Levítico 9 - DIOSPA QHELQACHISQ

Aarón sacerdote jina ruwananta qallarin

¹ Pusaj kaj p'unchaypi Moisesqa Aaronta, churinkunata, chantá israelitakunaj kurajninkukunatawan ima wajyarqa.

² Chantá Moisés Aaronta nerqa: Juchata pampachanapaj uj torillota apamuy. Jinallataj q'olachispa jaywanapaj mana iman imanasqa corderotawan apamullaytaj. Jinaspataj chaykunata Tata Diosman jayway.

³ Israelitakunatataj niy: Jucha pampachasqa kananpaj Diosman jaywanapaj uj chivota apamuychej. Jinallataj mana iman imanasqa uj watayoj torillota, uj watayoj corderotawan ima apamullaychejtaj q'olachispa Tata Diosman jaywanapaj.

⁴ Apamullaychejtaj uj torota, uj corderotawan allinyakuy jaywanata Tata Diosman jaywanapaj. Chantá apamullaychejtaj aceitewan puñasqa ch'aki mikhuy jaywanata, imaraykuchus Tata Diosqa Tukuy Atiyniyoj kasqanta kunan qankunaman rikuchisonqachej, nispa.

⁵ Jinataj israelitakunaqa Moisespa tukuy kamachisqanta Dioswan Tinkukuna Toldo punkuman apamorqanku. Chaymantataj tukuy israelitakuna rispa, Tata Diospa ñawpaqenpi sayarqanku.

⁶ Chantá Moisés nerqa: Tata Dios kayta ruwanaykichejta kamachisunkichej. Sichus kasunkichej chayqa, Tata Dios jatun kayninpa lliphipiyninwan qankunaman rikuchisonqachej, nispa.

⁷ Chaymanta Moisesqa Aaronta nillarqataj: Altarman qayllaspa, jucha pampachasqa kananpaj jaywanaykita jayway. Chantá q'olachina jaywanaykitapis jaywallaytaj. Ajinata ruwanki qanpa juchallisqayki, jinataj israelitakunaj juchallisqankupis pampachasqa kananpaj. Chantá israelitakunaj apamusqankuta Diosman jayway, juchallisqanku pampachasqa kananpaj. Ajinata Tata Diospa kamachisqanman jina ruwanki, nispa.

⁸ Chantá Aaronqa altarman qayllaykuspa, torillota ñak'arqa. Jinaspataj, juchallisqan pampachasqa kananpaj, chay torillota Diosman jaywarqa.

⁹ Aaronpa churinkunataj payman yawarta jaywarqanku, Aarontaj maki ruk'ananta yawarman chhapuspa, altarpa wajrankunata jawirarqa. Puchoj yawartataj altarpa uranman jich'arqa.

¹⁰ Chaymantá jucha pampachasqa kananpaj apamusqa, chay uywaj wiranta altarpi q'olacherqa. Jinallataj Aaronqa chay uywaj lurunninta, k'iwichanpi wirantawan ima q'olachillarqataj. Ajinata Aarón ruwarqa imaynatachus Tata Dios Moisesman kamachisqanman jina.

¹¹ Uywaj aychanta, qarantawan imarí jaramanta jawaman orqhospa, ruphacherqa.

¹² Chantá Aaronqa q'olachispa jaywanapaj apamusqanku uywatañataj ñak'arqa. Churinkunataj yawarta payman jaywarqanku, Aarontaj chay yawarwan altarta, chantá muyuyninta ima ch'ajchorqa.

¹³ Chaymantataj uywaj umanta, khuchusqa aychantawan jaywarqanku, Aarontaj chaykunata altarpi q'olacherqa.

¹⁴ Jinaspataj uywaj ch'unchulanta, chantá piernanta ima yakuwan mayllaspa, q'olachispa jaywanatawan khuskata altarpi q'olacherqa.

¹⁵ Chaymanta Aaronqa israelitakuna Tata Diosman jaywanankupaj apamusqankuta Diosman jaywallarqataj. Jinallataj Aaronqa chivota jap'iytawan ñak'arqa israelitakuna juchallisqanku pampachasqa kananpaj apamusqankuta, chantá Tata Diosman jaywarqa, imaynatachus ñawpajta jaywarqa, ajinata.

¹⁶ Jinallataj q'olachispa jaywana uywata, kamachisqa kasqanman jina, Diosman jaywallarqataj.

¹⁷ Chantá ch'aki mikhuy jaywanamanta uj pojtuta oqharispa, altarpi q'olacherqa, sut'iyayta q'olachispa jaywana uywatawan khuskata.

¹⁸ Jinallataj Aarón ñak'allarqataj israelitakuna k'achata kawsakuy jaywanata Diosman jaywanapaj apamusqanku torota, corderotawan ima. Churinkunataj payman yawarta jaywarqanku, paytaj chay yawarwan altarta, chantá altarpa tukuy muyuyninta ch'ajchorqa.

¹⁹ Jaywallarqankutaj toroj wiranta, corderoj wiranta, chupanta, ch'unchulaj wiranta, lurunninta, k'iwichapi wiranta ima.

²⁰ Chantá Aarón tukuynin wirata, uywaj qhasqon pataman churaykorqa. Chaymantataj pay chay wirata altarpi q'olacherqa.

²¹ Jinataj Aaronqa chay uywaj qhasqonta, chantá iskay paña piernankunata ima oqhariytawan, ikhaspa Tata Diosman jaywarqa, Moisespa kamachisqanman jina.

²² Chantá Aarón chay tukuyta ruwayta tukuytawan makinta oqharispa, israelitakunata samincharqa. Chaymantataj jucha pampachasqa kananpaj jaywanata, q'olachinapaj jaywanata, k'achata kawsakuy jaywanata Diosman jaywaytawan, altarmanta ithirerqa.

²³ Chantá Moiseswan, Aaronwan ima Dioswan Tinkukuna Toldoman yaykorqanku. Chaymanta llojsimuspataj, israelitakunata ujtawan samincharqanku. Jinallapi Tata Diospa jatun kayninpa lliphipiynin tukuyninkuman rikhurerqa.

²⁴ Chaymantataj Tata Diospa ñawpaqenmanta nina llojsimuspa, altarpi aychata, wiratawan ima q'olaykorqa. Chayta rikuspataj, tukuy israelitakuna kusikuspa qhaparerqanku, chantá pampakama k'umuykorqanku.