Jueces 4 - DIOSPA QHELQACHISQ

Deborawan Baracwan Sisarata atipanku

¹ Aod wañupusqanmanta qhepata, israelitakunaqa Tata Diospa contranta watejmanta juchallillarqankutaj.

² Chantá Tata Diosqa Canaanta kuraj kamachej Jabinmanñataj israelitakunata jaywaykorqa. Payqa Jazor llajtapi kamacherqa. Soldadonkunata kamachejtaj Sísara sutiyoj karqa. Payqa Jaroset Goyinpi tiyakorqa.

³ Jabinpata 900 fierromanta carretankuna karqa. Payqa iskay chunka watataña israelitakunata sinch'ita ñak'aricherqa, chayraykutaj paykunaqa Tata Dios yanapananta mañakorqanku.

⁴ Chaypacha israelitakuna ukhupi uj warmi juez jina kamachisharqa. Pay Débora sutiyoj karqa, Lapidotpa warmin, chantá Diosmanta sut'inchaj.

⁵ Deboraqa uj palma sach'a urapi tiyakuyman yachasqa karqa. Chay sach'aqa Efraín jatun aylloj orqorara jallp'anpi karqa, Ramá llajta Betel llajtawan tinkuypi. Chay sach'ata “Déboraj Palma Sach'an” nej kanku, israelitakunataj payman rej kanku justiciata mask'aspa.

⁶ Uj p'unchay Deboraqa wajyacherqa Cedesmanta Abinoanpa churin Baracta, Neftalí jatun ayllumanta. Paymantaj nerqa: Israelpa Tata Diosnin kamachisunki kay jinata: Tabor orqoman rispa, chaypi tantamuy 10.000 maqanakoj runakunata Neftalí jatun ayllumanta, jinataj Zabulón jatun ayllumantawan.

⁷ Noqa kachamusaj Jabinpa soldadonkunata kamachej Sisarata, soldadonkunatawan, carretakunatawan ima Cisón wayq'okama qankunawan maqanakunankupaj. Noqataj yanapasqaykichej chaypi paykunata atipanaykichejpaj. Ajinata Tata Diosqa Deboranejta Baracta kamacherqa.

⁸ Baracrí kuticherqa: Qan noqawan rejtiykeqa, risaj. Mana rejtiykitaj, nillataj risajchu, nispa.

⁹ Deborataj nerqa: Qanwan risaj. Chaywanpis kay maqanakupi mana qanchu jatunchasqa kanki, imaraykuchus Tata Diosqa uj warminejta Sisarata wañuchenqa, nispa. Jinataj Deboraqa Baracwan khuska Cedesman rerqa.

¹⁰ Chaypitaj Baracqa runakunata wajyarqa Zabulón jatun ayllumanta, Neftalí jatun ayllumantawan, tantaykorqataj 10.000 maqanakoj runakunata paywan rinankupaj. Deborapis paywan khuska rerqa.

¹¹ Cedes qayllapi, Sanayin encina sach'a chaynejpi, tiyakusharqa quenita Jeberqa. Quenitakunaqa Moisespa suegron Hobabpa mirayninmanta karqanku. Kay Jeberrí chay waj quenitakunamanta t'aqakuspa, paywan, wasi ayllunwan imalla chaypi tiyakusharqanku.

¹² Jinapi Sísara Tabor orqoman Abinoanpa churin Barac wicharisqanta yachaytawankama,

¹³ Sisaraqa tantaykorqa 900 fierromanta maqanakunapaj carretankunata, tukuy soldadonkunatawan, paykunawantaj rerqa Jaroset Goyinmanta Cisón wayq'okama.

¹⁴ Chantá Deboraqa Baracta nerqa: Rillayña. Tata Diostaj kunan Sisarata atipachisonqa, imaraykuchus Tata Diosqa soldadoykikunaj ñawpaqenkuta rishan, nispa. Chaypacha Baracqa Tabor orqomanta 10.000 soldadokunawan urayk'amorqa.

¹⁵ Maqanakuman yaykojtinkukamataj, Tata Diosqa pawiracherqa Sísaraj soldadonkunata, jinallataj carretakunapi kajkunatapis. Sisarapis carretanmanta urayk'uspa, chakipi ayqekorqa.

¹⁶ Baractajrí Sísaraj carretankunata, soldadonkunatawan qhatiykorqa Jaroset Goyinkama. Chay p'unchaypi Sísaraj soldadonkumanta ni uj kawsasaj puchorqachu.

¹⁷ Chaypachaqa quenita Jeberpa ayllunwan k'achata kawsakusharqanku Jazormanta kuraj kamachej Jabinwan. Chayrayku Sisaraqa ayqekushaspa, Jeberpa warmin Yaelpa toldonman chakipi chayarqa.

¹⁸ Yaelqa payta taripamoj llojsispataj, nerqa: Yaykumullay, wiraqochíy, ama manchachikuychu, nispa. Sísara toldoman yaykojtintaj, Yaelqa uj qhatanawan pakaykorqa.

¹⁹ Chantá Sisaraqa mayta ch'akichikusqanraykutaj yakuta mañarikorqa. Yaeltaj leche jallch'ana qara p'uñuta kicharispa, lecheta ujyananpaj jaywarqa. Chaymantataj watejmanta payta qhataykullarqataj.

²⁰ Chaypacha Sisaraqa Yaelta nerqa: Toldo punkupi tiyay. Pillapis jamuspa: Pi kaypi kashan? nispa tapojtenqa, qan ninki: Mana pipis kanchu, nispa.

²¹ Chayta Jeberpa warmin Yaelman niytawan, Sisaraqa allin sayk'usqa kaspa, sinch'ita puñurparerqa. Yaeltajrí uj k'ullu mazota oqharikamorqa, toldomanta uj estacata jap'ispataj, ch'insitullamanta Sisaraman chimpaykorqa. Jinataj ch'ipoqonman estacata takaykuspa, umanta pampakama pasarpacherqa. Ajinata Sisaraqa wañorqa.

²² Baracqa Sisarata mask'aspa chayamojtin, Yaelqa toldomanta llojsispa, payta taripamorqa, nerqataj: Jamuy, rikuchisqayki, pitachus mask'ashanki, chayta, nispa. Baractaj toldoman yaykuspa, rikorqa Sisarata pampapi wañusqa wijch'urayashajta, estacawan ch'ipoqonpi takasqata.

²³ Ajinata Tata Diosqa cananeo kuraj kamachej Jabinta k'umuykucherqa tukuy israelitakunaj ñawpaqenkupi.

²⁴ Chaymantapachataj israelitakunaqa astawan kallpachakuspa, Canaanta kuraj kamachej Jabinwan maqanakorqanku chinkachinankukama.