa: Diospa simi nisqanta uyarispa kasojkunamari kusikuyniyoj kanku, nispa.

Jesús nin imaynachus Jonaswan karqa, ajinallataj paywan kananta

²⁹ Ashkha runa astawan tantaykakamushajtinku, Jesús parlayta qallarerqa: Kunan p'unchaypi kawsajkunaqa may sajra kasqankurayku, runaj mana jayk'aj rikusqan t'ukunata ruwanayta mañankupuni. Jinapis paykuna mana waj t'ukunata rikonqankuchu, manachayqa imachus Jonaswan karqa, chayllata.

³⁰ Jonaswan ima t'ukunachus kasqan Ninivepi kajkunaman yachayta qorqa Dios payta kachamusqanmanta. Ajinallatataj ima t'ukunachus Runaj Churinwan kanqa, chayqa kay tiempopi runakunaman yachayta qonqa Diospa kachamusqan kasqanmanta.

³¹ Chantá juicio p'unchaypi uray suyumanta qoyaqa sayarispa, kay runakunata juchachanqa, imaraykuchus qoyaqa karu suyumanta jamusqa Salomonpa yachayninta uyarej. Kunantajrí Salomonmanta nisqaqa aswan kuraj kaj kaypi kashan, qankunataj mana uyariwayta munankichejchu.

³² Jinallataj Nínive llajtayojkunapis juicio p'unchaypi sayarispa, kunan p'unchaypi tiyakojkunata juchachanqanku, imaraykuchus Jonás willarajtinkama, paykuna Diosman kutirikusqanku. Kunantajrí Jonasmanta aswan kuraj kaj kaypi kashan, qankunataj mana Diosman kutirikuyta munankichejchu, nispa.

Ñaweqa runaj ukhunta k'anchaykun

³³ Jesús nillarqataj: Mana pipis lamparata jap'ichispaqa pakanchu, nitaj wich'iwan k'umpuykunchu. Manachayqa pataman churan, wasiman tukuy yaykojkuna k'anchayninta rikunankupaj.

³⁴ Jinallataj ñawiykeqa ukhuykipaj k'anchay jina. Ajinamanta ñawiyki allin kajtenqa, tukuy ukhuykipis k'anchayniyoj kanqa. Ñawiyki mana allin kajtinrí, tukuy ukhuykipis laqhalla kanqa.

³⁵ Pajtataj qanpi kaj k'anchayqa laqhaman tukunman.

³⁶ Chayrayku, sichus tukuy ukhuyki k'anchaywan junt'a kanman, sitajchus ni ima laqhayay kanmanchu chayqa, qan tukuy imata sut'ita rikuwaj, imaynatachus k'anchaypi tukuy ima sut'i rikukun, ajinata, nispa.

Jesusqa judío kurajkunata ch'ataykun

³⁷ Jesús chayta parlayta tukojtin, uj fariseo wasinman wajyarikorqa paywan mikhunanpaj. Fariseoj wasinman yaykuspataj, Jesusqa mikhunanpaj tiyarikorqa.

³⁸ Fariseotajrí t'ukorqa, imaraykuchus Jesús mikhunanpaj makinta mana mayllakusqachu.

³⁹ Jinapi Jesús nerqa: Qankuna fariseokunaqa vasota, chuwata ima jawanta mayllankichej. Qankunaj sonqoykichejrí suwanawan, mana allin ruwanawan ima junt'a kashan.

⁴⁰ Wampukuna, manachu runaj ukhunta ruwajqa runaj sonqontapis ruwallarqataj?

⁴¹ Chayrayku sonqoykichejta llimphuchaychej kapuyniykichejmanta wakinta wajchakunaman qospa, ajinamantataj qankuna llimphupuni kankichej.

⁴² Ay qankunamanta, fariseokuna. Qankuna sapa chunkamanta ujta Diosman qonkichej mentamanta, rudamanta, tukuy q'omerkunamantawan. Chaywanpis mana wajkunapaj cheqan kajta ruwankichejchu nitaj Diosta munakunkichejchu. Chay chunkamanta ujta qonaqa allinpuni. Chaywanpis mana chay waj ruwanata qonqanachu tiyan.

⁴³ Ay qankunamanta, fariseokuna. Qankunaqa tantakuna wasipi ñawpajpipuni tiyayta munankichej. Ajinallatataj callepipis may respetowan napaykuchikuyta munallankichejtaj.

⁴⁴ Ay qankunamanta. Qankuna mana rikukoj aya p'ampana jina kankichej. Chay aya p'ampana patata purispa, runakuna Diospa ñawpaqenpi ch'ichichakusqankuta mana reparakunkuchu, nispa.

⁴⁵ Chantá Diospa kamachisqanmanta yachachejkunamanta ujnin kuticherqa: Yachachej wiraqochi, chayta nispaqa, contraykutapis rimashallankitaj, nispa.

⁴⁶ Jesustajrí kuticherqa: Ay qankunamantapis, Diospa kamachisqanmanta yachachejkuna. Qankuna may chhika kamachisqakunata yachachispa, mana apay atina q'epita jina runaman q'epirichinkichej. Chaywanpis mana ruk'anaykichejllawanpis chaykunata oqhariysiyta munankichejchu.

⁴⁷ Ay qankunamanta. Ñawpa tataykichejkuna Diosmanta sut'inchajkunata wañucherqanku, qankunataj chay sut'inchajkunaj covachanku patapi yuyarikuna sayantata sayarichinkichej.

⁴⁸ Qankuna ñawpa tataykichejkunaj ruwasqankuta yachaspapis walejta ruwarqanku ninkichej. Paykunaqa Diosmanta sut'inchajkunata wañucherqanku, qankunataj covachankuta k'achanchankichej.

⁴⁹ Chayrayku Tukuy Yachayniyoj Dios nerqa: Noqaqa aylluyman kachasaj noqamanta sut'inchajkunata, kuraj kachakunata ima. Paykunatatajrí wakinta wañuchenqanku, wakintataj ñak'arichenqanku, nispa.

⁵⁰ Chayrayku kunan p'unchay kawsaj runakuna juchachasqa kanqanku, kay pachaj qallariyninmantapacha Diosmanta tukuy sut'inchajkunatapis wañuchinkuman karqa jina.

⁵¹ Chay kanqa Abel wañuchisqa kasqanmantapacha, Zacarías mayk'ajchus wañuchisqa karqa chaykama. Payta Temploj pationpi altar qayllapi wañucherqanku, chaykama. Arí, niykichej: Qankuna kunan p'unchaypi kawsajkunamanta cuentata mañasqaykichej, nispa.

⁵² Ay, qankunamanta, Diospa kamachisqanmanta yachachejkuna. Qankuna Diospa kamachiyninmanta yachasqaykichejta qankunallapaj jap'ikapunkichej, manataj wajkunaman yachachinkichejchu, nispa.

⁵³ Jesús ajinata paykunata k'amejtin, Diospa kamachisqanmanta yachachejkuna, fariseokunawan ima mayta phiñakuspa, contranpi sayaykorqanku.

⁵⁴ Jinapi tukuy imamanta tapurarqanku Jesusta pantachiyta munaspa, ima nisqallanmantapis ch'ataykunankupaj.