Levítico 25 - DIOSPA QHELQACHISQ

Jallp'a samarichina wata

¹ Tata Diosqa Sinaí orqopi Moiseswan parlaspa nillarqataj:

² Israelitakunata kay jinata ninki: Tata Dios nisunkichej: Qankunaman qosqaykichej chay jallp'aman yaykuspañaqa, qanchis kaj watapi Tata Diospa sutinpi jallp'ata samarichinkichej.

³ Jallp'aykichejta sojta watata tarpunkichej. Jinallataj sojta watata uva sach'aykita podankichej, poqoynintapis pallankichej.

⁴ Qanchis kaj watapitajrí, jallp'aqa Tata Diospaj samarenqa. Chay wata jallp'aykichejpi ama tarpunkichejchu, nitaj uva sach'aykichejtapis podankichejchu.

⁵ Jallp'a samarichina watapeqa k'ipa trigota ama ruthunkichejchu, nillataj huertaykichejmanta uvatapis pallankichejchu. Chay wataqa jallp'ata samarichina wata kanqa.

⁶ Jallp'a samarinan watapi payllamanta poqojta mikhunkichej, chayta qhari wata runaykichej, warmi wata runaykichej, chantá peonniykichej ima mikhullanqankutaj. Chantá qanwan tiyakoj waj llajtayojpis pachallanmanta poqojta mikhullanqataj.

⁷ Jinallataj uywaykichej, tukuy k'ita animalkuna ima mikhullanqankutaj. Chay wata jallp'api imachus poqojqa mikhunaykichejpaj kanqa, nispa.

Kacharipuna wata

⁸ Tata Dios israelitakunata nillarqataj: Qanchis kutikama qanchis watata yupankichej. Jinaqa tukuyninpi tawa chunka jisq'onniyoj wata kanqa.

⁹ Chantá qanchis kaj killapi, chunka p'unchay kashajtin, Jucha Pampachana p'unchayta, tukuy suyupi carneroj wajranmanta putututa waqachinkichej.

¹⁰ Phishqa chunka kaj wataqa Diospaj t'aqasqa kanqa. Chay wataqa Israel suyupi tukuy tiyakojkunaman willankichej Kacharipuna wata kasqanta. Kacharipuna watapi jallp'aqa ñawpa dueñonman kutichipusqa kanqa. Wata runapis ayllunman kutiponqa.

¹¹ Phishqa chunka kaj wataqa Kacharipuna wata kanqa. Chay watapi ama tarpunkichejchu, nitaj k'ipa poqojta ruthunkichejchu. Nillataj uvatapis pallankichejchu, nitaj podankichejchu.

¹² Chay wataqa Diospaj t'aqasqa wata kanqa, qankunapajtaj Kacharipuna wata. Chay wataqa payllamanta poqojta mikhunkichej.

¹³ Kacharipuna watapi sapa uj jallp'aykichejta watej jap'ikapunkichej.

¹⁴ Sichus pipis jallp'ata runa masiykichejman vendenkichej, chayrí rantikunkichej chayqa, ama q'otiyanakunkichejchu.

¹⁵ Sichus runa masiykimanta jallp'ata rantikunki chayqa, Kacharipuna watamanta, mashkha watañachus pasasqanta yupanki. Pichus vendejtaj mashkha watatachus chajrata oqharerqa, chayman jina vendenqa.

¹⁶ Sichus ashkha watataraj chajra oqharina kanman chayqa, jallp'aqa astawan valenqa. Sichus Kacharipuna wataman manaña unayñachu kanman chayrí, jallp'aqa pisilla valenqa. Jallp'aj precionqa mashkha watatachus chajra oqharina kanman, chayman jina kanqa.

¹⁷ Ama pipis runa masiykichejta q'otiyankichejchu. Noqa Tata Diosniykichejta jatun respetowan maypaj qhawawaychej. Noqa Tata Diosmin Diosniykichejqa kani.

¹⁸ Kamachisqaykunata kasuychej, yachachisqaytapis ruwaychej, junt'aychejtaj. Chantá chay jallp'aykichejpi mana ni imata manchachikuspa, tiyakunkichej.

¹⁹ Jallp'aqa sumajta poqopusonqachej, qankunataj sajsakunaykichejkama mikhunkichej. Chaypitaj ni imamanta manchachikuspa, tiyakunkichej.

²⁰ Ichapis qankuna tapukuwajchej: Qanchis kaj watapi mana tarpuspa, nitaj chajrata oqharispa, imatataj mikhusqaykuri? nispa.

²¹ Noqamin sojta kaj watapi saminchasqaykichej. Chay wataqa kinsa watata mikhunaykichejpaj jina poqopusonqachej.

²² Samarina wata pasayta, pusaj kaj watapi ujtawan tarpunaykichejkama, puchojta mikhushankichejraj. Chay watapi tarpusqaykichej poqonankama, jisq'on kaj watakamapis puchojta mikhunkichejraj.

²³ Jallp'aqa mana wiñaypajchu vendesqa kanqa, imaraykuchus jallp'aqa noqajtamin, chayrayku. Qankunaqa waj llajtayojpis kawajchej jina noqaj wajyarikusqaylla kankichej.

²⁴ Chayrayku tukuy jap'isqaykichej jallp'ata ñawpa dueñon preciota pagaspa orqhokapunanta mana jark'akunaykichejchu tiyan.

²⁵ Sichus llajta masiykimanta mayqen pisichikuspa, jallp'anta vendesunkiman chayqa, paypa aswan qaylla ayllun kaj jamuspa, chay vendesusqan jallp'ata watej rantikapuyta atin.

²⁶ Ichapis pejpata jallp'ata orqhokapunanpaj mana ayllun kasqanrayku, vendesqan jallp'anta watej orqhokapunanpaj payllataj qolqeta tantakunman chayqa,

²⁷ mayk'ajchus venderqa chaymantapacha mashkha watachus pasasqanta yupaspa, pichus rantikojman qolqeta kutichispa, watej jallp'anta orqhokaponqa.

²⁸ Chaywanpis sichus watej orqhokapunanpaj mana qolqeta tariyta atinmanchu chayqa, jallp'aqa pichus rantikojpa makinpi Kacharipuna watakama kanqa. Kacharipuna watapi chay jallp'aqa ñawpa dueñonman kutichisqa kanqa. Ñawpa dueñontaj jallp'anman yaykuponqa.

²⁹ Sichus pipis wasinta perqawan muyuykusqa llajtapi vendenman chayqa, vendesqanmanta watankamalla watej rantikapuyta atin.

³⁰ Sichus vendej mana chay watapi rantikapuyta atinmanchu chayqa, chay waseqa pichus rantikojpa makinpi qhepakonqa. Pichus rantikojpa miraynintinpaj wiñaypaj kanqa. Kacharipuna watapipis ñawpa dueñonman mana kutichipuyta atenqañachu.

³¹ Mana perqawan muyuykusqa juch'uy llajtakunapi waseqa campo wasi jinalla qhawasqa kanqa. Ñawpa dueñon kajkuna watej rantikapuyta atenqanku, jinallataj Kacharipuna watapi rantikojqa chay wasita ñawpa dueñonman kutichiponqa.

³² Chaywanpis levitakunaqa llajtanku ukhupi wasinkuta mayk'ajllapis watej rantikapuyta atillanqanku.

³³ Pillapis levitakunamanta uj wasita rantikojqa, rantikusqan wasita Kacharipuna watapi kutichipunan tiyan. Ripunantaj tiyan llajtanman, maypichus wasin tiyan chayman, imaraykuchus levitakunajtaqa israelitakunaj llajtankukunapi tiyakunankupaj chaylla wasinku tiyapun.

³⁴ Levitakunaj llajtankoj qayllanpi uywa michinankoqa mana vendena atikunchu, imajtinchus chayqa wiñaypaj paykunajta.

³⁵ Sichus mayqen llajta masiyki wajchayaspa, qanman jamusunkiman chayqa, waj llajtayojta jina yanapanayki tiyan, wasiykiman wajyarikuspa.

³⁶ Manusqaykimantaqa ama interesta mañankichu, manachayqa Diosniykita may jatun respetowan qhawaspa, llajta masiykita wasiykipi tiyakunanpaj wajyarikuy.

³⁷ Ama qolqeta manusqaykimanta interesta mañankichu, nillataj mikhunata vendespapis astawan kurajpi payman vendenkichu.

³⁸ Noqa Tata Diosmin Diosniykichej kani, pichus Egiptomanta orqhomorqaykichej Canaán jallp'ata qosunaykichejpaj, Diosniykichejtaj kanaypaj, chay.

³⁹ Sichus mayqen llajta masiyki qanwan tiyakushaspa astawan pisichikapunman, qanmantaj vendekusunkiman chayqa, ama wata runata jinachu payta qhawanki.

⁴⁰ Payqa peonniyki jina, chayrí waj llajtayoj jina kanqa. Kacharipuna wata chayamunankamataj qanpaj llank'apusonqa.

⁴¹ Chay watataj pay, tukuy wawankunawan ima wasiykimanta llojsiponqa. Chantá ayllunman kutiponqa, ñawpa tatankunaj jallp'antataj ujtawan jap'ikaponqa.

⁴² Tukuy israelitakunaqa noqajta kamachiykuna kanku. Noqa paykunata Egiptomanta orqhomorqani, chayrayku paykunaqa mana wata runa jina vendesqa kanqankuchu.

⁴³ Chantapis ama mana sonqoyoj runa jina paykunata ñak'arichinkichu, manachayqa Diosniykita may jatun respetowan qhawaspa manchachikunki.

⁴⁴ Sichus warmi wata runayoj, chayrí qhari wata runayoj kayta munankichej chayqa, muyuyniykichejpi kaj suyukunamanta rantikunkichej.

⁴⁵ Jinallataj qankunawan tiyakoj waj llajtayojkunamanta, chantá llajtaykichejpi tiyakushaspa paqarej wawankuta wata runapaj rantikuyta atillankichejtaj. Chaykunata rantikuyta atinkichej qankunajtapuni kanankupaj.

⁴⁶ Chaykunatataj wawaykichejman chayaqeta jina saqeyta atinkichej, paykunajta kanankupaj. Paykunata wata runata jina wiñaypaj jap'ikunkichej. Chaywanpis ama pipis israelita masiykichejta sinch'ita ruwachispa, ñak'arichinkichejchu.

⁴⁷ Ichapis qanwan tiyakoj waj llajtayoj qhapajyanman. Chantá paypa qayllanpi tiyakoj israelita masiyki wajchayaspa, chay waj llajtayojman vendekunman, chayrí waj llajtayojpa ayllunman vendekunman chayqa,

⁴⁸ vendesqa kasqanmantaña pipis preciota pagaspa payta kacharichiyta atin. Mayqen wawqellanpis preciota pagaspa kacharichiyta atin.

⁴⁹ Tion, uj qaylla ayllun, chayrí mayqen karu ayllunraj kajpis kacharichiyta atin. Sitajchus pay kikin vendekoj atinman chayqa, pay kikinmanta pagakuyta atenqa.

⁵⁰ Pichus rantejninwan khuska pay vendekusqan watamantapacha Kacharipuna watakama mashkharajchus kasqanta yupanqanku. Chay runaj precionqa mashkha watarajchus kasqanman jina, chantá mashkha watatañachus paypaj llank'asqanman jina kanqa. Llank'asqanpa precionqa uj peón mashkhatachus ganan, chayman jina kanqa.

⁵¹ Sichus Kacharipuna wataman unayraj kanman chayqa, chayman jina qolqeta kutichinan tiyan, mashkhapichus vendekusqanman jina.

⁵² Sichus Kacharipuna watapaj pisillaña kashan chayqa, mashkha watawanrajchus kanan kashan, chayman jina qolqeta kutichiponqa.

⁵³ Paytaqa uj watapajpis peonta jap'inman karqa jina qhawankichej. Ama saqenkichejchu rantejnin sinch'ita ñak'arichispa payta ruwachinanta.

⁵⁴ Sichus chay watapi mana pipis pagaspa israelita masinta kacharichinchu chayqa, Kacharipuna watallapiña chay runa wawankunawan khuska llojsiponqa.

⁵⁵ Israelitakunaqa kamachiykuna kanku, kamachiykuna kanankupaj paykunata Egiptomanta orqhomorqani. Noqa Tata Diosmin, Diosninku kani, nispa.