Levítico 6 - DIOSPA QHELQACHISQ

Runa masita q'otiyasqamanta jaywana

¹ 1 (5.20) Tata Dios Moisesta nillarqataj:

² 2 (5.21) Pillapis runa masinta q'otiyajqa, Tata Diospa contranpi juchallin. Ichapis kay jinata ruwaspa juchallinman: Payman runa masin saqekusqanta jap'ikapuspa, chayrí prenda qosqanta mana qopuspa, chayrí imantapis suwaspa, chayrí kallpanman atinikuspa imantapis qhechuspa.

³ 3 (5.22) Manachayrí imatapis tarisqanta pakaykuspa juchallinman, chayrí qhasita tiluspa, runakuna imata ruwaspachus juchallinku, chaykunata ruwaspa.

⁴ 4 (5.23) Chaykunata ruwasqanmanta juchayoj kanqa. Jinaqa imatachus suwasqanta runa masinman kutichipunan tiyan, atiyniyoj kaspa imatachus qhechusqanta, prendata jap'ikapusqanta, chayrí tarikuspa pakaykusqanta.

⁵ 5 (5.24) Jinallataj qhasita tiluspa imatachus jap'ikapusqanta kutichipunan tiyan. Mashkhachus valesqanman phishqamanta ujta yapaspa qopunan tiyan. Juchan pampachasqa kananpaj Tata Diosman jaywanqa, chay p'unchayllataj, tukuyninta dueñonman kutichiponqa.

⁶ 6 (5.25) Juchan pampachasqa kananpaj ovejanmanta mana iman imanasqa uj corderota apamunan tiyan. Chay corderoj preciontarí sacerdote churanqa. Chaytataj sacerdoteman apanqa, juchan pampachasqa kananpaj Tata Diosman jaywananpaj.

⁷ 7 (5.26) Chantá sacerdoteqa chay runaj juchallisqan pampachasqa kananpaj, chay jaywanata Tata Diosman jaywanqa. Ajinata ruwasqanrayku, chay runaj mayqen juchallisqanpis pampachasqa kanqa, nispa.

Sapa p'unchay Diosman jaywana

⁸ 8 (1) Tata Dios Moisesta nillarqataj:

⁹ 9 (2) Aaronta, churinkunatawan kamachiy: Uywa ñak'asqata q'olachispa Diosman jaywanataqa ajinata ruwankichej: Uywata ñak'aspa jaywanaqa sut'iyanankama altarpi ruphanan tiyan. Ninaqa altarpi tukuy tutantinta lawrashallananpuni tiyan.

¹⁰ 10 (3) Chantá sacerdoteqa linomanta ruwasqa p'achata, calzoncillotawan churakuspa, ñak'asqa uywa q'olasqa ushphaman tukusqanta oqharenqa. Jinaspataj, altarpa qayllanman churanqa.

¹¹ 11 (4) Chaymantataj sacerdoteqa linomanta p'achata lluch'ukuspa, waj p'achata churakonqa. Chantá chay ushphata jaramanta jawaman uj llimphu cheqaman apanqa.

¹² 12 (5) Altar patapi k'ajaj ninaqa mana jayk'aj wañunanchu tiyan. Chayman sacerdoteqa sapa paqarin llant'ata yapanqa. Chantá nina pataman q'olachinapaj uywa ñak'asqata churanqa. Jinaspataj chay pataman k'achata kawsakuy jaywanamanta uywaj wirantapis churallanqataj.

¹³ 13 (6) Altar patapi ninaqa lawrallanqapuni, manataj jayk'aj wañunanchu tiyan.

Ch'aki mikhuy jaywanamanta

¹⁴ 14 (7) Ch'aki mikhuy jaywanata jaywaspaqa, ajinata ruwanqanku: Aaronpa churinkunaqa chayta altarpi, Tata Diospa ñawpaqenpi jaywanqanku.

¹⁵ 15 (8) Ujnin kaj sacerdotetaj ch'aki mikhuy jaywanamanta aceitewan chhapusqa jak'uta uj pojtuta oqharenqa, inciensotawan ima. Chantá altarpi yuyarikuna jaywanata jina q'olachenqa. Chay jaywanaj ima munay q'apaynintaj Tata Diosman chayanqa.

¹⁶ 16 (9) Ch'aki mikhuy jaywanamanta puchojtataj Aaronwan, churinkunawan ima mikhonqanku, Dioswan Tinkukuna Toldoj pationpi, Diospaj T'aqasqa Cheqapi.

¹⁷ 17 (10) Chaytaqa mana levadurayojtachu chayachenqanku, imaraykuchus q'olachispa Tata Diosman jaywasqankumanta Tata Diosqa paykunaman chayta qon. Chay ch'aki mikhuy jaywanaqa jucha pampachasqa kananpaj jaywana jina, chantá jucharayku jaywana jinallataj Tata Diospaj t'aqasqa jaywana kashan.

¹⁸ 18 (11) Qhepanejman, wiñaypaj Aaronpa mirayninmanta tukuy qhareqa q'olachispa Tata Diosman jaywanamanta mikhuyta atenqanku. Kayqa wiñaypaj kamachisqay kanqa. Tukuy imachus Diosman jaywanaman chayajqa Tata Diospaj t'aqasqa kanqa, nispa.

Sacerdotekunaj jaywananku

¹⁹ 19 (12) Tata Dios Moisesta nillarqataj:

²⁰ 20 (13) Aarón, jinataj miraynin sacerdote kanankupaj aceitewan jawisqa kaspa, ajinata Tata Diosman jaywanqanku: Ch'aki mikhuymanta sumaj kaj jak'umanta iskay kilota jaywanqanku, tutamanta khuskanta, ch'isiyaykuytataj khuskanta. Ajinata wiñaypaj Tata Diosman jaywanqanku.

²¹ 21 (14) Chay jak'utaqa aceitewan chajruspa paylapi chayachenqanku. Chantá p'akiraspa q'olachenqanku, chay jaywanaj ima munayta q'apasqantaj sonqoypa munasqanman jina kanqa.

²² 22 (15) Chaytaqa Aaronpa churin jaywanqa, pichus paypa cuentanpi kuraj kaj sacerdote kananpaj t'aqasqa kanqa, chay. Kay kamachisqaqa wiñaypaj kanqa. Chay jaywanaqa tukuynin q'olachisqa kanqa.

²³ 23 (16) Sacerdotekunaj jaywasqankoqa tukuyninpuni q'olachisqa kanqa. Mana pipis chaymanta mikhonqachu, nispa.

Jucha pampachasqa kananpaj jaywanamanta kamachisqakuna

²⁴ 24 (17) Tata Dios Moisesta nillarqataj:

²⁵ 25 (18) Aaronta, churinkunatawan kamachiy, jucha pampachasqa kananpaj jaywaspaqa kay jinata ruwanankuta: Jucha pampachasqa kananpaj jaywasqa uywaqa Tata Diospa ñawpaqenpi ñak'asqa kanqa. Q'olachispa jaywanapaj uywata maypichus ñak'anku, chayllapitaj ñak'anqanku. Chayqa Tata Diospaj t'aqasqa jaywanamin.

²⁶ 26 (19) Jucha pampachasqa kananpaj jaywaj sacerdoteqa mikhonqa chay jaywanamanta Dioswan Tinkukuna Toldoj pationpi. Chay cheqaqa Diospaj t'aqasqamin.

²⁷ 27 (20) Imallapis Diosman jaywasqa aychaman chayajqa Diospaj t'aqasqa kanqa. Sichus uywaj yawarnin p'achaman ch'altaykunman chaypis, p'achata Diospaj T'aqasqa Cheqapi t'ajsanqanku.

²⁸ 28 (21) Sichus Diosman jaywasqa aychata t'uru mankapi chayachenqanku chayqa, chay manka p'akisqa kanqa. Sichus bronce mankapi chayachenqanku chayrí, chay mankata khituspa mayllallanqanku.

²⁹ 29 (22) Diosman jaywasqa aychataqa sacerdotekunalla mikhuyta atenqanku, imaraykuchus chay aychaqa Tata Diospaj t'aqasqamin.

³⁰ 30 (23) Chaywanpis sichus jucha pampachasqa kananpaj jaywasqa uywaj yawarninta Dioswan Tinkukuna Toldoman apanku chayqa, chay uywaj aychanta mana mikhonqankuchu. Jucha pampachasqa kananpaj Diosman jaywasqaqa tukuynin q'olachisqa kanan tiyan.