Jueces 21 - DIOSPA QHELQACHISQ

Benjamín jatun ayllumanta puchojkunapaj warmikunata mask'apunku

¹ Israelitakunaqa Mispapi tantasqa kashaspa, tilusqanku: Noqanchej manapuni ususinchejkunata Benjaminmanta qharikunawan casarachisunchu, nispa.

² Chay qhepatataj Betelpi tantakorqanku, Diospa ñawpaqenpi ch'isiyanankama sonqo nanayta waqarqanku.

³ Nerqankutaj: Tata Dios, Israelpa Diosnin, imaraykutaj kay jina llakiy qhatiriwaykuri? Imaraykutaj Israelmanta ujnin jatun ayllu chinkanmanri? nispa.

⁴ Q'ayantintaj israelitakunaqa tutamanta jatarikorqanku. Uj altarta ruwaspataj, Tata Diosman jaywarqanku uywa ñak'asqa q'olachinakunata, chantá allinyakuna jaywanakunatawan.

⁵ Tapunakorqankutaj: Pikunataj Tata Diospa ñawpaqenpi tantakuyman mana rerqankuchuri? nispa. Chayta nerqanku, imaraykuchus tiluchinakusqanku wañuchinankuta pikunachus Mispapi tantakuyninkuman mana rejkunata.

⁶ Israelitakunaqa sinch'i llakisqapuni kasharqanku, chay ayllu masinku Benjaminmanta waqarikuspataj nerqanku: Kunan Israel jatun ayllukunamanta ujnin jatun ayllu chinkarin.

⁷ Imatataj ruwasunchej Benjamín jatun ayllumanta puchoj qharikunapaj warmita tarinanchejpajri? Noqanchejqa Tata Diosrayku tilorqanchej ususinchejkunata paykunawan mana casarachinanchejpaj, nispa.

⁸ Chantá tapunakullarqankutaj: Kanmanchu mayqen israelitakunapis Mispapi Tata Diospa ñawpaqenpi tantakuyman mana jamojkuna? nispa. Chaypachataj repararqanku Galaadpi Jabesmanta kajkuna ni mayqen chay tantakuyman jamusqankuta.

⁹ Listata qhaparejtinku, Galaadpi Jabesmanta kajkuna ni pipis kasqachu.

^10-11 Chantá tukuynin Israelmanta 12.000 may wakichisqa soldadokunata ajllaspa, paykunata kacharqanku wañurachimunankupaj tukuy Jabés llajtamanta kajkunata, wawankuta, chantá tukuy qosayoj warmikunatapis.

¹² Jabespi tukuy tiyakojkunamantaqa tawa pachajllata manaraj qharita rejsej sipaskunata tarerqanku, paykunatataj Canaanpi, Silo jaraman pusamorqanku.

¹³ Chantá israelitakunaqa runakunata kacharqanku Rimón chhankapi pakakoj Benjamín jatun ayllumanta kajkunaman, willanankupaj israelitakunaqa Benjaminmanta kajkunawan allinyakapuyta munasqankuta.

¹⁴ Benjaminmanta kajkuna wasinkuman kutipojtinku, israelitakunaqa Jabesmanta suwasqanku, chay warmikunata paykunaman qoporqanku. Jinapis warmikunaqa mana tukuypajchu karqa.

¹⁵ Jinapi israelitakunaqa Benjamín jatun ayllumanta mayta llakikorqanku, Tata Diosqa Israel ayllu ukhupi uj q'asata rikhurichisqanmanta.

¹⁶ Israel ayllumanta kurajkunataj ninakorqanku: Benjamín jatun ayllumanta tukuy warmita wañucherqanchej. Kunanrí maymantataj chay puchoj qharikunapaj warmita tarisunmanri? nispa.

¹⁷ Paykuna nillarqankutaj: Benjamín jatun aylloqa tukuy Israel ayllu ukhupi, maychus kananpeqa kanallanpuni tiyan. Ajinamanta wañuymanta puchojkunanejta, Israel jatun ayllukunamanta ni mayqen chinkanqachu.

¹⁸ Jinapis noqanchejqa ususinchejkunataqa mana paykunawan casarachiyta atinchejchu, imaraykuchus tilorqanchej: Maldicisqa kachun pichus ususinta Benjaminmanta kaj qhariwan casarachejqa, nispa.

¹⁹ Chaymanta parlashaspa, yuyarikorqanku Silopi sapa wata Tata Diospa sutinpi raymeqa qayllapiña kasqanta. Siloqa kashan Betelmanta wichaynejpi, Betelmanta Sichem nisqa llajtaman rina ñanmanta inti llojsimuynejpi, Lebonamanta uranejpi.

²⁰ Chaypacha Israelmanta kurajkunaqa willacherqanku Benjamín jatun ayllumanta kajkunaman: Rispa, pakaykakamuychej, Silo qayllapi, uva huerta ukhuman.

²¹ Sumajtataj qhawankichej. Silomanta sipaskuna pandillakunapi llojsimojtinku, qankunapis uva huertamanta rikhuriykuspa, sapa ujniykichej uj sipastakama jap'iytawan, llajtaykichejman apakapunkichej.

²² Sichus tatanku, chayrí turankupis quejakoj jamuwaykuman chayqa, noqayku nisqayku: Mañarikuyku Benjaminmanta kajkunata khuyaspa, ama paykunata juchachanaykichejta. Noqaykoqa mana tukuypajchu maqanakumanta warmikunata apamorqayku. Chaywanpis mana qankunachu chay warmita qoshankichej, chayrayku chay tilusqaykichejmantaqa mana juchachasqachu kankichej, nispa.

²³ Benjaminmanta kajkunaqa israelitakunaj nisqankuman jina ruwarqanku. Sapa ujninku uj sipasta suwarqanku chay pandillakunapi llojsimojkunamanta, jinaspataj pusakaporqanku. Chaymantaqa llajtankuman kutipuspa, watej llajtakunata jataricherqanku, chaypitaj tiyakaporqanku.

²⁴ Chay ujkuna israelitakunapis kutipullarqankutaj sapa ujninku jatun ayllunkuman, wasi ayllunkuman, jallp'ankumantaj.

²⁵ Chaypachaqa Israel suyupi manaraj kuraj kamachej karqarajchu. Chayrayku sapa ujninku imatapis munasqankuman jinalla ruwaj kanku.