Levítico 20 - DIOSPA QHELQACHISQ

Mana kasukojkunapaj jasut'i

¹ Tata Dios Moiseswan parlaspa, nillarqataj:

² Israelitakunata ajinata ninki: Sichus israelitakunamanta mayqellanpis, chayrí qankuna ukhupi tiyakoj waj llajtayojpis Moloc sutichasqa lantiman wawanta jaywanman chayqa, tukuy runakuna rumiwan ch'anqaspa chay runata wañuchenqanku.

³ Noqa chay runaj contranpi sayaykusaj, llajtanmantataj chinkachisaj, imaraykuchus wawanta Molocman jaywaspa, tiyakunayta ch'ichicharqa, llimphu sutiytapis sarorqa.

⁴ Sichus llajtayojkuna chay jina ruwajta qhawakuspalla, mana wañuchinkumanchu chayqa,

⁵ noqa chay runaj contranta, jinataj ayllunpa contranta sayaykuspa, paykunata chinkachisaj. Pikunachus paywan khuska Molocta yupaychaspa qhenchachakorqanku, chaykunatapis chinkachillasajtaj.

⁶ Sichus pipis aysirikunata, chayrí layqakunata tapukoj rinman, paykunaj nisqankutataj ruwaspa ch'ichichakunman chayqa, noqa paypa contranta sayaykuspa, llajtanmanta chinkachisaj.

⁷ Tukuyniykichej juchamanta t'aqakuspa, noqallata kasuspa puriychej, imaraykuchus noqa Tata Diosmin Diosniykichej kani.

⁸ Kamachisqaykunata kasuspa, junt'aychej. Noqamin Tata Diosqa kani, pichus qankunata noqajllata kanaykichejpaj t'aqaykichej, chay.

⁹ Pillapis tatanta, chayrí mamanta maldicejqa wañuchisqapuni kanqa. Tatanta, chayrí mamanta maldicisqanmanta wañunanpajqa paylla juchayoj kanqa.

¹⁰ Sichus pipis runa masinpa warminwan puñuykunman chayqa, khuchichakun. Iskayninku wañuchisqa kanqanku.

¹¹ Sichus pillapis tatanpa warminwan puñuykapuspa, tatanta p'enqaypi rikhurichinman chayqa, chay qhari, jinallataj warmipis wañuchisqa kanqanku. Wañuchisqa kanankupajqa paykunalla juchayoj kanqanku.

¹² Sichus pillapis ñojch'anwan puñuykunman chayqa, iskayninku wañuchisqa kanqanku. Wañuchisqa kanankupajqa paykunalla juchayoj kanqanku, imaraykuchus chayqa millay juchamin.

¹³ Sichus uj qhari, warmiwan jina qhari masinwan t'inkikunman chayqa, iskayninku wañuchisqa kanqanku, imaraykuchus chayqa millay juchamin. Wañuchisqa kanankupajqa paykunalla juchayoj kanqanku.

¹⁴ Sichus uj qhari uj warmiwan casaraspa, warminpa mamanwanpis casarallanmantaj chayqa, millayta ruwan. Kinsantin kawsashaj ruphachisqa kanqanku, ama qankuna ukhupi chay jina millayta ruwaspa purina kananpaj.

¹⁵ Sichus uj qhari uj uywawan t'inkinakunman chayqa, wañuchisqa kanqa. Jinallataj chay uywatapis wañuchillankichejtaj.

¹⁶ Sichus uj warmi uj uywawan t'inkinakunman chayqa, warmipis, uywapis wañuchisqa kanqanku. Wañuchisqa kanankupajqa paykunalla juchayoj kanqanku.

¹⁷ Sichus pipis tatanmanta chayrí mamanmanta pananwan warmichakunman, puñuykunkumantaj chayqa, iskayninku llajta masinku rikushajtin, wañuchisqa kanqanku. Kikin pananwan puñuykoyqa millay p'enqayta ruwaymin. Pichus pananwan puñuykoj wañuchisqa kananpajqa paylla juchayoj kanqa.

¹⁸ Sichus pillapis killanpi kashaj warmiwan puñuykunman chayqa, warmej yawarninta rikun, warmipis yawarninta rikuchikun. Chayrayku iskayninku llajtankumanta chinkachisqa kanqanku.

¹⁹ Ama mamaykej ñañanwan, nitaj tataykej pananwan puñuykunkichu, imaraykuchus aylluykimin kanku. Puñuykojkunaqa juchallisqankumanta jasut'isqa kanqanku.

²⁰ Sichus pillapis tionpa warminwan puñuykunman chayqa, tionta p'enqaypi rikhurichin. Iskayninku juchallisqankumanta jasut'isqa kanqanku, mana wawayojtaj wañonqanku.

²¹ Sichus pillapis wawqenpa warminwan puñuykunman chayqa, wawqenta p'enqaypi rikhurichin. Chayta ruwaspaqa, millayta ruwan. Chayrayku iskayninku mana wawata rejsej kanqanku.

²² Qankuna tukuy kamachisqayta, imatachus nisqaytawan kasuychej, junt'aychejtaj. Kasukunkichej chayqa, tiyakunaykichejpaj maymanchus chayachisqaykichej, chay jallp'amanta mana wijch'umusqaykichejchu.

²³ Pikunatachus qankunaj ñawpaqeykichejmanta qharqosaj, chay runakunaj usunkuta ama ruwankichejchu. Paykuna chay jina millayta ruwasqankurayku, mana noqa paykunata rikuyta aterqanichu.

²⁴ Noqa niykichej, chay llajtayojkunaj jallp'ankuta jap'ikapunaykichejta. Noqataj maypichus lechewan, abeja misk'iwan yaku jina purishan, chay jallp'ata qankunajta kananpaj qosqaykichej. Noqa Tata Diosmin qankunaj Diosniykichej kani, pichus waj suyukuna ukhumanta qankunata t'aqarqaykichej, chay.

²⁵ Chayrayku qankunaqa mayqenchus mikhunapaj llimphu animal kasqanta, mayqentajchus mana llimphuchu kasqankuta reparankichej. Phawajkunamantapis mayqenchus llimphu, mayqentajchus mana llimphuchu kasqankuta reparallankichejtaj. Ama chay animalkunarayku, nitaj phawajkunarayku, nillataj pampata qhatatakuspa purej animalkunarayku mana llimphupaj qhawasqa kankichejchu. Noqa chaykunata ch'ichipaj qhawasqa kanankupaj t'aqani.

²⁶ Qankunaqa noqapaj t'aqasqa kajkuna jina puriychej, imaraykuchus noqaqa may jina llimphu llimphupuni kani. Noqamin qankunata suyukuna ukhumanta t'aqarqaykichej noqajllata kanaykichejpaj.

²⁷ Sichus pi qhari, chayrí pi warmipis aysiri kanman, chayrí layqa kanman chayqa, payta rumiwan ch'anqasqa wañuchinkichej. Wañuchisqa kananpajqa paylla juchayoj kanqa, nispa.