Jueces 6 - DIOSPA QHELQACHISQ

Diosqa Gedeonta wajyan

¹ Chaymanta qhepaman israelitakunaqa watej Tata Diospa mana munasqanta ruwallarqankutaj, qanchis wata junt'atataj Tata Diosqa paykunata jaywaykorqa madianitakunaj makinkuman.

² Madianitakunaqa sinch'itapuni israelitakunata ñak'aricherqanku. Israelitakunataj madianitakunata manchachikuspa, orqokunapi pakakunata ruwarakamorqanku, chhanka jusk'ukunapi, maymanchus runakuna mana yaykullankuchu, chaynejpi.

³ Israelitakuna imallatapis tarpojtinkoqa, madianitakuna, amalecitakunapis, chantá inti llojsimuynejmanta runakunapis chajrankuman suwaj yaykuykullajpuni kanku.

⁴ Israelitakunaj jallp'ankupi jaraykukoj kanku, chajrankutataj t'ustiykoj kanku Gaza llajta chaynejkama. Israelitakuna mikhunankupajqa mana imatapis puchurichejchu kanku. Manallataj ni ovejakunata, ni bueykunata, nitaj burrokunatapis saqejchu kanku.

⁵ Toldonkukunata sayachispa, chay madianitakunaqa uywankunawan ima Israel suyuman junt'aykorqanku, tukuy imata t'ustiraspa. Phinki phinkikuna jinapuni may chhika camellonkukunawan junt'aykoj kanku.

⁶ Madianitakuna chayta ruwajtinkutaj, israelitakunaqa may llakiyta ñak'arerqanku. Chayrayku Tata Diosman qhaparikorqanku, yanapananta mañakuspa.

⁷ Maypachachus israelitakuna Tata Diosmanta mañakorqanku madianitakunamanta kacharichinanta, chaypacha,

⁸ Tata Dios kachamorqa Diosmanta uj willajta, paytaj israelitakunata nerqa: Ajinata nin Israelpa Tata Diosnin: Noqa qankunata Egiptomanta orqhomorqaykichej, chaypi wata runakuna kashajtiykichej.

⁹ Manataj Egipto llajtayojkunallamantachu qankunata kacharicherqaykichej, manachayqa qankunata tukuy ñak'arichejkunamantapis kacharichillarqaykichejtaj. Paykunataqa ñawpaqeykichejmanta wijch'urarqani, qankunamantaj jallp'ankuta qoporqaykichej.

¹⁰ Nerqaykichejtaj: Noqa Tata Diosniykichej kani. Amapuni amorreokunaj diosninkutaqa manchachikunkichejchu, pikunaj jallp'ankupichus kashankichej, chaykunajtaqa, nispa. Chaywanpis qankunaqa mana kasuwarqankichejchu, nispa.

¹¹ Aswan qhepaman uj kuti Tata Diospa angelnin jamuspa, Ofrá chaypi uj encina sach'a urapi tiyaykukorqa. Chay sach'aqa Abiezerpa ayllun Joaspata karqa. Chay sach'a qayllapitaj Joaspa churin Gedeontaj pakayllamanta trigota wayrachisharqa, maypichus uvata saroj kanku, chay t'oqopi, madianitakunamanta pakaykunanpaj.

¹² Jinapi Tata Diospa angelnin payman rikhurispa, nerqa: Tata Dios qanwan kashan, kallpayoj wapu runa, nispa.

¹³ Gedeonrí kuticherqa: Ay wiraqochíy, noqaykuwanchus Tata Dios kashan chayqa, imaraykutaj kay tukuy ima qhatirishawaykuri? Maytaj chay t'ukuna imakunata Egiptomanta orqhomushaspa, Tata Dios ruwasqanmanta ñawpa tataykukuna willawasqaykuri? Tata Diosqa madianitakunaj makinman jaywaykuwayku, nispa.

¹⁴ Chantá Tata Diosqa Gedeonta qhawarispa, nerqa: Chay kallpallaykiwan rispa, israelitakunata madianitakunaj makinkumanta kacharichimuy. Noqamin kachashayki, nispa.

¹⁵ Gedeontajrí nerqa: Wiraqochíy, ujtawan nirikusqayki: Imaynatataj israelitakunata kacharichiymanri? Aylloyqa Manasés ukhupi kaj ayllukunamanta mana kasu ruwana, noqataj, wasi aylluypi kajkunamanta aswan sullk'a kani, nispa.

¹⁶ Chantá Tata Dios kuticherqa: Atinkipuni, imaraykuchus noqa qanwan kasaj. Madianitakunataqa uj sapan runallapis kanman jina atipanki, nispa.

¹⁷ Gedeontaj kuticherqa: Sichus allinpaj qhawawanki chayqa, uj señalta rikuchiway, yachanaypaj qan pichus noqawan parlajqa Tata Diospuni kasqaykita.

¹⁸ Ama jinachu kay, amaraj ripuychu, qanman jaywanaypaj uj ofrendata apamunaykama, nispa. Tata Diostaj nerqa: Kaypi kutimunaykikama suyasqayki, nispa.

¹⁹ Chantá Gedeonqa usqhay usqhayta wasinman kutirispa, uj chivota ñak'arqa, chaymantataj mikhuyta wayk'orqa. Iskay chunka libra jak'umanta mana levadurayoj t'antatapis ruwallarqataj. Jinaspataj, aychata uj canastaman churaykorqa, caldontataj uj mankaman. Chaytataj Tata Diospa angelninman aparqa, chay encina sach'a uraman.

²⁰ Chantá Tata Diospa angelnenqa Gedeonta kamacherqa aychata, mana levadurayoj t'antatapis chhanka pataman churananta, caldontataj patanman jich'aykunanta. Gedeontaj ajina nisqanta ruwarqa.

²¹ Jinapi angelqa varawan chay aychata, jinataj chay t'antata llankhajtinkama, chay chhankamanta nina lawray llojsimuspa, aychata, t'antatapis q'olaykorqa. Chaymantaqa Tata Diospa angelnin chinkariporqa.

²² Gedeonqa Tata Diospa angelninpuni kasqanta reparaytawankama, nerqa: Ay, Tukuyta Kamachej Tata Dios, angelniykitapuni uyapura rikuni, nispa.

²³ Tata Diostajrí kuticherqa: Ama manchachikuychu, mana wañunkichu. Sonqo tiyaykusqa kay, nispa.

²⁴ Chaypi Gedeonqa Tata Diospaj uj altarta ruwaporqa, suticharqataj: “Tata Diosmin Sonqo Tiyaykoyqa”, nispa. Chay altarqa Abiezerpa ayllun ukhupi Ofrá llajtapi kunankama kashallanrajpuni.

²⁵ Chay ch'isipacha Tata Diosqa Gedeonta nerqa: Tataykej uywankunamanta qanchis watayoj kaj torota apamuy. Chantá tataykej ruwasqan Baalpaj altarta phirimuy. Ajinallatataj chay Baalpa altarnin qayllapi kashan, Asera k'ullutapis urmachiy.

²⁶ Jinaspataj, chay orqo puntapi uj altarta ruwapuway. Chantá qanchis watayoj torota apamuspataj, noqaman jaywanata jina q'olachipuway chay Asera k'ullu llant'asqaykiwan.

²⁷ Chaypacha Gedeonqa chunka kamachinkunata pusariykukuspa, Tata Diospa kamachisqanta ruwarqa. Chaywanpis tatanpa ayllunta jinataj chay llajtayoj runakunatapis manchachikusqanrayku, tutallan ruwarqa.

²⁸ Q'ayantin tutamanta chay llajtayojkuna sayarispa, repararqanku Baalpa altarnin phirisqa kasqanta. Rikullarqankutaj diosninkuta yupaychananku altar qayllapi kasharqa, chay Asera k'ullupis llant'asqa kasqanta, uj mosoj altar patapitaj uj torota q'olachisqa kasqanta ima.

²⁹ Chantá paykunapura tapunakorqanku: Pitaj kayta ruwanman karqari? nispa. Tukuyta allinta tapukuspataj, yacharqanku Joaspa churin Gedeón chayta ruwasqanta. Chantá Joasman rispa, nerqanku:

³⁰ Chay churiykita orqhomuy, payta wañuchinaykupaj, Baalpa altarninta phiriykusqanmanta jinataj Asera diosniykuta llant'aykusqanmanta, nispa.

³¹ Joastajrí jamojkunaman kuticherqa: Qankunaqa Baalman kutikuspachu maqanakunkichej? Sichus pillapis Baalman kutikun chayqa, manaraj sut'iyashajtin, wañuchisqa kachun. Baal diospuni kajtenqa, saqeychej pay kikinmanta jark'akojta, imaraykuchus paypatamin karqa chay urmachisqa altarqa, nispa.

³² Chaymantapacha Gedeontaqa Yerubaal sutiwan suticharqanku Baalpa altarninta urmachisqanrayku. Chay suti niyta munan: Kikin Baal jark'akuchun, nispa.

Gedeonqa Tata Diosmanta uj señalta mañan

³³ Chaypacha tukuy madianitakuna, jinataj amalecitakunapis, chantá inti llojsimuynejmanta kaj runakunapiwan tantaykukuspa, chimparqanku Jordán mayuta, chantá Jezrel vallepi jaraykukorqanku.

³⁴ Chaypacha Gedeonqa Tata Diospa Espiritunnejta kamachisqa kaspa, putututa waqacherqa, Abiezerpa tukuy ayllunmanta kajkuna tantakamunankupaj.

³⁵ Chantá Manasés jatun ayllumanta kajkunatañataj wajyachimorqa. Wajyachimullarqataj Aser jatun ayllumanta kajkunata, Zabulonmanta kajkunata, Neftalimanta kajkunata ima. Tukuy paykunataj Gedeonwan tantakoj jamorqanku.

³⁶ Chantá Gedeonqa Tata Diosta nerqa: Sichus cheqamanta qan wajyawanki israelitakunata kacharichinaypaj, niwasqaykiman jina chayqa,

³⁷ kay jina señalta rikuchiway: Noqaqa era pampaman churasaj oveja millmata. Sichus tutamanta millma chhullawan joq'ochasqa kanman, tukuy pampataj ch'aki kanman chayqa, yachasaj cheqamanta qan ajllawasqaykita, niwasqaykiman jina israelitakunata kacharichinaypaj, nispa.

³⁸ Ajinataj karqa. Gedeonqa tutamanta sayarispa, chay millmamanta yakuta uj p'uku junt'atapuni ch'irwarqa.

³⁹ Chaywanpis Gedeonqa ujtawan Tata Diosta nillarqataj: Ama phiñakuychu uj señaltawan mañarikusojteyqa. Kay kutipeqa millmañataj ch'aki kachun, jallp'ataj joq'o kachun, nispa.

⁴⁰ Ajinata chay ch'isi Diosqa ruwarqa. Q'ayantin paqarintaj millmaqa ch'aki kakusharqa, jallp'ataj chhullawan joq'ochasqa karqa.