Jueces 5 - DIOSPA QHELQACHISQ

Deborawan Baracwan takinku

¹ Chaypacha Deborawan, Abinoanpa churin Baracwan kay jinata takerqanku:

² Tukuyniykichej Tata Diosta jatunchaychej, imaraykuchus Israelpi runakuna kankuraj, wajyachisqata uyariytawan maqanakuman yaykunankupaj jina.

³ Uyariwaychej, qankuna kuraj kamachejkuna, uyariwaychej, qankuna kamachejkuna. Kunan takisaj Tata Diosman. Kunan takisaj Israelpa Tata Diosninman.

⁴ Tata Dios, maypachachus Seirmanta qan llojserqanki chaypacha, Edompa suyumanta ripushajtiykitaj, jallp'a ikhakorqa, janajpis kharkatiterqa, phuyukunamantapis paramorqa.

⁵ Qanmin Israelpa Tata Diosnin kanki. Qanpa ñawpaqeykipeqa orqokunapis kharkatiterqanku. Sinaipis kharkatitillarqataj.

⁶ Anatpa churin Samgarpa tiemponpi, Yaelpa tiemponpipis, qhatuwan purejkuna purinanku ñanta saqeporqanku, k'ullku ñankunallataña purerqanku.

⁷ Israel suyupi llajtakunaqa ch'inpacha qhepakorqanku. Chaypacha noqa Débora oqharikorqani, Israelpaj uj mama jina.

⁸ Israelitakuna waj dioskunata ajllakojtinkoqa, llajta punkunejpi maqanakoqa kallarqapuni. Tawa chunka waranqa israelitakuna ukhupeqa mana karqachu ni uj jark'akuna escudo, nitaj uj t'ojsina lanzallapis.

⁹ Sonqoyqa Israelpa kamachejninkunawan khuska kashan, aylluymanta tukuy sonqo maqanakuman llojsejkunawanpis. Tata Diosta tukuy yupaychaychej.

¹⁰ Qankuna, yuraj burrokunapi purejkuna, qankunapis llamp'u mast'anapi tiyakojkuna, ñan puriypi kajkunapis, willaychej.

¹¹ Uyariychej, uywaman yaku ujyachina patapi platillota tocaspa takishanku, Tata Diospa atipasqanmanta, israelitakunata atipachisqanmantapis.

¹² Rijch'ariy, Débora, rijch'ariy. Rijch'ariy, takirikuytaj uj takiyta. Abinoanpa churin Barac, jatarikuspa, presoykikunata apakapuy.

¹³ Chaypacha israelitakunamanta puchoj capitankuna urayk'amorqanku kallpasapa runakunaj contrankupi maqanakoj. Noqanejtamin Tata Diospa ayllonqa urayk'amorqa, wapu runakunawan maqanakunankupaj.

¹⁴ Efraín jatun ayllumanta Amalec suyupi tiyakojkuna urayk'amorqanku, paykunaj qhepankutataj Benjamín jatun ayllumanta kajkuna jamorqanku. Maquirmanta kurajkuna urayk'amorqanku, Zabulón jatun ayllumantataj kamachejkuna jamorqanku.

¹⁵ Isacarpa jatun aylloj kurajninkunaqa Deborawan khuska jamorqanku. Isacarpa jatun aylluntaj Baracta yanaparqanku. Paypa qhepantataj valleman kachaykukorqanku. Sichus Rubén jatun ayllumanta runakuna ukhupi kanku wapu runakuna tukuy imapaj wakisqa chayqa,

¹⁶ imaraykutaj qhepakorqanku oveja corralpi, chay michejkuna ovejankuta wajyashajta uyarishaspari? Rubén jatun ayllu chawpipi wapu runakuna karqanku chaypis, iskayrayarqanku.

¹⁷ Galaad llajtayojkuna Jordán mayu chimpapi jarasqa qhepakorqa. Dan jatun ayllumanta kajkunapis barconkoj qayllanpi qhepakullarqanku. Aser jatun ayllumanta kajkunapis mama qocha kantupi qhepakullarqankutaj, manataj chaymanta kuyurikorqankuchu.

¹⁸ Chaywanpis Zabulón jatun aylluwan, Neftalí jatun aylluwanqa wañuytapis mana manchachikuspa, maqanakorqanku.

¹⁹ Chaypacha cananeokunaj kuraj kamachejninkukunaqa maqanakoj jamorqanku Tanac llajtaman, Meguido juturi qayllaman. Chaywanpis mana aterqankuchu qolqeta, nitaj ni imatapis apakapuyta.

²⁰ Janajmantapacha ch'askakunapis Sísaraj contranpi maqanakorqanku.

²¹ Mayu, ñawpa mayu, Cisón nisqa mayu tukuy paykunata apakaporqa. Jinapis noqa Débora kallpachakuspa ñawpajman puririsaj.

²² Caballokunaj phawarisqan jallp'ata kuyurichin. Atiyniyojkunaj caballonkunaj sink'urisqanpis uyarikun.

²³ Tata Diospa angelnintaj rimarerqa: Meroz llajtayojkuna maldicisqa kachunku, Tata Diospa soldadonkunata mana yanapasqankumanta. Sinch'i maldicisqa kachunku, imaraykuchus mana jamorqankuchu Tata Diosta yanaparej wapu soldadokunata atipananpaj.

²⁴ Quenita Jeberpa warmin Yaelqa tukuy warmimanta nisqaqa maypaj qhawasqa kachun. Jarapi tiyakoj tukuy warmimanta aswan saminchasqa kachun.

²⁵ Sisaraqa yakuta mañakorqa, Yaeltaj lecheta jaywaykorqa. Ñojñuta atiyniyojkunaj vasonpi jaywaykorqa, sinch'ita puñurparinanpaj.

²⁶ Chantá uj estacata lloq'e makinwan jap'ispa, k'ullu mazotataj paña makinwan oqharerqa. Sísaraj ch'ipoqonpi wajtaspataj, umanta estacawan pasarparicherqa.

²⁷ Sisaraqa q'ewiykachakuspa, Yaelpa chakin chaypi pampaman wijch'ukorqa. Urmarqa, chaypitaj wañorqa.

²⁸ Sísaraj mamanqa may llakisqa, ventanamanta qhawaspa, nin: Imaraykutaj maqanakunapaj carretan mana chayamunchuri? Imaraykutaj maqanakunapaj carretan mana usqhayta rikhurimunchuri? nispa.

²⁹ Aswan yuyayniyoj kaj warmikunamanta wakin ninku, Sísaraj mamanpis sonqonpi nishallantaj:

³⁰ Maqanakupi jap'isqankutachá rak'inakushanku. Sapa ujninkumanchá ujkama, chayrí iskaykamachá sipaskunata rak'inakushanku. Sisarapajqa may k'acha kaj colorniyoj telakunachá kashan, may k'acha colorkunawan awakipasqataj, kunkanman warkhunapaj, nispa.

³¹ Tata Diosniyku, tukuy awqaykikuna Sísara jina phirisqa kachunku. Qanta munakusojkunataj, imaynatachus chawpi p'unchayta inti k'ancharin, ajinata k'ancharichunku. Ajinata Deborawan, Baracwan Tata Diosman takerqanku. Chaymanta qhepaman Israel suyupi tawa chunka watata, allin kawsakuylla karqa.