Lamentaciones 1 - DIOSPA QHELQACHISQ

Jerusalén llajtarayku Jeremías waqan

¹ Jerusalén llajta unay may chhika runayoj karqa, kunantaj ch'inpacha qhepakun. Llajtakuna ukhupi chay chhika jatun llajta kashaspa, warmisapaman jina tukun. Suyukunata kamachej llajtataj kunanqa mit'animan tukun.

² Jerusalén llajta runa jina tukuy tuta sonqo nanayta waqan, waqayninpis uyanta sururin. Waynankunamanta ni mayqen sonqochaykurej kanchu. Tukuy kawsaqenkuna wasancharqanku, awqanmantaj tukorqanku.

³ Judá suyupi tiyakojkuna karu suyukunaman apasqa kanku. Chaypi may ñak'arichisqa kanku, sinch'i ruwanawan. Waj suyukunaj chawpinpi tiyakuspa, mana samariyta tarinchu. Awqakunawan muyurisqa kaspataj mana ayqeyta atinchu.

⁴ Sionman rej ñankunaqa llakiy, ch'inpachalla kashanku. Mana pipis jatun raymiman jamoj kanchu. Jerusalén llajtaj punkunkunaqa tukuynin thuñisqa, ch'inpachataj kashanku. Chayrayku sacerdotekunaqa waqarikunku. Sipaskunapis manchay llakisqa kashanku. Jerusalén llajtaqa llakiypa atipasqan kashan.

⁵ Awqankunaqa mayta qhapajyarinku, paykunaj makinkupitaj kashan. Jerusalentaqa Tata Diospuni chay jinata llakichin, may chhikata juchallikusqanrayku. Wawankukunapis waj suyukunaman chayarqanku awqankoj apasqanrayku.

⁶ Jerusalenpa k'achita kayninpis chinkaporqa. Kurajninkunaqa taruka jina yarqhasqa pastota mask'aspa purinku. Ancha pisi kallpa kashanku, qhatiykachajkunaj ñawpaqenmanta ayqenankupaj.

⁷ Jerusalén, ñak'arichisqa llakiypi purishaspa, yuyarikuy ñawpa tiempopi qhapaj kasqaykimanta. Kunantajrí awqayki mayta alqochakuspa asipayasunki, imaynatachus urmasqaykita rikuspa. Nitaj pipis yanaparej jamusorqachu.

⁸ Jerusalenqa anchatapuni juchallikorqa. Chayrayku chejninapaj jinaman tukorqa. Payta jatunpaj qhawajkuna kunan pisipaj qhawanku, q'alalla kayninta rikusqankurayku. Chayrayku p'enqakuywan wasaman tijrakuspa, waqashan.

⁹ P'achanqa millay ch'ichi kashan, manataj yuyarqachu imapichus rikhurinanta. Chayrayku payqa t'ukunata urmarqa, manataj pipis sonqochaykurej kanchu. Qhawariy ari, Tata Dios, llakiyniyta, awqaypis manchayta runaykachasqankuta.

¹⁰ Awqankoqa Jerusalenpata qhapaj imankunata jap'ikapun. Jerusalenqa qanta mana manchachikoj runakunata rikorqa Temploykiman junt'aykojta, pikunatachus mana Temploykiman yaykunankuta nerqanki, chaykunata.

¹¹ Tukuy llajtantin waqarikuspa, mikhunata mask'amunku. Tukuy kapuyninkuta mikhunallawan chhalanku, yarqhaymanta ama wañunankupaj. Qhawariy, Tata Dios, kay jina llakiypi k'umuykachachisqa kasqayta.

Jerusalén Diosmanta mañakun

¹² Qankuna kay ñanta purejkuna, manachu sonqoykichej nanasunkichej noqata rikuwaspa? Sayarispa, qhawariwaychej. Kay ñak'arisqaymanta astawan sinch'i ñak'ariy kanmanchu? Kay jina ñak'ariyta Tata Dios k'arajta phiñakuspa, apachimuwan.

¹³ Tata Diospuni janaj pachamantapacha ninata kachaykamuwaspa, tulluykama ruphaykuchiwan. Chakiyman tojllata churaykuwan, qhepamantaj kutirichiwan. Sonqo nanayta sapayta saqerpariwasqanrayku, tukuy p'unchaynintin llakiywan ñak'arini.

¹⁴ Tata Diosqa juchallisqayta rikuspa, chay juchayllawantaj yugowan jina wataykuwan. Chayqa manchayta llasaykuwan, kallpayta tukuchinawankama. Tukuyta Kamachej Diosqa millay runakunaj makinman churaykuwan, noqataj manaña awantayta atinichu.

¹⁵ Tukuyta Kamachej Diosqa jark'akuwaj wapu soldadoykunata wijch'un. Ashkha soldadotataj kachaykamuwan, wapu soldadoykunata wañurachinankupaj. Tukuyta Kamachej Diosqa uvatapis sarushanman jina, mana qharita rejsej sipasta jina Judá suyuta sarurparin.

¹⁶ Chayrayku noqa waqaykushani, ñawiypis waqaywan junt'a kashan. Mana piniypis sonqochanawanpaj kanñachu, nitaj pipis kallpachawajneyqa kanñachu. Wawaykunaqa thuñisqa llajtapi qhepakunku, awqayku atipaykuwasqaykurayku.

¹⁷ Sión llajta makinta jaywarikamun yanapanankuta mañakuspa, manataj pipis kanchu payta sonqochaykurej. Tata Diosqa Jacobpa contranta kamachin qayllanpi suyukuna awqankuna kanankuta. Jerusalentaj paykunaj chawpinkupi millachikunaman tukun.

¹⁸ Jerusalén llajta nin: Tata Diosqa cheqanpuni, noqarí paypa contranta oqharikorqani, kamachisqanta p'akispa. Kunanqa tukuy runa, qhawaychej, rikuychejtaj ñak'arisqayta. Sipasniykunata, waynuchuykunatawan ima apakapunku.

¹⁹ Waynaykunata yanapanawankupaj wajyakorqani, paykunatajrí wasanchawarqanku. Sacerdoteykunawan, kurajniykunawanqa llajta ukhupi wañorqanku. Kutirinankupaj mikhunata mask'akuspa, purerqanku.

²⁰ Tata Dios, llakikuyniyta qhawariy. Sonqoypis phataj jinaña nanaykushawan. Mana kasukoj kasqayrayku nanaypis sonqoyta ñit'iykuwan. Jawapeqa espadawan wawaykunata wañuchinku, llajta ukhupipis wañullay kashan.

²¹ Waqashajta uyariwanku, manataj pipis sonqochaykuriwaj kanchu. Tukuy awqaykuna mana allinpi kasqayta yachanku, maytataj kusikunku kay jinata ñak'arichiwasqaykimanta. Paykunamanpis jasut'isaj, nispa nisqaykita apachimullayña, paykunapis noqa jina ñak'arinankupaj.

²² Qanpa ñawpaqeykiman tukuy millay ruwasqanku chayamuchun. Imaynatachus noqa mana kasukojtiy ruwawarqanki, ajinallatataj paykunatapis ruway ari. Anchataña waqasqayrayku, sonqoy p'akisqa kashan, nispa. Ajinata Jerusalén llajta Tata Diosta nin.