Levítico 12 - DIOSPA QHELQACHISQ

Onqokoj warmi llimphuchakunanmanta

¹ Tata Dios Moiseswan parlaspa, nillarqataj:

² Israelitakunata niy: Sichus uj warmi onqoj rikhurispa, qhari wawata paqarichikunman chayqa, qanchis p'unchayta mana llimphupaj qhawasqa kanqa, imaynatachus killa onqoyninwan kaspa karqa, ajinata.

³ Chantá wawaqa paqarisqanmanta pusaj p'unchayninman circuncidasqa kanqa.

⁴ Chaymanta wawaj mamanqa kinsa chunka kinsayoj p'unchaytawanraj yawarninmanta llimphuchakonqa Diospa ñawpaqenpi llimphu kananpaj. Llimphuchakunan p'unchay junt'akunankamaqa, Diospaj t'aqasqa kajmanta mana ni imata llankhanqachu, nitaj Dioswan Tinkukuna Toldomanpis riyta atenqachu.

⁵ Sichus warmi wawata paqarichikonqa chayrí, mamanqa iskay semanata mana llimphupaj qhawasqa kanqa, imaynatachus killa onqoyniyoj kaspa karqa, ajinata. Chaymantataj sojta chunka sojtayoj p'unchaytawanraj, yawarninmanta llimphuchakuspa kanqa.

⁶ Onqokoj warmi llimphuchakunan p'unchay junt'akojtin, qhari wawata, chayrí warmi wawata paqarichikusqanmanta, uj watayoj corderota apamunan tiyan, Dioswan Tinkukuna Toldo punkupi, q'olachispa Tata Diosman jaywananpaj. Apamunallantaj tiyan uj urpi irpata, chayrí uj jurk'utata, jucha pampachasqa kananpaj Diosman jaywananpaj. Chaykunatataj sacerdoteman apamonqa.

⁷ Sacerdotetaj chayta Tata Diosman jaywanqa, chay warmej juchan pampachasqa kananta mañaspa. Ajinamanta onqokoj warmeqa yawar apayninmanta llimphuchasqa kanqa. Kaykuna qhari wawata, chayrí warmi wawata paqarichikoj warmimanta kamachisqakuna kashan.

⁸ Sichus onqokoj warmejta corderota apamunanpaj mana tiyapunmanchu chayqa, apamuchun iskay jurk'utata, chayrí iskay urpi irpata. Ujnenqa Tata Diosman q'olachispa jaywanapaj kanqa, ujnintaj jucha pampachasqa kananpaj Diosman jaywanapaj kanqa. Ajinata sacerdoteqa warmej juchan pampachasqa kananpaj jaywanqa, warmitaj llimphupaj qhawasqa kanqa, nispa.