Levítico 5 - DIOSPA QHELQACHISQ

Jucha pampachasqa kananpaj waj jaywanakuna

¹ Tata Dios Moisesta nillarqataj: Sichus mayqenpis testigo jina imatachus rikusqanta, chayrí uyarisqanta sut'inchananpaj wajyasqa kanman, manataj sut'inchayta munanmanchu chayqa, juchallin. Payqa juchachasqa kanqa.

² Sichus pillapis mana reparakuspa, ch'ichipaj qhawasqa wañusqa animalta llankhanman, wasi uywata, chayrí pampata qhatatakuspa purej animalta chayqa, chay runa mana llimphupaj qhawasqa kanqa, juchayojtaj.

³ Sichus pillapis mana reparakuspalla, runaj ukhunmanta llojsej ch'ichinta llankhanman chayqa, mana llimphupaj qhawasqa kanqa. Chantá qhepanejman reparakunman chaypis, juchayojmin kanqa.

⁴ Sichus mayqellanpis mana allinta qhawarikuspalla, allin kajta, chayrí mana allin kajta ruwananta tilunman chayqa, chaymantataj pantaykusqanta reparakunman chaypis, chay runaqa juchayojmin kanqa.

⁵ Sichus pillapis chaykunata ruwaspa juchallinman chayqa, juchallisqanta rimarinan tiyan.

⁶ Chantá juchan pampachasqa kananpaj, uywanmanta uj china ovejata, chayrí uj cabrata apamunan tiyan, Tata Diosman jaywananpaj. Sacerdotetaj chay uywata ñak'aspa, Tata Diosman jaywajtin, chay runaj juchan pampachasqa kananta tarenqa.

⁷ Sichus juchallej runajta ovejata rantinanpaj mana tiyapunmanchu chayqa, juchan pampachasqa kananpaj, iskay jurk'uta, chayrí iskay urpi irpata apamunan tiyan, Tata Diosman jaywananpaj. Ujnenqa juchan pampachasqa kananpaj jaywanapaj kanqa, ujnintaj q'olachispa Diosman jaywanapaj kanqa.

⁸ Juchallej runaqa chaykunata sacerdoteman apanqa. Sacerdotetaj chay runaj juchan pampachasqa kananpaj ujnin urpi irpata ñawpajta Diosman jaywanqa, kunkanta q'ewispa, manataj umanta p'itispachu.

⁹ Chantá uj chhika yawarta altarpa uj lado uyanman ch'ajchonqa. Puchoj yawartataj altarpa uranman sut'uchenqa. Chayqa jucha pampachasqa kananpaj Diosman jaywanamin.

¹⁰ Ujnin urpitataj kamachisqa kasqanman jina, q'olachispa Diosman jaywanqa. Ajinata sacerdoteqa chay runaj juchan pampachasqa kananpaj jaywanqa. Chay runaj juchallisqantaj pampachasqa kanqa.

¹¹ Sichus juchallejpata iskay jurk'utata, chayrí iskay urpi irpata rantikunanpaj mana tiyapunmanchu chayqa, juchallisqan pampachasqa kananpaj sumaj jak'umanta iskay kilota Diosman jaywananpaj apamunan tiyan. Sumaj jak'umanqa aceiteta, nitaj inciensotapis mana churananchu tiyan, imaraykuchus chayqa jucha pampachasqa kananpaj Diosman jaywanapaj kanqa.

¹² Chayta sacerdoteman apanqa, paytaj uj pojtu jak'uta oqharispa, yuyarikuna jaywanata jina altarpi q'olachenqa, Tata Diosman jaywanatawan khuskata. Chayqa jucha pampachasqa kananpaj Diosman jaywanamin.

¹³ Ajinata sacerdote ruwanqa, imallapipis chay runaj juchallisqan pampachasqa kananpaj. Juchallejtaj qhespichisqa kanqa. Diosman jaywanamanta puchojtaj sacerdotepaj kanqa, imaynatachus ch'aki mikhuy jaywanamanta sacerdotekuna jap'inku, ajina, nispa.

¹⁴ Tata Diosqa Moisesta nillarqataj:

¹⁵ Sichus pillapis mana reparakuspalla juchallinman, noqapaj t'aqasqa kajmanta jap'ikapuspa chayqa, juchallisqanmanta Tata Diosman jaywananpaj, ovejanmanta, mana iman imanasqa corderota apamunan tiyan. Chay cordero mashkhachus valesqantaqa, Dioswan Tinkukuna Toldopi precio churasqa kasqanman jina churankichej. Chayqa jucha pampachasqa kananpaj jaywanamin.

¹⁶ Juchallejqa Tata Diospaj t'aqasqa kajta jap'ikapusqanmanta mashkhachus valesqanta kutichipunan tiyan. Chantá mashkhachus valesqanman sapa phishqamanta ujta yapaspa, sacerdoteman jaywanqa. Sacerdotetaj runaj juchan pampachasqa kananpaj, uywata ñak'aspa, Diosman jaywanqa. Ajinata ruwaspa, sacerdoteqa juchallejpata juchan pampachasqa kananta tarenqa. Chay runaj juchallisqantaj pampachasqa kanqa.

¹⁷ Sichus pillapis mana reparakuspalla, Tata Diospa kamachisqanmanta mayqellantapis p'akinman chayqa, chay runa juchayoj kanqa. Juchallisqantaj patanpi kanqa.

¹⁸ Chayrayku juchallej runaqa ovejanmanta mana iman imanasqa uj corderota sacerdoteman apamunan tiyan, chayrí cordero mashkhachus valesqanta qolqepi churanki. Sacerdotetaj runaj juchallisqan pampachasqa kananpaj Diosman jaywanqa. Ajinata ruwaspa chay runa mana reparakuspalla juchallisqan pampachasqa kananta tarenqa. Juchallisqantaj pampachasqa kanqa.

¹⁹ Chayqa juchamanta jaywanamin, imajtinchus juchallejqa cheqatapuni Diospa contranpi juchallerqa, nispa.