Levítico 1 - DIOSPA QHELQACHISQ

Diospa munasqanman jina jaywana

¹ Tata Diosqa Dioswan Tinkukuna Toldomantapacha Moisesta wajyaspa, nerqa:

² Israelitakunata niy: Qankunamanta pipis Tata Diosman jaywananpaj apamuspaqa, wakata, chayrí ovejata apamunaykichej tiyan.

³ Sichus mayqenpis sonqonmanta munaspa q'olachispa jaywanata wakankunamanta apamuwanqa chayqa, mana iman imanasqa uj torota apamuchun. Jaywasqanta Tata Dios kusisqa jap'ikunanpajqa, Dioswan Tinkukuna Toldoman yaykuna punkupi jaywanqa.

⁴ Pichus jaywajqa makinta uywaj umanman churanqa. Ajinamanta uywata ñak'aspa q'olachisqanqa juchan pampachasqa kananpaj jap'isqa kanqa.

⁵ Chantá Tata Diospa ñawpaqenpi torota ñak'anqa. Chaymanta Aaronpa mirayninmanta kaj sacerdotekuna toroj yawarninta jap'ispa ch'ajchonqanku, Dioswan Tinkukuna Toldoman yaykuna punkupi altarpa patanta, chantá tukuy muyuyninta ima.

⁶ Pichus uywata ñak'aspa q'olachinapaj apamojqa, chay uywaj qaranta ch'uskenqa, aychantataj chhikan chhikanta khuchuranqa.

⁷ Chantá sacerdote Aaronpa churinkunaqa altarpi ninata jap'ichenqanku, ninaj patanmantaj llant'ata tawqanqanku.

⁸ Jinaspataj, Aaronpa churinkunamanta sacerdotekuna ñak'asqa uywamanta khuchusqa aychata, umanta, chantá wirantawan ima nina pataman churaykonqanku.

⁹ Chantá pichus jaywajqa uywaj ch'unchulanta, chakintawan ima yakuwan mayllanqa. Chaymantataj sacerdoteqa tukuyninta altar patapi q'olachenqa. Chay q'olachispa jaywanaqa Tata Diospaj ima munay q'aparishaj jaywana kanqa.

¹⁰ Sichus israelitakunamanta pipis q'olachispa jaywananpaj ovejamanta, chayrí cabramanta apamonqa chayqa, orqota mana iman imanasqata apamunan tiyan.

¹¹ Chantá chay uywata pichus apamojqa, Tata Diospa ñawpaqenpi altarmanta wichaynejpi ñak'anqa. Chaymantataj Aaronpa churinkunamanta sacerdotekunaqa uywaj yawarninta altarpa tukuy muyuyninman ch'ajchonqanku.

¹² Chaymantataj pichus jaywajqa uywaj aychanta chhikan chhikanta khuchuranqa. Sacerdotetaj uywaj aychanta, umanta, wiranta ima altarpi llant'a pataman churanqa.

¹³ Chantá pichus jaywajqa uywaj ch'unchulanta, chakinta ima yakuwan mayllanqa. Sacerdotetaj tukuy chaykunata altarpi q'olachispa jaywanqa. Chay q'olachisqa jaywanaqa Tata Diospaj ima munay q'aparishaj jaywana kanqa.

¹⁴ Sichus pipis Tata Diosman q'olachispa jaywanapaj phawajkunamanta apamunman chayqa, jurk'utata, chayrí urpi irpata apamunan tiyan.

¹⁵ Chantá sacerdoteqa phawaj uywata altar patapi Tata Diosman jaywanqa. Umanta p'itispa, yawarninta altarpa uj ladonman sut'uchenqa, chaymantataj phawaj uywata altar patapi q'olachenqa.

¹⁶ Ch'itinta, chantá phuruntawan orqhospa, altarmanta inti llojsimuynejpi, ushpha wijch'una cheqaman wijch'onqa.

¹⁷ Phawaj uywataqa mana iskayman p'itispa, lijran chaynejmanta ch'ejtanqanku. Chantá jinaytawan, sacerdoteqa phawaj uywata altar patapi q'olachenqa. Chay q'olachisqa jaywanaqa Tata Diospaj ima munay q'aparishaj jaywana kanqa, nispa.